प्रकटीकरणाचा सोहळा
पवित्र मिस्साबलिदान – (प्रवचनकार - आर्चबिशप फेलिक्स मच्याडो, वसई धर्मप्रांत)
"आम्ही त्याचा तारा पाहून त्याला नमन करायला आलो आहोत."
✝️
पहिले वाचन : यशया ६०:१-६
वाचक : यशयाच्या पुस्तकातून घेतलेले वाचन
ऊठ, प्रकाशमान हो, कारण प्रकाश तुझ्याकडे आला आहे. परमेश्वराचे तेज तुझ्यावर उदय पावले आहे. पाहा, अंधकार पृथ्वीला झाकत आहे. निबिड काळोख राष्ट्राना झाकत आहे, पण तुझ्यावर परमेश्वर उदय पावत आहे. त्याचे तेज तुझ्यावर दिसत आहे. राष्ट्रे तुझ्या प्रकाशाकडे येतील. राजे तुझ्या उदयप्रभेकडे येतील. तू आपले डोळे वर करून चोहोकडे पाहा. ते सर्व एकत्र होत आहेत. तुझ्याकडे येत आहेत. तुझे पुत्र दुरून येत आहेत. तुझ्या कन्यांना कडेवर बसवून आणत आहेत. हे पाहशील तेव्हा तुझ्या मुखावर आनंद चमकेल तुझ्या हृदयाला स्फुरण येऊन ते विकास पावेल, कारण समुद्राकडून विपुल धन तुझ्याकडे लोटेल. राष्ट्राची संपत्ती तुझ्याकडे येईल. उंटांच्या झुंडी, मिद्यान व एफ्रा येथील तरुण उंट तुला व्यापून टाकतील. सर्व लोक सोने व ऊद घेऊन शबा येथून येतील. परमेश्वराचा आनंदभराने गुणानुवाद करतील.
हा प्रभूचा शब्द आहे
सर्व : देवाला धन्यवाद.
प्रतिसाद स्तोत्र ७२:१-२,७-८,१०-१३
प्रतिसाद : प्रभो, सर्व राष्ट्रे, तुला दंडवत घालतील.
१) हे देवा, तू आपले न्यायानुशासन राजाला दे. राजपुत्राला आपली धर्मनीती शिकव. तो नीतीने तुझ्या लोकांचा न्याय करील, तुझ्या दीनांचा निवाडा न्यायबुद्धीने करील .
२) त्याच्या काळी धार्मिक उत्कर्ष पावतील आणि चंद्र नाहीसा होईपर्यंत विपुल शांती असेल. समुद्रापासून महासागर आणि नदीपासून पृथ्वीच्या दिगंतापर्यंत तो प्रभुत्व चालवील.
३) तार्शीश व द्वीपे यांचे राजे नजराणे आणतील. शबा व सबा यांचे राजे खंडणी देतील. सर्व राजे त्याला दंडवत घालतील. सर्व राष्ट्रे त्याची सेवा करतील.
४) कारण धावा करणाऱ्या दरिद्री, दीन व अनाथ यांना तो सोडवील. दुबळ्यांवर तो दया करील, दरिद्र्यांचे जीव तो तारील.
दुसरे वाचन : पौलचे इफिसकरांस पत्र ३:२-३.५-६
वाचक : पौलचे इफिसकरांस पत्र यातून घेतलेले वाचन
"परराष्ट्रीय त्याच अभिवचनाचे वाटेकरी आहेत असे प्रकट झाले आहे." देवाची जी कृपा तुम्हांसाठी मला प्राप्त झाली तिच्या व्यवस्थेविषयी तुम्ही ऐकले असेल, म्हणजे प्रकटीकरणाच्याद्वारे मला रहस्य कळविले गेले. त्याप्रमाणे मी जे थोडक्यात वर लिहिले आहे ते रहस्य जसे आता आत्म्याच्याद्वारे त्याच्या पवित्र प्रेषितांना व संदेष्ट्याना प्रकट करून दाखवलेले आहे तसे ते इतर पिढ्यांच्या मनुष्य संतानांना कळविण्यात आले नव्हते. ते रहस्य हे की, परराष्ट्रीय लोक ख्रिस्त येशूच्या ठायी सुवार्तेच्या योगाने आम्हांबरोबर वतनबंधू, आम्हांबरोबर एकशरीर व आम्हांबरोबर अभिवचनाचे वाटेकरी आहत.
हा प्रभूचा शब्द आहे
सर्व : देवाला धन्यवाद.
जयघोष
आलेलूया,आलेलूया !
आम्ही पूर्व दिशेस त्याचा तारा पाहून
त्याला नमन करायला आलो आहोत.
शुभवर्तमान
मत्तय २:१-१२
वाचक : मत्तयलिखित शुभवर्तमानातून घेतलेले वाचन
राजा हेरोदच्या अमदानीत, यहूदिया प्रांतातल्या बेथलेहेम येथे येशूचा जन्म झाला. त्याच्या जन्मानंतर काही मागी लोक पूर्वेकडून यरुशलेम येथे आले आणि विचारपूस करू लागले. "यहुद्यांचा राजा जन्माला आला आहे. तो कुठे आहे ? आम्ही त्याचा तारा उगवलेला पाहिला म्हणून त्याला मुजरा करायला आम्ही आलोत."
हे ऐकताच राजा हेरोद आणि त्याबरोबर सारे यरुशलेम घाबरून गेले. त्याने यहुद्यांचे प्रमुख पुरोहित व शास्त्री जमवले आणि त्यांना विचारले, "ख्रिस्ताचा जन्म कुठे व्हायचा आहे?" "यहुदियातल्या बेथलेहेम" येथे ते म्हणाले; कारण संदेष्ट्यांने लिहिले आहे. "यहुदा प्रांतातल्या बेथलेहेमा, यहुदाच्या सत्ताधीशापेक्षा तू मुळीच कनिष्ठ नाहीस; कारण तुझ्यातूनच एक नेता उदयाला येईल. आणि तो माझ्या इस्राएल लोकांचा प्रतिपालक होईल."
मग हेरोदाने त्या पूर्वेकडल्या मागी लोकांना गुपचूप बोलावून घेतले आणि तारा नक्की केव्हा दिसू लागला याची वेळ विचारून घेतली. नंतर त्यांना बेथलेहेमला जाण्यास सांगून तो म्हणाला, "तुम्ही जा आणि त्या बाळाचा बारकाईने शोध करा. त्याचा पत्ता लागला की मला खबर द्या, म्हणजे मीपण येऊन त्याला मुजरा करीन."
राजाच्या सांगण्याप्रमाणे ते निघाले. जाता जाता त्यांना पूर्वी जो तारा पूर्वेस उगवलेला दिसला होता तो पुन्हा दिसू लागला. तो त्यांच्या पुढे पुढे जात होता. मग जेथे ते बाळ होते तेथे तो वर थांबला. तारा पाहून त्यांना खूपच आनंद झाला होता. ते घरात गेले तेव्हा ते बाळ आपली आई मरिया हिच्याजवळ असलेले त्यांना आढळले. बाळाच्या पायावर डोके ठेवून त्यांनी त्याला नमन केले. आपल्या थैल्या सोडून त्याला सोने ,ऊद व गंधरस यांचे नजराणे दिले. मग 'हेरोदाकडे परत जाऊ नका,' अशी स्वप्नात सूचना मिळाल्यामुळे ते दुसऱ्या वाटेने आपल्या देशाला निघून गेले.
प्रभूचे हे शुभवर्तमान...
0 टिप्पण्या