पवित्र आठवडा
बुधवार दि. ०५ एप्रिल २०२३
"मी तुम्हांला सत्य सांगतो, तुमच्यातला एकजण मला धरून देईल.".
✝️
✝️
संत विन्सेंट फेरेर
वर्तनसाक्षी (१३५०-१४१९)
✝️
चिंतन : अनेक व्रतस्थ लोकांना गरिबीचे व्रत आवडते; परंतु त्या व्रताशी संबंधित असलेले दुःख आणि अपमानास्पद वागणूक ते टाळण्याचा प्रयत्न करतात. त्यांना पद व नावलौकिक हवा असतो; परंतु वस्तुस्थितीपासून ते दूर राहतात.- संत विन्सेंट फेरेर
✝️
पहिले वाचन यशया ५०:४-९
वाचक यशया या पुस्तकातून घेतलेले वाचन
“उपमर्द आणि छिः थू यांपासून मी आपले तोंड चुकवले नाही."
यशया म्हणतो, शिणलेल्यांना बोलून धीर कसा द्यावा ते समजावे म्हणून प्रभू परमेश्वराने मला शिष्यांची जिव्हा दिली आहे. तो रोजरोज सकाळी मला जागे करतो, शिष्यांप्रमाणे ऐकावे म्हणून माझे कान उघडले आहेत. मी फितूर झालो नाही, मागे फिरलो नाही. मी मारणाऱ्यांपुढे आपली पाठ केली, केस उपटणाऱ्यांपुढे मी आपले गाल केले. उपमर्द आणि छि: थू यांपासून मी आपले तोंड चुकवले नाही. प्रभू परमेश्वर मला साहाय्य करणार म्हणून मी लज्जित झालो नाही. मी आपले तोंड गारगोटीसारखे केले. माझी फजिती होणार नाही हे मला ठाऊक होते. मला नीतिमान ठरवणारा जवळ आहे. माझ्याबरोबर वाद कोण करणार? आपण समोरासमोर उभे राहू. माझा प्रतिवादी कोण आहे ? त्याने माझ्यापुढे यावे. पाहा, प्रभू परमेश्वर माझा साहाय्यकर्ता आहे. मला दोषी कोण ठरवणार ?
हा प्रभूचा शब्द आहे.
सर्व : देवाला धन्यवाद.
प्रतिसाद स्तोत्र ६९:८- १०, २१-२२,३१.३३-३४
प्रतिसाद : हे देवा, तू आपल्या विपुल दयेस अनुसरून मला उत्तर दे.
१) तुझ्याकरिता मी निंदा सोशिली आहे,
लज्जेने माझे मुख व्याप्त झाले आहे,
मी आपल्या भावांना नवखा,
माझ्या सहोदरांना परका असा झालो आहे.
तुझ्या मंदिराविषयीच्या आवेशाने
मला ग्रासून टाकले आहे,
निंदा करणाऱ्यांनी केलेली तुझी निंदा
माझी निंदा झाली आहे.
२ निंदा होत असल्यामुळे माझे हृदय भग्न झाले आहे,
मी अगदी बेजार झालो आहे.
माझी कीव करणारा कोणी आहे की काय हे मी पाहिले,
पण कोणी आढळला नाही,
माझे कोणी समाधान करील म्हणून मी वाट पाहिली
पण कोणी दिसला नाही.
त्यांनी मला अन्न म्हणून खायला विष दिले,
तहान भागवायला मला आंब दिली.
३. देवाच्या नावाचे मी गीत गाऊन स्तवन करीन,
त्याचे उपकारस्मरण करून त्याचा महिमा वर्णीन.
दीन हे पाहून हर्षतील, देवाचा शोध करणाऱ्यांनो,
तुमच्या हृदयात नवजीवन येवो.
कारण परमेश्वर गरिबांचे ऐकतो,
जयघोष
आपल्या राजाचा जयजयकार असो, पित्याचा तो आज्ञाधारक आहे,
ज्याप्रमाणे दीन कोकरू कत्तल करण्यासाठी नेतात, तसेच आपणांला क्रुसावर देण्यासाठी चालवले आहे.
शुभवर्तमान मत्तय २६:१४-१५
वाचक : मत्तयलिखित पवित्र शुभवर्तमानातून घेतलेले वाचन
"मनुष्याच्या पुत्राविषयी जसे लिहिले आहे तसा तो जातो खरा, परंतु जो मनुष्याच्या पुत्राला धरून देतो, त्या मनुष्याची केवढी दुर्दशा होणार!"
यहुदा इस्कर्योत नावाच्या बारातील एकाने मुख्य याजकाकडे जाऊन म्हटले, "मी त्याला धरून दिले तर मला काय द्याल ?" त्यांनी त्याला तीस शेकेल मोजून दिले. तेव्हापासून तो त्याला धरून देण्याची संधी पाहू लागला.नंतर बेखमीर भाकरीच्या सणाच्या पहिल्या दिवशी शिष्य येशूकडे येऊन म्हणाले, “आपणांकरिता वल्हांडणाच्या भोजनाची तयारी आम्ही कोठे करावी म्हणून आपली इच्छा आहे?" त्याने म्हटले, “नगरात अमुक एका माणसाकडे जाऊन त्याला सांगा की, गुरुजी म्हणतात, माझी वेळ जवळ आली आहे; मी आपल्या शिष्यांसह तुमच्या येथे वल्हांडण सण करतो." मग येशूने सांगितल्याप्रमाणे शिष्यांनी जाऊन वल्हांडणाची तयारी केली.
संध्याकाळ झाल्यावर तो बारा शिष्यांसह भोजनाला बसला आणि ते भोजन करीत असताना त्याने म्हटले, "मी तुम्हांला सत्य सांगतो, तुमच्यातला एकजण मला धरून देईल." तेव्हा ते फार खिन्न झाले आणि प्रत्येकजण त्याला विचारू लागला, “प्रभो, मी तर नाही ना ?" त्याने उत्तर दिले “ज्याने माझ्याबरोबर ताटात हात घातला तोच मला धरून देईल. मनुष्याच्या पुत्राविषयी जसे लिहिले आहे तसा तो जातो खरा; परंतु जो मनुष्याच्या पुत्राला धरून देतो, त्या मनुष्याची केवढी दुर्दशा होणार! तो मनुष्य जन्मला नसता तर ते त्याला बरे झाले असते." त्याला धरून देणारा यहुदा ह्याने विचारले, “गुरुजी, मी तर नाही ना ?" तो त्याला म्हणाला, "होय तूच."
प्रभूचे हे शुभवर्तमान
सर्व : हे ख्रिस्ता तुझी स्तुती असो.
चिंतन: मनुष्याने सारे जग कमावले आणि स्वतःचा आत्मा गमावला तर त्याला काय लाभ ? आजच्या जगासाठी पैसा हे सर्वस्व बनलेले आहे, परंतु हा पैसा आपल्याला खरोखर सार्वकालिक जीवन मिळवून देणार आहे का ? आपल्या कुटुंबातील बालकांना अगदी बालपणापासून पैसे कसे कमवावे हेच आपण शिकवत असतो. तीन वर्षाच्या बालकाला आपण शाळेत पाठवतो. अशासाठी की, त्याने मोठे होऊन पैसा कमवावा. परंतु हा पैसा कमवण्याच्या विचारात आपण विसरून गेलेलो आहोत की, आपण आपल्या मुलाला पैसे कमावण्याची मशीन बनवत आहोत, दुसरे काही नाही. आजच्या शुभवर्तमानात ख्रिस्ताला तीस नाण्यासाठी देखील विकले, अशा ह्या शिष्याला ख्रिस्त म्हणत आहे की, तुझी किती दुर्दशा होणार ? आपली धनदौलत, शिक्षण, पैसा, बँक बॅलेन्स आपल्याला दुर्दशेकडे तर घेऊन जात नाही ना ? ह्याचा विचार आपण प्रत्येकाने करावा, आपल्या पैशाने आपल्याला किती शांती आत्मिक समाधान दिलेले आहे ह्याचा विचार करण्यासाठी आजचे हे शुभवर्तमान आपणांस भाग पाडत आहे.
प्रार्थना : हे प्रभू येशू, तुझ्याशी प्रामाणिक राहण्यास व विश्वासाने तुला अनुसरण्यास आम्हाला प्रेरणा दे, आमेन.
सिनडसाठी प्रार्थना
हे पवित्र आत्म्या, तुझ्या नावाने एकत्र येऊन
आम्ही तुझ्यासमोर उभे राहतो.
तू आमचा एकमेव मार्गदर्शक आहेस,
आमच्या हृदयात तू वस्ती कर;
आम्ही पुढे कसे जावे याबद्दल आम्हांला मार्गदर्शन कर
आणि त्या मार्गाशी आम्हांला एकनिष्ठ ठेव.
आम्ही दुर्बळ आणि पापी आहोत;
अस्थिरतेपासून आम्हाला दूर ठेव;
अज्ञानाने आमचा मार्ग भ्रष्ट होऊ देऊ नकोस,
पक्षपाताचा आमच्या कृतीवर प्रभाव पडू देऊ नकोस.
हे पवित्र आत्म्या,
तुझ्यामध्ये आम्हाला आमचे ऐक्य पाहू देः
म्हणजे आम्ही शाश्वत जीवनाकडे एकत्र वाटचाल करू
आणि सत्याच्या व योग्यतेच्या मार्गापासूनआम्ही भरकटणार नाही.
पिता आणि पुत्र ह्यांच्या ऐक्यात
तू सर्वत्र आणि सर्वकाळ कार्य करतोस
त्या तुझ्याकडे हे सर्व आम्ही मागतो, आमेन !
✝️
0 टिप्पण्या