पुनरुत्थान ७वा सप्ताह
शुक्रवार दि.२६ मे २०२३
“योहानच्या पुत्रा शिमोन, ह्यांच्यापेक्षा तू माझ्यावर अधिक प्रीती करतोस काय?"
✝️
संत फिलीप नेरीचा सण .
आपण आपल्या जीवनातील लहानसहान चुकांची काळजी घेतली पाहिजे. कारण अशा चुकांकडे दुर्लक्ष केल्याने हळूहळू माणसाची पापाविषयी संवेदनक्षमता बोथट बनते आणि मनुष्य आध्यात्मिकदृष्ट्या रसातळाला जातो.
-संत फिलीप नेरी.
फिलीपचा जन्म इटलीतील फ्लॉरेन्स या ठिकाणी झाला. आपले आणि आपल्या या जगाचे पावित्र्य वाढविण्याच्या हेतूने वयाच्या २६ व्या वर्षी त्याने आपला व्यवसाय बंद करून रोमच्या दिशेने प्रयाण केले. तिथे राहून त्याने तत्त्वज्ञान व इशज्ञानाचा अभ्यास केला. विरक्ती प्रायश्चित्त, कडक उपवास आणि प्रार्थनामय जीवन ह्याद्वारे त्याने स्वतःच्या शरीरावर आणि मनावर ताबा मिळविला.
संत फिलीप हा अत्युत्तम असा आध्यात्मिक मार्गदर्शक होता. त्याला अंतर्ज्ञानाची देगणी लाभलेली होती. दिवस उजाडण्यापूर्वी कामाला जाताना दररोज ४० कामगार त्याच्याकडे कुमसारासाठी येत असत. त्यानंतरही ते देवळात कुमसार ऐकण्यासाठी बसत असत. दहा कार्डिनल्स, अनेक धर्मगुरू आणि असंख्य प्रापंचिक लोक त्याच्याकडे नियमितपणे पापनिवेदन करीत. दुपार होण्याआधी अगदी प्रेमाने पवित्र मिस्सा अर्पण करीत. दुपारनंतर ते युवक, आणि मुले ह्यांना शिक्षण देण्यात, त्यांच्यासाठी खेळ घेण्यात आणि सात देवळांना भेटी देण्यात गुंग असत. कुमसाराचे महत्त्व ते केवळ पापक्षमा असे मानीत नव्हते तर आध्यात्मिक मार्गदर्शनाचे एक प्रभावी साधन असे मानीत. त्यामुळे ते आपल्या प्रवचनांद्वारे मुलांना व तरुणांना प्रसन्नता, भक्ती, नम्रता, आणि त्यागवृत्ती इत्यादीचे धडे देत असत.
संत फिलीप आध्यात्मिक सत्ये लोकांच्या मनावर अगदी प्रभावीपणे आणि आगळ्यावेगळ्या पद्धतीने बिंबवित असत. एक मनुष्य नेहमी कम्युनियन घेतल्यानंतर घाईघाईने देवळातून लगेच बाहेर पडत असे. संत फिलीप ह्यांच्या लक्षात आल्यानंतर एके दिवशी या माणसाने कम्युनियन घेताच संत फिलीप ह्यांनी दोन वेदीसेवकांना आपल्या हाती मेणबत्त्या घेऊन त्या माणसाच्या पाठोपाठ पाठविले. ह्या प्रकाराने तो मनुष्य ओशाळला आणि अगदी निवांतपणे पवित्र साक्रामेंताचा आदरसन्मान करू लागला.
दुसरी एक कथा सर्वपरिचित आहे. एका स्त्रीला लोकांची निंदा करण्याची सवय होती. फिलीपने तिच्या हाती पक्ष्याच्या पिसांनी भरलेली पिशवी दिली आणि म्हटले “डोंगराच्या उंच कड्यावरून ही पिसे वाऱ्यावर उडवून दे, ती स्त्री मोठ्या आनंदाने डोंगरमाथ्यावर गेली आणि तिने ती पिसे वाऱ्यावर उडवून दिली.' फिलीपने त्यानंतर तिला सांगितले की, हीच पिसे आता परत गोळा करून आण. ते तर तिला अशक्यच होते. तेव्हा फिलीप तिला म्हणाले, 'जशी ही पिसे गोळा करणे अशक्य आहे तसे तुझ्या तोंडून बाहेर पडलेले शब्द पुन्हा माघारी घेणे अशक्य आहे. तेव्हा शब्द जपून वापर.'
पहिले वाचन प्रेषितांचे कृत्ये २५:१३-२१
वाचक : प्रेषितांचे कृत्ये या पुस्तकातून घेतलेले वाचन
"मृत झालेला येशू जिवंत आहे असे पौल म्हणतो. "
अग्रिप्पा राजा आणि बर्णीका ही दोघे कैसरियास येऊन फेस्ताला भेटली. तेथे ती पुष्कळ दिवस राहिली. तेव्हा फेस्ताने राजापुढे पौलचे प्रकरण काढून म्हटले, “फेलिक्सने बंदीत ठेवलेला एक माणूस येथे आहे. मी येरुशलेममध्ये गेलो होतो तेव्हा त्याच्यावर यहुद्यांच्या मुख्य याजकांनी आणि वडिलांनी फिर्याद करून त्याच्याविरूद्ध ठराव व्हावा म्हणून विनंती केली. त्यांना मी उत्तर दिले की, आरोपी आणि वादी हे समोरासमोरयेऊन आरोपाविषयी प्रत्युत्तर देण्याची आरोपीला संधी मिळण्यापूर्वी कोणालाही शिक्षेकरिता सोपवून देण्याची रोमी लोकांची रीत नाही. ह्यास्तव येथे आल्यावर काही उशीर न करता, दुसऱ्या दिवशी न्यायासनावर बसून मी त्या माणसाला आणावयाचा हुकूम केला. वादी उभे असता ज्या वाईट गोष्टींचा त्याच्याविषयी माझ्या मनात संशय आला होता, त्याबाबत एकही आरोप त्यांनी त्याच्यावर ठेवला नाही; केवळ त्यांच्या धर्माविषयी आणि जो जिवंत आहे म्हणून पौल म्हणतो असा कोणी मृत झालेला येशू, ह्याच्याविषयी ह्याचा आणि त्यांचा वाद होता. तेव्हा ह्याची चौकशी कशी चालवावी हे मला सुचेनासे झाल्यामुळे मी त्याला विचारले, येरुशलेममध्ये जाऊन तेथे ह्या गोष्टीविषयी तुझा न्याय व्हावा अशी तुझी इच्छा आहे काय? तेव्हा बादशहाच्या निकालासाठी मला ठेवावे अशी पौलने मागणी केल्यावरून मी हुकूम केला की, ह्याला कैसराकडे पाठवीपर्यंत कैदेत ठेवावे."
हा प्रभूचा शब्द आहे
सर्व : देवाला धन्यवाद.
प्रतिसाद स्तोत्र १०३:१-२,११-१२,१९-२०
प्रतिसाद : परमेश्वराने आपले सिंहासन आकाशात स्थापले आहे.
१) हे माझ्या जिवा, परमेश्वराचा धन्यवाद कर,
हे माझ्या सर्व अंतर्यामा,त्याच्या पवित्र नामाचा धन्यवाद कर.
हे माझ्या जिवा, परमेश्वराचा धन्यवाद कर,
त्याचे सर्व उपकार विसरू नको.
२) कारण जसे पृथ्वीच्यावर आकाश फार उंच आहे,
तशी त्याची दया त्याचे भय धरणाऱ्यांवर विपुल आहे.
पश्चिमेपासून पूर्व जितकी दूर आहे,
तितके त्याने आमचे अपराध आम्हांपासून दूर केले आहेत.
३) परमेश्वराने आपले सिंहासन आकाशात स्थापले आहे.
त्याचे राज्य सर्वांवर आहे. अहो परमेश्वराच्या दिव्यदूतांनो,
जे तुम्ही बलसंपत्र आहा आणि
त्याचे आज्ञावचन ऐकून त्याप्रमाणे करता,
ते तुम्ही त्याचा धन्यवाद करा.
जयघोष
आलेलुया, आलेलुया !
प्रभू म्हणतो, मी तुम्हांला अनाथ असे सोडणार नाही. मी जात आहे पण पुन्हा तुम्हांकडे येईन आणि तुमची हृदये आनंदाने परिपूर्ण होतील.
आलेलुया !
शुभवर्तमान योहान २१:१५-१९
वाचक : योहानलिखित पवित्र शुभवर्तमानातून घेतलेले वाचन
"माझी कोकरे चार, माझी मेंढरे चार.
न्याहारी झाल्यावर येशूने शिमोन पेत्रला म्हटले, “योहानच्या पुत्रा शिमोन, ह्यांच्यापेक्षा तू माझ्यावर अधिक प्रीती करतोस काय?" तो त्याला म्हणाला “होय, प्रभू, आपणांवर मी प्रेम करतो, हे आपणांला ठाऊक आहे." त्याने त्याला म्हटले, "माझी कोकरे चार." पुन्हा दुसऱ्यांदा तो त्याला म्हणाला, "योहानच्या पुत्रा शिमोन, माझ्यावर प्रीती करतोस काय ?" तो त्याला म्हणाला, "होय प्रभू, मी आपणांवर प्रेम करतो, हे आपणांला ठाऊक आहे." त्याने त्याला म्हटले, "माझी मेंढरे पाळ." तिसऱ्यांदा तो त्याला म्हणाला, “योहानच्या पुत्रा शिमोन, माझ्यावर प्रेम करतोस काय ?" असे तिसऱ्यांदा त्याला म्हटले म्हणून पेत्र दुःखी होऊन त्याला म्हणाला, "प्रभू आपणांला सर्व ठाऊक आहे, मी आपणांवर प्रेम करतो हे आपण ओळखले आहे." येशूने त्याला म्हटले, "माझी मेंढरे चार. मी तुला सत्य सांगतो. तू तरुण होतास तेव्हा स्वतः कंबर बांधून तुझ्या इच्छेस येईल तेथे जात होतास. परंतु तू म्हातारा होशील तेव्हा हात लांब करशील आणि दुसरा माणूस तुझी कंबर बांधून तुझ्या इच्छेस येणार नाही तेथे तुला नेईल. (तो कोणत्या प्रकारच्या मरणाने देवाचा गौरव करील हे सुचविण्याकरिता तो हे बोलला) आणि असे बोलल्यावर त्याने त्याला म्हटले, "माझ्या मागे ये."
प्रभूचे हे शुभवर्तमान
सर्व : हे ख्रिस्ता तुझी स्तुती असो.
चिंतन: मासा सडू लागला की त्याची सुरूवात ही तोंडापासून होते, अशी चिनी भाषेत एक म्हण आहे. पेत्राला ख्रिस्तमंडळाचा प्रमुख म्हणून नेमताना येशू ओळखून होता की, पेत्राच्या जीवनात मानवी दुर्बलता भरली आहे. कठीण प्रसंगी तो भयभीत होईल. आपले सत्व व निष्ठा सोडून देईल. म्हणूनच मरणातून संजीवीत झालेला येशू त्याला एकनिष्ठ राहण्यास आवाहन करीत आहे. पेत्राने भीतीपोटी येशूला तीन वेळा नाकारले होते. याची आठवण देताना येशू त्याला तीन वेळा प्रीतीमध्ये अबाधित राहण्यास सांगत आहे. हे प्रभू येशू आम्ही देखील पेत्राप्रमाणे अनेकदा अविश्वासाने वागतो. म्हणून तुझ्या प्रीतीचा अनुभव आम्हाला दे. तुझ्याठायी दृढ विश्वास आम्हामध्ये राहू दे.
प्रार्थना : हे प्रभू येशू, ख्रिस्तसभेतील आमचे परमगुरूस्वामी, महागुरूस्वामी, धर्मगुरू, धर्मबंधु, धर्मभगिनी व सर्व प्रापंचिक सेवकनेते यांस कार्य करण्यास विशेष कृपा दे, आमेन.
पवित्र आत्म्याचा नोव्हेना प्रार्थना
हे माझ्या परमेश्वरा । पवित्र आत्म्या आम्ही तुला नमन करतो, आम्ही तुझ्याशिवाय काहीही करू शकत नाहीत, । हे तुझ्या दैवी उपस्थितीत आम्ही मान्य करतो हे पवित्र आत्म्या । महान कैवारी, तू गरीबांचा पिता आहेस. तू उत्कृष्ट सांत्वनकर्ता आहेस आमचा तारणारा प्रभू येशू ख्रिस्त । ह्याने आश्वासन दिले होते की मी तुम्हास अनाथ असे सोडणार नाही हे पवित्र आत्म्या आम्ही परमेश्वराच्या प्रेमास अपात्र आहोत । तू प्रभू येशूची आई मरिया व पहिल्या शिष्यांवर पेन्टेकॉस्टच्या दिवशी अवतरलास । व त्यांना तुझ्या दानांनी भरलेस! हे पवित्र आत्म्या त्याच दयेने व दानशूरतेने । त्या दानांचा आम्हावर वर्षाव कर आमच्या अंतःकरणात तुला पसंत नसलेले असे सर्व नष्ट कर व त्यात येऊन तू वस्ती कर आमच्या शाश्वत चांगुलपणासाठी असलेल्या गोष्टी आम्हाला स्पष्ट दिसाव्यात व समजाव्यात म्हणून आमचे मन तुझ्या दैवी प्रकाशाने । उल्हसित कर. हे पवित्र आत्म्या । आमचे अंत:करण । तुझ्या शुध्द प्रेमाने भर । विविध बंधनात जखडून ठेवणाऱ्या आसक्ती आमच्या हृदयातून काढून टाक आम्हाला प्रभू येशूच्या प्रेमाने भर । परमेश्वरी इच्छेला आमच्या जीवनात प्राधान्य असावे । म्हणून पवित्र आशा-आकांक्षांनी जगण्यास आम्हाला प्रेरणा दे । नम्रता, विरक्ती, आज्ञाधारकपणा व ऐहिक जगाच्या मोहापासून दूर राहण्याचा प्रभू येशूने घालून दिलेला आदर्श आमच्या जीवनात व कृतीत उतरविण्यास आम्हाला कृपा दे. । आमेन!
आमच्या स्वर्गीय बापा व तीन नमो मरिया
सिनडसाठी प्रार्थना
हे पवित्र आत्म्या, तुझ्या नावाने एकत्र येऊन
आम्ही तुझ्यासमोर उभे राहतो.
तू आमचा एकमेव मार्गदर्शक आहेस,
आमच्या हृदयात तू वस्ती कर;
आम्ही पुढे कसे जावे याबद्दल आम्हांला मार्गदर्शन कर
आणि त्या मार्गाशी आम्हांला एकनिष्ठ ठेव.
आम्ही दुर्बळ आणि पापी आहोत;
अस्थिरतेपासून आम्हाला दूर ठेव;
अज्ञानाने आमचा मार्ग भ्रष्ट होऊ देऊ नकोस,
पक्षपाताचा आमच्या कृतीवर प्रभाव पडू देऊ नकोस.
हे पवित्र आत्म्या,
तुझ्यामध्ये आम्हाला आमचे ऐक्य पाहू देः
म्हणजे आम्ही शाश्वत जीवनाकडे एकत्र वाटचाल करू
आणि सत्याच्या व योग्यतेच्या मार्गापासूनआम्ही भरकटणार नाही.
पिता आणि पुत्र ह्यांच्या ऐक्यात
तू सर्वत्र आणि सर्वकाळ कार्य करतोस
त्या तुझ्याकडे हे सर्व आम्ही मागतो, आमेन !
✝️
0 टिप्पण्या