(पुनरुत्थान दुसरा सप्ताह 

सोमवार 

१२ एप्रिल २०२१

✝️





   संत जुलियस पहिले 
(परमगुरु वर्तनसाक्षी) 


✝️
            
आज प्रभू येशु आपल्या सर्वांना सांगत आहे, 'पाण्यापासून व आत्म्यापासून जन्म घेतल्यावाचून कोणीहि देवराज्यात प्रवेश करू शकत  नाही.' पश्चातापाचा मार्ग स्वीकारुन प्रभुच्या प्रेमाचा संदेश जीवनात उतरविणे आपल्याला गरजेचे आहे. स्नानसंस्कार स्वाकारलेली प्रत्येक व्यक्ती देवराज्याची सहभागिदार बनू शकते, मात्र प्रभू येशूच्या वचनानुसार आचरण करून पवित्र आत्म्याचा स्वीकार करावा. मूळपापाचा कलंक धुवून स्वच्छ व शुद्ध करण्यासाठी आपल्याला पाण्याचा व पवित्र आत्म्याचा बाप्तिस्मा देण्यात आला आहे. 
प्रभू येशूच्या सर्व प्रेषितांवर पवित्र  आत्म्याचा वर्षाव झाला आणि त्यांचे संपूर्ण जीवन ख्रिस्तमय झाले. आजच्या पहिल्या वाचनात म्हटले आहे, 'ते सर्व पवित्र आत्म्याने परिपूर्ण होऊन देवाचे  वचन धैर्याने बोलू लागले.'
प्रभू येशूच्या आज्ञेप्रमाणे आपले आध्यात्मिक नुतनीकरण करण्यासाठी व पवित्र आत्म्याच्या वरदानांचा स्वीकार करण्यास आपण पात्र बनावेत म्हणून ख्रिस्तावरील आपली श्रद्धा मजबूत करुन पवित्र आत्म्याला आपण शरण जाऊ या. 

✝️

"नव्याने जन्म घेतल्यावाचून कोणीही देवाच्या राज्यात प्रवेश करू शकत नाही."

✝️


पहिले वाचन  प्रे.  कृ.  ४:२३-३१

वाचक :  प्रे. कृ. या पुस्तकातून घेतलेले वाचन 

"त्यांनी प्रार्थना केल्यावर ते सर्व पवित्र आत्म्याने परिपूर्ण झाले व देवाचे वचन धैर्याने बोलू लागले."

पेत्र आणि योहान यांची सुटका झाल्यावर ते आपल्या मित्रमंडळींकडे गेले आणि मुख्य याजक आणि वडीलजन त्यांना जे काही म्हणाले होते ते सर्व त्यांनी त्यांना सांगितले. हे ऐकून ते एकचित्ताने देवाला उच्च स्वराने म्हणाले, "हे देवा, आकाश, पृथ्वी, समुद्र ह्यांचा आणि त्यांच्यात जे काही आहे त्या सर्वांचा उत्पन्नकर्ता तूच आहेस आमचा पूर्वज, तुझा सेवक दावीद, ह्याच्या मुखाने फार पूर्वी तू पवित्र आत्म्याच्या द्वारे म्हटले, राष्ट्रे का खवळली आणि लोकांनी व्यर्थ योजना का केल्या? प्रभूविरूद्ध आणि त्याच्या अभिषिक्तांविरूद्ध लढण्यास पृथ्वीवरील राजे उभे राहिले आणि अधिकारी एकत्र जमले. 

    आज हेच ह्या शहरात घडत आहे. कारण खरोखरच ज्याला तू अभिषेक केला तो तुझा पवित्र सेवक येशू ह्याच्याविरूद्ध ह्या शहरात परराष्ट्रीय आणि इस्राएल लोक ह्यांच्यासह हेरोद आणि पोन्ती पिलात हे एकत्र झाले आहेत. ह्यासाठी जे काही घडावे म्हणून तू स्वहस्ते आणि स्वसंकल्पाने पूर्वी योजले होते ते त्यांनी करावे. हे प्रभो, आता तू त्यांच्या धमकावण्याकडे लक्ष दे आणि आरोग्यदान देण्याकरिता तू आपला हात लांब करत असता आपल्या सेवकांनी पूर्ण धैर्याने तुझे वचन सांगावे म्हणून त्यांना सामर्थ्य दे. तुझा पवित्र सेवक येशू ह्यांच्या नावाने चिन्हे आणि चमत्कार घडू देत." त्यांनी ही प्रार्थना केल्यावर ज्या जागेमध्ये  ते जमले होते ती हादरली आणि ते सर्व पवित्र आत्म्याने परिपूर्ण झाले आणि देवाचे वचन धैर्याने बोलू लागले.

हा प्रभूचा शब्द आहे 


सर्व : देवाला धन्यवाद.


प्रतिसाद स्तोत्र २:१-९

प्रतिसाद : परमेश्वराला शरण जाणारे ते धन्य आहेत.

१ राष्ट्रे का दंगल माजवीत आहेत ?
हे लोक व्यर्थ का कारस्थाने रचीत आहेत ? प्रभूविरूद्ध आणि त्याच्या अभिषिक्तांविरुद्ध पृथ्वीवरील राजे सज्ज झाले आहेत. ते म्हणतात, “चला, त्यांनी घातलेली बंधने आपण तोडून टाकू,
त्याचे पाश आपण झुगारून देऊ." 

२)स्वर्गातील सिंहासनारूढ देव हसत आहे,
प्रभू त्यांचा उपहास करीत आहे. तो संतप्त होऊन त्यांना धमकावील, क्रोधाने त्यांच्यावर दरारा बसवील. तो म्हणतो, सियोनवर वर, माझ्या पवित्र डोंगरावर मी माझा राजा प्रस्थापित केला आहे.

३) प्रभूचे निर्णय मी जाहीर करीन. प्रभू मला म्हणाला, "तू माझा पुत्र आहेस. आज मी तुला जन्म दिला आहे. तू मागितलेस तर राष्ट्रांचे स्वामित्व मी तुला देईन, थेट सीमेपर्यंत पृथ्वी तुझ्या स्वाधीन करीन. लोखंडी गजाने तू त्यांना फोडून काढशील, कुंभाराच्या मडक्याप्रमाणे त्यांच्या ठिकऱ्या उडवशील.


जयघोष                                                 

आलेलुया, आलेलुया! 

असे लिहिले आहे की, ख्रिस्ताने दुःख सोसावे आणि तिसऱ्या दिवशी मेलेल्यांमधून उठावे. 

 आलेलुया!


शुभवर्तमान योहान  ३:१-८

वाचक :  योहानलिखित शुभवर्तमानातून घेतलेले वाचन 

परुश्यांपैकी निकदेम नावाचा एक मनुष्य होता, तो यहुद्यांचा एक अधिकारी होता. तो रात्रीचा येशूकडे येऊन त्याला म्हणाला, "गुरुजी, आपण देवापासून आलेले शिक्षक आहा हे आम्हांला ठाऊक आहे, कारण ही जी चिन्हे आपण करता ती देव बरोबर असल्यावाचून कोणालाही करता येत नाहीत.” येशू त्याला म्हणाला, “मी तुम्हाला नक्की सांगतो, नव्याने जन्मल्यावाचून कोणालाही देवाचे राज्य पाहता येत नाही." निकदेम त्याला म्हणाला, "म्हातारा झालेला मनुष्य कसा जन्म घेऊ शकेल? त्याला मातेच्या उदरात दुसऱ्यांदा जाणे आणि जन्म घेणे शक्य होईल काय ?" येशूने उत्तर दिले, मी तुम्हाला खात्रीने सांगतो, पाण्यापासून आणि आत्म्यापासून जन्म घेतल्यावाचून कोणीही देवाच्या राज्यात प्रवेश करू शकत नाही. देहापासून जन्मलेले देह आणि आत्म्यापासून जन्मलेला आत्मा आहे. तुम्हांला नव्याने जन्मले पाहिजे. असे मी तुम्हाला सांगितले म्हणून आश्चर्य मानू नका. वारा पाहिजे तिकडे वाहतो आणि त्याचा आवाज तुम्ही ऐकता, तरी तो कोठून येतो आणि कोठे जातो हे तुम्हांला कळत नाही. जो कोणी आत्म्यापासून जन्मलेला आहे त्याचे असेच आहे.

प्रभूचे हे शुभवर्तमान

सर्व : हे ख्रिस्ता  तुझी स्तुती असो. 


चिंतन :-  प्रकाश किंवा उजेड हा संत योहानलिखित शुभवर्तमानाचा एक महत्वाचा विषय मानला जातो. येशू हा जगाचा प्रकाश असून योहान बाप्तिस्ता त्या प्रकाशाविषयी साक्ष देण्यासाठी आला होता असे शुभवर्तमानकार आपल्याला सांगतो. त्यामुळेच येशूकडे येणारी पुष्कळशी माणसे अंधारातून प्रकाशाकडे येत असताना दिसतात. तर त्याच्यापासून दूर जाणारा यहुदा अंधाराकडे जाताना दिसतो. शोमरोनी स्त्री पापाच्या काळोखात होती, जन्मांध मनुष्य शारीरिक व्यंगाच्या काळोखात होता, लाझरस मरणाच्या अंधाऱ्या गुहेत होता असे सर्व लोक येशूच्या उपस्थितीने प्रकाशात येतात. आजच्या शुभवर्तमानातील निकोदेमसही येशूच्या भेटण्यासाठी रात्रीच्या काळोखात येतो कारण त्याला लोकांची भीती वाटत होती आणि परूशी म्हणून समाजात व न्यायसभेत त्याला जे स्थान होते त्याविषयी असुरक्षितता वाटत होती मात्र येशू विषयी त्याला कमालीचा आदर वाटत होता. थोडक्यात तो दोन दगडांवर पाय देऊन उभा होता. माझ्या जीवनात कोणकोणत्या प्रकारचा अंधार आहे ? तो कसा मिटविता येईल ?

प्रार्थना : हे पवित्र आत्म्या, ये आणि आमची अंतःकरणे तुझ्या दानांनी भरून टाक, आमच्या जीवनाचे नुतनीकरण कर, आमेन.