सामान्य काळातील ३१वा सप्ताह
सोमवार
१ नोव्हेंबर २०२१
✝️
देऊळमाता आज सर्व संतांचा सन्मान करीत आहे. ह्या व्यक्ती संतपदाला पोहोचलेले असोत, धन्यवादित असोत, की संतपदाच्या प्रक्रियेत सामावलेले असोत, देऊळमाता त्यांना विशेष मिस्साबलीद्वारे गौरविते. असे करून आपण साहजिकच पवित्र आत्म्याचाच गौरव करीत असतो. कारण त्यानेच सर्वांना परिपूर्णतेकडे जाण्यास सामर्थ्य आणि प्रेरणा दिलेली आहे.
संत थॉमस अक्वायनस म्हणतात, “आपणासाठी मध्यस्थी करावी म्हणून आपण संतांकडे प्रार्थना करणे आवश्यक आहे का?" आणि त्याचे उत्तर देताना तेच म्हणतात,” “देवाचे मार्गच मुळी असे आहेत की आपण संतांच्या मध्यस्थीद्वारे देवाकडे जावे." त्याचा दैवी चांगुलपणा केवळ संतांच्याद्वारे आपल्याला त्याची कृपादाने पुरविण्यास पुरेसा आहे. जर देवाचा कृपाशीर्वाद संतांच्या माध्यमातून आपणापर्यंत पोहोचत असेल तर त्यांच्याच माध्यमातून आपण देवाकडे जावे हे साहजिकच आहे.
ह्याचा अर्थ असा मुळीच नाही की देवाची दया आणि सामर्थ्य ह्यांना मर्यादा आहेत. उलट देवाने निर्माण केलेल्या सृष्टीचा जो क्रम आहे त्यावर अशा मार्गाद्वारे शिक्कामोर्तब केले जाते. निसर्गचक्र हे परस्परावलंबी आहे. जे लहान आणि कमी क्षमतेचे असते त्याला मोठ्या आणि अधिक क्षमतेच्या मदतीची आवश्यकता असते. "सूर्याविना चंद्र प्रकाशू शकत नाही."
संत अल्फोन्सस म्हणतात, संतांच्या जीवनावरून आपल्याला देवाच्या प्रेमाची अगाधता, लांबी, रुंदी, उंची, खोली आणि व्याप्ती कळून येते. त्याबरोबर त्यांच्या जीवनावरून मानवाचे देवावरील एकनिष्ठ आणि त्यागमय प्रेम व्यक्त होते. ते म्हणतात, पावित्र्याची ओढ जो आपल्या मनात बाळगत नाही तो ख्रिस्ती असेल खरा, परंतु तो चांगले ख्रिस्ती जीवन जगूच शकत नाही.
इ.स. १५४८ साली ट्रेंट येथे भरलेल्या जागतिक ख्रिस्ती धर्मपरिषदेमध्ये पुढील शिकवण देण्यात आली; देव आपणाकडून अशक्य अशा गोष्टींची अपेक्षा करीत नाही. त्याचे नियम व कायदे आपल्या कुवतीचा व ऐपतीचा अंत पाहण्यासाठी नसतातच मुळी! जे आपण करू शकत नाही ते तोआपल्याकडून करून घेऊ इच्छित नाही. केवळ त्याच्याच मदतीने व कृपेने आपण संतपदाला पोहोचू शकतो.
अविलाची संत तेरेजा म्हणते, ह्या पृथ्वीतलावरील जीवनातही देव आपल्या चांगल्या इच्छा व हेतूंबद्दल आपल्याला गौरवित असतो.
संत अल्फोन्सस विचारतात “जर आपण देवाशी कुत्सित वृत्तीने आणि कुरकुर करीत वागलो तर त्याच्याकडून आपण श्रेष्ठ कृपादानांची अपेक्षा कशी काय बाळगावी बरे?"संत एफ्राइम आणि संत जॉन क्रिझोस्टोम ह्यांच्या मते, "चौथ्या शतकामध्ये एका विशिष्ट दिवशी सर्व रक्तसाक्ष्यांचा सन्मान करण्यासाठी भाविक देवळामध्ये एकत्र जमत असत. पुढे आठव्या शतकात रोम शहरात हा दिवस १ नोव्हेंबर असा निश्चित करण्यात आला. पोप ग्रेगरी चौथे ह्यांनी त्यानंतर हा दिवस संपूर्ण जगभरच्या ख्रिस्तसभेसाठी सर्व संतांचा सोहळा म्हणून अधिकृतरित्या जाहीर केला." या दिवशी धर्मगुरू आपल्या धर्मग्रामातील सर्व लोकांच्या हेतूंसाठी मिस्सावली अर्पण करतात.
चिंतन: एखादा संत पाहणे किती भाग्याचे! त्या संतांच्या सहवासात राहणे तर सद्भाग्याचे आणि त्याहूनही परमभाग्य संत होण्याचे! -संत अगस्तीन
✝️
पहिले वाचन : प्रकटीकरण ७:२४,९-१४
वाचक : प्रकटीकरण ह्या पुस्तकातून घेतलेले वाचन
"सर्व राष्ट्रे, वंश लोक आणि निरनिराळ्या भाषा बोलणारे ह्यांच्यापैकी कोणाला मोजता आला नाही असा, मोठा लोकसमुदाय माझ्या दृष्टीस पडला.”
मी, योहान ह्याने, एक देवदूत सूर्योदयाच्या दिशेने वर चढताना पाहिला, त्याच्याजवळ जिवंत देवाचा शिक्का होता. ज्या चार देवदूतांकडे पृथ्वीला आणि समुद्राला उपद्रव करण्याचे काम सोपवले होते त्यांना तो उच्च स्वराने म्हणाला, "आमच्या देवाचे जे दास आहेत त्यांच्या कपाळांवर आम्ही शिक्का मारीपर्यंत पृथ्वीला समुद्राला आणि झाडांना उपद्रव करू नका.” ज्यांच्यावर शिक्का मारण्यात आला त्यांची संख्या मी ऐकली, इस्राएल लोकांच्या सर्व वंशापैकी एक लक्ष चव्वेचाळीस हजारांवर शिक्का मारण्यात आला.
ह्यानंतर मी पाहिले तो सर्व राष्ट्र, वंश, लोक आणि निरनिराळ्या भाषा बोलणारे ह्यांच्यापैकी कोणाला मोजता आला नाही असा, शुभ्र लोकसमुदाय राजासनासमोर आणि कोकराच्या पुढे उभा राहिलेला माझ्या दृष्टीस पडला. ते उच्च स्वराने म्हणत होते: “राजासनावर बसलेल्या आमच्या देवाकडून आणि कोकराकडून, तारण आहे." तेव्हा राजासन, वडीलमंडळ आणि चार प्राणी ह्यांच्याभोवती सर्व देवदूत उभे होते, ते राजासनासमोर उपडे पडून देवाला नमन करून म्हणाले : "आमेन. धन्यवाद, गौरव, ज्ञान, उपकारस्तुती, सन्मान, सामर्थ्य आणि बळ ही युगानुयुगे आमच्या देवाची आहत. आमेन."
तेव्हा वडीलमंडळापैकी एकाने मला म्हटले, "शुभ्र झगे परिधान केलेले हे कोण आहेत आणि कोठून आले ?” मी त्याला म्हटले, "प्रभो, हे तुला ठाऊक आहे." तो मला म्हणाला, "मोठ्या संकटातून येतात ते हे आहेत, ह्यांनी आपले झगे कोकराच्या रक्तात धुऊन शुभ्र केले आहेत."
हा प्रभूचा शब्द आहे.
सर्व : देवाला धन्यवाद.
प्रतिसाद स्तोत्र २४: १-६
प्रतिसाद : हे देवा, तुझ्या दर्शनासाठी आतुर असलेले , हेच लोक होत.
१) पृथ्वी आणि तिच्यावरील सर्वकाही परमेश्वराचे आहे,
जग आणि त्यात राहणारे परमेश्वराचे आहेत.
कारण त्यानेच सागरांवर तिचा पाया घातला,
त्यानेच जलप्रवाहांवर तिला स्थिर केले.
२) परमेश्वराच्या पर्वतावर कोण चढेल ?
त्याच्या पवित्र स्थानात कोण उभा राहील?
ज्याचे हात स्वच्छ आहेत आणि ज्याचे मन शुध्द आहे,
जो आपले चित्त असत्याकडे लावत नाही तो.
३) त्याला परमेश्वरापासून आशीर्वाद मिळेल,
आपल्या उध्दारक देवाच्या हातून तो नीतिमान ठरेल.
त्याला शरण जाणारे हेच लोक होत,
हे याकोबाच्या देवा, तुझ्या दर्शनासाठी
आतुर असलेले हेच लोक होत.
दुसरे वाचन १ योहान ३:१-३
वाचक :योहानचे पहिले पत्र यातून घेतलेले वाचन
“परमेश्वर आहे तसाच तो आपल्याला दिसेल."
आपल्याला देवाची मुले हे नाव मिळाले ह्यात पित्याने आपल्याला केवढे प्रीतिदान दिले आहे पाहा आणि आपण तसे आहोच. ह्यामुळे जग आपल्याला ओळखत नाही, कारण त्याने त्याला ओळखले नाही. प्रियजनहो, आपण आता देवाची मुले आहो आणि पुढे आपण काय होऊ हे अजून प्रकट झालेले नाही, तरी ती प्रकट होईल तेव्हा आपण त्याच्यासारखे होऊ हे आपल्याला माहीत आहे, कारण जसा तो आहे तसाच तो आपल्याला दिसेल. जो कोणी त्यासंबंधाने ही आशा बाळगतो तो, जसा शुध्द आहे, तसे आपणाला शुध्द करतो
हा प्रभूचा शब्द आहे
सर्व : देवाला धन्यवाद.
जयघोष
आलेलुया, आलेलुया !
प्रभू म्हणतो, अहो कष्टी आणि भाराक्रांत जनहो, तुम्ही सर्व माझ्याकडे या म्हणजे मी तुम्हांला विसावा देईन.
शुभवर्तमान मत्तय ५: १-१२
वाचक :मत्तयलिखित शुभवर्तमानातून घेतलेले वाचन
“आनंद करा, उल्हास करा, कारण स्वर्गात तुमचे प्रतिफळ मोठे आहे. "
लोकसमुदायाला पाहून तो डोंगरावर चढला आणि तो खाली बसल्यावर त्याचे शिष्य त्याच्याजवळ आले. मग तो तोंड उघडून त्यांना शिकवू लागला:
“जे आत्म्याने दीन ते धन्य, कारण स्वर्गाचे राज्य त्यांचे आहे.
“जे शोक करत आहेत ते धन्य, कारण त्यांचे सांत्वन करण्यात येईल.
“जे सौम्य ते धन्य, कारण ते पृथ्वीचे वतन भोगतील.
“जे नीतिमत्वाचे भुकेले आणि तान्हेले ते धन्य, कारण ते तृप्त होतील.
“जे दयाळू ते धन्य, कारण त्यांच्यावर दया होईल.
“जे अंतःकरणाचे शुध्द ते धन्य, कारण ते देवाला पाहतील.
“जे शांती करणारे ते धन्य, कारण त्यांना देवाची मुले म्हणतील.
“नीतिमत्त्वाकरिता ज्यांचा छळ झाला आहे ते धन्य, कारण स्वर्गाचे राज्य त्यांचे आहे.
“माझ्यामुळे जेव्हा लोक तुमची निंदा आणि छळ करतील आणि तुमच्याविरुध्द सर्व प्रकारचे वाईट लबाडीने बोलतील तेव्हा तुम्ही धन्य. आनंद करा, उल्हास करा, कारण स्वर्गात तुमचे प्रतिफळ मोठे आहे."
प्रभूचे हे शुभवर्तमान
सर्व : हे ख्रिस्ता तुझी स्तुती असो.
चिंतन:पवित्र ख्रिस्तसभा आज सर्व संतांचा सोहळा साजरा करीत आहे. संत हे आपणासाठी दीपस्तंभासारखे आहेत. मानवी जीवन जगण्यासाठी आपल्याला प्रेरणेची व ती प्रेरणा देणाऱ्या आदर्शाची गरज असते. खवळलेल्या खोल सागरात भरकटलेल्या जहाजाला निश्चित दिशा देण्याचे काम दीपस्तंभ करीत असतो. मानवी जीवनात आपण देखील देवाने दिलेल्या धावपट्टीवरून कधी कधी भरकटत असतो. अशावेळी आपल्याला सन्मार्गावर आणण्यासाठी संत हे प्रेरणा ठरत असतात. आपण प्रत्येकांनीपावित्र्याचं जीवन जगावं त्याकरिता ख्रिस्तसभा आपणास नेहमी आव्हान करते. आपल्या जीवनाला पावित्र्यामध्ये जखडून ठेऊन सदासर्वदा हा चेहरा फुलवून ठेवण्यासाठी आजच्या शुभवर्तमानातील येशूने काढलेले उद्गार आपणासाठी प्रेरणास्तोत्र होऊ शकतात. मात्र त्यासाठी संताप्रमाणे मोठ्या संकटातून धैर्याने बाहेर पडणे गरजेचे आहे. इब्री १२:१ मध्ये म्हटल्याप्रमाणे “आपल्याला नेमून दिलेल्या धावपट्टीवरून आपण धीराने धावावे.” त्यासाठी सर्व संताकडून प्रेरणा घेऊन आपण देखील पावित्र्याची वाटचाल सुरू ठेवावी याकरिता सर्व संताकडे प्रार्थना करूया.
प्रार्थना :-सर्व संतांनो आम्हासाठी प्रभूकडे विनंती करा, आमेन. (विशेषत: आपल्या आश्रयदात्या संताच्या मध्यस्थीने प्रार्थना करूया).
सिनडसाठी प्रार्थना
हे पवित्र आत्म्या, तुझ्या नावाने एकत्र येऊन
आम्ही तुझ्यासमोर उभे राहतो.
तू आमचा एकमेव मार्गदर्शक आहेस,
आमच्या हृदयात तू वस्ती कर;
आम्ही पुढे कसे जावे याबद्दल आम्हांला मार्गदर्शन कर
आणि त्या मार्गाशी आम्हांला एकनिष्ठ ठेव.
आम्ही दुर्बळ आणि पापी आहोत;
अस्थिरतेपासून आम्हाला दूर ठेव;
अज्ञानाने आमचा मार्ग भ्रष्ट होऊ देऊ नकोस,
पक्षपाताचा आमच्या कृतीवर प्रभाव पडू देऊ नकोस.
हे पवित्र आत्म्या,
तुझ्यामध्ये आम्हाला आमचे ऐक्य पाहू देः
म्हणजे आम्ही शाश्वत जीवनाकडे एकत्र वाटचाल करू
आणि सत्याच्या व योग्यतेच्या मार्गापासूनआम्ही भरकटणार नाही.
पिता आणि पुत्र ह्यांच्या ऐक्यात
तू सर्वत्र आणि सर्वकाळ कार्य करतोस
त्या तुझ्याकडे हे सर्व आम्ही मागतो, आमेन !
✝️
0 टिप्पण्या