शनिवार  

२ जानेवारी २०२१

 प्रभूजन्मानंतरचा नववा दिवस 

संत बेसिल महान व संत ग्रेगरी नाझियांझन यांचा सण 

आज आपण संत बेसिल महान व संत ग्रेगरी नाझियांझन ह्यांची स्मृति साजरी करीत आहोत. कुशाग्र बुद्धिमत्ता लाभलेल्या संत बेसिल ह्यांनी त्यांच्या कलेचा सदुपयोग करून गरीब, अनाथ, आजारी, वृद्ध, बेघर व बेवारिस लोकांसाठी अनेक वसतिगृहे चालू केले . यहुदी, ख्रिस्तेतर आणि कॅथोलिक ह्यामध्ये ऐक्य प्रस्थापित केले व ख्रिस्ताची  साक्ष लोकांना दिली. संत प्रेगरी नाइझियांझन हे संत बेसिल त्यांचे मित्र होते.  बायबल अभ्यासक, नम्र सेवक आणि पावित्र्याने भरलेले जीवन जगून संत  ग्रेगरी ह्यांनी  ख्रिस्ताची साक्ष सर्वांना दिली.
 ख्रिस्तसभा आज आपल्या सर्वांना आवाहन करुन ख्रिस्ताची साक्ष आपल्या वाणीद्वारे व वर्तनाद्वारे इतरांना देण्यासाठी पाचारण करीत आहे. 



✝️

“जो माझ्या मागून येत आहे तो माझ्या पूर्वीच अस्तित्वात होता. "

✝️

पहिले वाचन : योहानचे पहिले पत्र २:२२-२८

वाचक :   योहानचे पहिले पत्र यातून घेतलेले वाचन 

येशू हा ख्रिस्त आहे हे जो नाकारतो त्याच्यासारखा कोण लबाड आहे ? जो पित्याला व पुत्राला नाकारतो तोच ख्रिस्तविरोधी आहे. जो कोणी पुत्राला नाकारतो त्याला पिता लाभला नाही; जो पुत्राला स्वीकारतो त्याला पिता लाभला आहे. तुमच्याविषयी म्हणावयाचे तर, जे तुम्ही प्रारंभापासून ऐकले ते जर तुम्हांमध्ये राहिले तर तुम्हीही पुत्रामध्ये व पित्यामध्ये राहाल. हे जे अभिवचन त्याने स्वत: आपल्याला दिले आहे तेच सार्वकालिक जीवन होय.

    तुम्हाला बहकवणाऱ्या लोकांविषयी हे मी तुम्हाला लिहिले आहे. तुम्हांविषयी म्हणावयाचे तर त्याच्याकडून तुमचा जो अभिषेक झाला तो तुम्हांमध्ये राहतो. तेव्हा तुम्हांला कोणी शिकवण्याची गरज नाही. त्याचा अभिषेक जो सत्य आहे, खोटा नाही, तुम्हांला सर्व गोष्टींविषयी जे शिकवतो त्याप्रमाणे व त्याने तुम्हांला शिकवल्याप्रमाणे तुम्ही त्याच्यामध्ये राहा.

तो प्रकट होईल तेव्हा आपल्याला धैर्य असावे आणि त्याच्या येण्याच्या वेळेस त्याच्यापासून लाजेने माघार घ्यावी लागू नये म्हणून आता मुलांनो, त्याच्यामध्ये राहा.

हा प्रभूचा शब्द आहे 

सर्व : देवाला धन्यवाद.


प्रतिसाद स्तोत्र ९८:१-४

प्रतिसाद :  पृथ्वीच्या कानाकोपऱ्यांनी आमच्या देवाचा विजय पाहिला आहे.

१) नवीन गीत गाऊन प्रभूचे गुणगान करा. कारण त्याने अलौकिक कृत्ये केली आहेत. त्याने आपल्या हाताने व पवित्र बाहुबलाने विजय संपादन केला आहे.

२) प्रभूने आपल्या विजयाची द्वाही फिरवली आहे. राष्ट्रांसमक्ष आपली न्यायपरायणता प्रकट केली आहे. इस्राएलच्या घराण्यावरील आपले अढळ प्रेम व निष्ठा यांची त्याने आठवण ठेवली आहे

३) पृथ्वीच्या कानाकोपऱ्यांनी आमच्या देवाचा विजय पाहिला आहे. पृथ्वीवरील सर्व लोकहो, प्रभूचा जयजयकार करा. जयघोष करून आनंदाने गा.


जयघोष                                                                      

आलेलूया,आलेलूया !

शब्द देह झाला आणि त्याने आम्हांमध्ये वस्ती केली, परंतु ज्यांनी त्याचा स्वीकार केला त्यांना म्हणजे त्याच्या नावावर विश्वास ठेवणाऱ्यांना त्याने देवाची मुले होण्याचा अधिकार दिला.

आलेलूया !

शुभवर्तमान 

योहान  १:१९-२८ 

वाचक :   योहानलिखित शुभवर्तमानातून घेतलेले वाचन १:१९-२८ 

यहुद्यांनी येरुशलेमहून याजक व लेवी ह्यांना योहानला आपण कोण आहा असे विचारायला पाठविले तेव्हाची त्याची साक्ष हीच आहे. त्याने कबूल केले. नाकारले नाही. मी खिस्त नाही असे त्याने कबूल केले. तेव्हा त्यांनी त्याला विचारले, "तर मग आपण कोण आहा? एलिया आहा काय ?" तो म्हणाला, "मी नाही." "आपण तो संदेष्टा आहा काय ?" त्यावर त्याने "नाही" असे उत्तर दिले. ह्यावरून ते त्याला म्हणाले, "ज्यांनी आम्हांला पाठवले त्यांना आम्ही उत्तर द्यावे म्हणून, आपण कोण आहा, हे सांगा. स्वत:विषयी आपले काय म्हणणे आहे ?" तो म्हणाला, "यशया संदेष्ट्याने सांगितल्याप्रमाणे, परमेश्वराचा मार्ग नीट करा, असे अरण्यात ओरडणाऱ्याची वाणी मी आहे." आता पाठवलेली ही माणसे परुश्यांपैकी होती. त्यांनी त्याला विचारले, "आपण ख्रिस्त नाही, एलिया नाही व तो संदेष्टाही नाही, तर बाप्तिस्मा का करता ?" योहानने त्यांना उत्तर दिले, "मी पाण्याने बाप्तिस्मा करतो. ज्याला तुम्ही ओळखत नाही असा एक तुम्हांमध्ये उपस्थित आहे. तो माझ्यामागून येणारा आहे. त्याच्या पायतणाचा बंद सोडायला मी योग्य नाही." 

यार्देनच्या पलीकडे बेथानीत योहान बाप्तिस्मा करीत होता तेथे ह्या गोष्टी घडल्या.

प्रभूचे हे शुभवर्तमान...



चिंतन :   योहान बाप्तिस्ताने धारण केलेला दृष्टिकोन आजच्या जगामध्ये तितकासा लोकप्रिय नाही. तो इतका नम्र आहे की त्याला स्वतःला श्रेय घ्यायचे नाही. स्वतः मागे राहून दुसऱ्यांना प्राधान्य देण्याची इच्छा करणे असा साधेपणा लोकप्रिय नाही. उलट आपण लक्ष वेधून घेण्याचा प्रयत्न करतो. आपण लोकांकडून कौतुक आणि मान्यता मिळविण्याचा प्रयत्न करतो. योहानाला आपले पाचारण पूर्णपणे समजले होते. स्वतःच्या गौरवासाठी नव्हे तर लोकांना ख्रिस्ताकडे आकर्षित करण्यासाठी आपले पाचारण आहे. इतरांना ख्रिस्ताकडे आणणे हेच आपले खरे पाचारण आहे.

प्रार्थना :  हे प्रभू येशू, सुवार्तेची साक्ष इतरांना देण्यास आम्हाला प्रेरणा व
कृपाशक्ति दे, आमेन.