सामान्य काळातील 

बाविसावा सप्ताह 

बुधवार 

१ सप्टेंबर २०२१



पवित्र मरियेच्या जन्मदिन नोव्हेना 

 ✝️

आजच्या पहिल्या वाचनात संत पौल कलसैकरांस त्यांच्या प्रभू येशूवरील विश्वासाबद्दल त्यांची प्रशंसा करीत आहे. देवाच्या सत्य वचनात सदैव आपण वाढत राहावे आणि सर्वानी विश्वासाची ढाल घेऊन चालावे, म्हणून संत पौल सर्वांना मार्गदर्शन करीत आहे. आपल्याला मिळालेली ही श्रद्धा फलद्रूप होण्याची अपेक्षा सर्वांकडून आहे.

स्तुती, आराधना व निरंतर प्रार्थना ह्याद्वारे पवित्र आत्म्याठायी आपल्या सर्वांना प्रभू येशूच्या कृपेचा गुणकारी स्पर्श व्हावा म्हणून प्रेरणा मागू या. प्रभूचा प्रेमळ स्पर्श अनुभवून तो आपल्या सभोवतालच्या सर्वांना अनुभवता यावा म्हणून प्रार्थना करु या..
देवाचा शब्द एका चिरकाल टिकणाऱ्या नात्यांसाठी आपणांस आमंत्रण देत असतो. इस्रायली जनतेने ह्यास कराराचे नातेसंबंध असे संबोधिले. एखाद्याला वाटेल की बायबल मध्ये जे काही आहे ते एका विशिष्ट कालखंडासाठी लिहिले होते त्याच्या सध्याच्या जीवनात आपणाला काहीही उपयोग नाही. मात्र तसे मुळीच नाही बायबलमध्ये आपण जे काही वाचतो ते आपल्याला प्रत्येक घटकेत आणि प्रसंगात उपयोगी पडत असते. जीवनाच्या प्रत्येक प्रसंगी आनंददायक आणि दुःखद प्रसंगीही ते आपणाला प्रेरणा देत राहते. त्याच आपणांस दैवी सांत्वन देखिल लाभत असते. 

आपण मरियेच्या जन्मदिन नोव्हेनासाठी एकत्र जमले असताना तिच्याप्रमाणे देवशब्दावरील आपलीही श्रद्धा दैनंदिन जीवनात बळकट व्हावी म्हणून  आपण प्रार्थना करू या.

✝️
पहिले वाचन : कलस्सैकरांस  १:१-८

वाचक : पौलचे कलस्सैकरांस पत्र यातून घेतलेले वाचन

"सुवार्ता तुम्हाकडे आणि सर्व जगाकडे येऊन पोहोचली आहे."

कलस्सै येथील पवित्र जनांना म्हणजे ख्रिस्तातील विश्वास ठेवणाऱ्या बंधूंना, देवाच्या इच्छेने ख्रिस्त येशूचा प्रेषित पौल आणि बंधू तिमथी ह्यांच्याकडूनः  देव आपला पिता ह्याच्यापासून तुम्हांला कृपा आणि शांती असो ख्रिस्त येशूमधील तुमचा विश्वास आणि तुमची सर्व पवित्र जनांवरील प्रीती, ह्यांविषयी ऐकून, आम्ही तुम्हांसाठी जेव्हा प्रार्थना करतो तेव्हा स्वर्गात तुम्हांसाठी राखून ठेवलेल्या आशेमुळे आम्ही सर्वदा आपल्या प्रभू येशू ख्रिस्ताचा पिता देव ह्याची उपकारस्तुती करतो, ह्या आशेविषयी तुम्ही सुवार्तेच्या सत्यवचनाच्या पूर्वी ऐकले. सुवार्ता तुम्हाकडे येऊन पोहोचली आहे. तुम्ही देवाच्या कृपेविषयी ऐकले आणि खरेपणाने तिची माहिती करून घेतली, त्या दिवसापासून जशी तुम्हामध्ये तशीच सर्व जगातही ही सुवार्ता फळ देत आणि वृद्धिंगत होत चालली आहे. एपफ्रास, आमच्या सोबतीचा प्रिय दास, तुमच्या वतीने ख्रिस्ताचा विश्वासू सेवक, त्याच्यापासून तुम्ही ती कृपा अशीच शिकला. आत्म्याच्या योगे उद्भवलेल्या तुमच्या प्रीतीविषयी त्यानेच आम्हांला कळवले.

हा प्रभूचा शब्द आहे. 

सर्व : देवाला धन्यवाद.


प्रतिसाद स्तोत्र  ५२:१०-११

प्रतिसाद :  देवाच्या दयेवर सदासर्वकाळ माझा भरवसा आहे.

१) मी तर देवाच्या घरी हिरव्यागार 
जैतून झाडासारखा असतो.
देवाच्या दयेवर सदासर्वकाळ माझा भरवसा आहे.

२) हे तू घडवून आणले आहेस म्हणून मी 
सर्वकाळ तुझे उपकारस्मरण करीन. 
तुझ्या भक्तासमोर तुझ्या नावाची घोषणा करीन, 
कारण ते उत्तम आहे.


जयघोष
आलेलुया, आलेलुया ! 
प्रभू आपल्या वचनाला जागतो, त्याची प्रत्येक कृती प्रेमाची असते.
 आलेलुया!


शुभवर्तमान लूक ४:३८-४४ 

वाचक : लूकलिखित शुभवर्तमानातून घेतलेले वाचन 

 “मला इतर गावीही देवाच्या राज्याची सुवार्ता सांगितली पाहिजे, कारण त्यासाठीच मला पाठवले आहे.'

येशू सभास्थानातून उठून शिमोनच्या घरी गेला. शिमोनची सासू कडक तापाने पडली होती, तिच्यासाठी त्यांनी त्याला विनंती केली. तेव्हा त्याने तिच्यावर ओणवून तापाला दटावले, तेव्हा तिचा ताप निघाला आणि लगेच ती उठून त्यांची सेवा करू लागली.

सूर्यास्ताच्या वेळी, ज्यांची माणसे नाना प्रकारच्या रोगांनी पिडलेली होती त्यांनी त्यांना त्याच्याकडे आणले आणि त्याने त्यांच्यातील प्रत्येकावर हात ठेवून त्यास बरे केले. "तू देवाचा पुत्र आहेस," असे ओरडत भुतेदेखील पुष्कळ माणसांतून निघाली. त्याने त्यांना धमकावले आणि बोलू दिले नाही, कारण तो ख्रिस्त आहे हे त्यास ठाऊक होते.

दिवस उगवल्यावर तो निघून रानात गेला. तेव्हा लोकसमुदाय त्याचा शोध करत त्याच्याजवळ आला आणि आपणापासून त्याने जाऊ नये म्हणून ते त्याला अडवत होते, परंतु तो त्यांना म्हणाला, मला इतर गावीही देवाच्या राज्याची सुवार्ता सांगितली पाहिजे, कारण त्यासाठीच मला पाठवले आहे.मग तो यहुदियांच्या सभास्थानांमध्ये उपदेश करत फिरला.

प्रभूचे हे शुभवर्तमान

सर्व : हे ख्रिस्ता  तुझी स्तुती असो.

चिंतन: संत लूक प्रभू येशूच्या दिनक्रमाचं वर्णन करतो. सूर्यास्त झाल्यावर अनेक प्रकारच्या व्याधींनी पीडलेले लोक त्याच्याकडे येत. त्यांची नैराश्याने भरलेली दशा पाहून येशूला त्यांचा कळवळा येई. त्याचे करुणेने भरलेले हात त्यांना स्पर्श करीत. त्या सर्वांना आरोग्याचा लाभ होई. “तुम्ही देवबापाची मुलं आहात. देवाच्या राज्यात आनंदाने जगण्याचे तुम्हाला आमंत्रण आहे.” ही आशा मनात ठेवून, नवीन जीवन जगण्यासाठी त्या सर्वांना पाठविले जाई. “मला इतर गावीही देवाच्या राज्याची सुवार्ता सांगितली पाहिजे! कारण त्यासाठी मला देवपित्याने पाठविले आहे.” आज आमच्या गावी सहवास करणाऱ्या दुर्बल बांधवांना सहाय्य करण्यास आम्हाला प्रेरणा लाभो.

प्रार्थना: हे प्रभू येशू, तुझा आरोग्यदायी व मुक्तीचा स्पर्श अनुभवण्यास आमचे अंत:करण तुझ्या कृपेने भरून टाक, आमेन.
    ✝️

पवित्र मरियेच्या जन्मदिन नोव्हेनाची प्रार्थना २०२१

हे परमेश्वरा, आमच्या स्वर्गातील बापा , तुझा पुत्र आमचा प्रभू येशू ख्रिस्त, ह्याला धन्य कुमारी मरियेने जेव्हा जन्म दिला त्या दिवशी आमच्या तारणाची मंगल पहाट उगवली. आम्हाला तिच्या अखंड मध्यस्थीचा लाभ घडावा,त्याने आम्हाला पापांपासून मुक्त केले आणि आम्ही धन्य झालो . पवित्र मरियेचा जन्मदिवस उत्सव साजरा करीत असताना आजा-यांना आरोग्य लाभावे,दुःखितांचे सांत्वन व्हावे,पाप्यांना क्षमा मिळावी, आणि आम्ही ज्या हेतूंसाठी प्रार्थना करीत आहोत तो सफल व्हावा म्हणून आम्हाला सहाय्य कर ,   

(इथे  आपली विनंती सांगावी)

आम्हाकडे दया दृष्टीने पहा, आणि आमची दयाळू माता पवित्र मरिया हिचा आदर्श डोळ्यासमोर ठेवून आम्ही इतरांसाठी तुझ्या कृपेचे साधन बनावेत म्हणून आम्हाला पवित्र आत्म्याची शक्ती दें. तू धन्य कुमारी मरियेसाठी अदभूत कृत्ये केलेली आहेत. शरीर व आत्म्यासह तिला स्वर्गीय वैभवात सहभागी केलेस  ख्रिस्ताच्या वैभवाच्या आशेने तुझ्या लेकरांची हृदये भरून काढ. आमेन.

हे मोत मावले, आम्हासाठी विनंती कर. 

हे वेलंकनी माते, आम्हासाठी विनंती कर. 

हे नित्य सहाय्यक माते, आम्हासाठी विनंती कर.