Marathi Bible Reading | Thursday 2nd September 2021 | 22nd Week in ordinary Time

          सामान्य काळातील 

बाविसावा सप्ताह 

गुरुवार 

२ सप्टेंबर २०२१

पवित्र मरियेच्या जन्मदिन नोव्हेना 

 ✝️

आजच्या शुभवर्तमानात प्रभू येशू आपल्या शिष्यांना सेवाकार्यासाठी आणि देवराज्य पसरविण्यासाठी पाचारण करीत आहे. रात्रभर कष्ट करून समुद्रात काहीच मासळी न लागलेल्या शिमोन पेत्राला प्रभू येशू प्रतिकात्मक पद्धतीने बोलावित आहे. प्रभू येशूने सांगितल्याप्रमाणे जाळे समुद्रात टाकल्यावर जाळ्यात भरपूर मासे आले. तो चमत्कार पाहून पेत्राला आणि त्याच्या सहकाऱ्यांना भिती वाटली मात्र प्रभू येशूने पेत्राला म्हटले, 'भिऊ नकोस, येथून पुढे तू माणसे धरणारा 'होशील!' प्रभू येशूचे सामर्थ्यशाली प्रकटीकरण पाहणाऱ्या पेत्राला आणि त्याचे सोबती तसेच याकोब व योहान ह्या सर्वांना प्रभूने माणसे धरण्यास म्हणजेच देवराज्याची सुवार्ता सांगण्यासाठी पाचारण केले.

प्रभूचे सर्व शिष्य साधी व भोळी माणसे होती. आज प्रभू येशू आपल्या सर्वांना त्याची देवराज्याची सुवार्ता पसरविण्यास आणि सेवाकार्य करण्यास बोलवित आहे. प्रभूचे पाचारण स्वीकारणाऱ्यांच्या जीवनात अमुलाग्र परिवर्तन होत असते. प्रभूच्या आज्ञेप्रमाणे जीवन आचरण करण्यास व देवराज्याची साक्ष देण्यास आपल्याला प्रेरणा व कृपा मिळावी म्हणून प्रभू चरणी नतमस्तक होऊ या. 

प्रार्थना हे दूतर्फी संभाषण आहे. ऐकणे आणि बोलणे. जेव्हा आपण देवशब्द वाचतो तेव्हा देवाला आपल्याशी बोलताना ऐकतो. देवाच्या प्रजेने स्तोत्रे, गिते, वर्णने, म्हणी, काव्य आणि विलाप ह्यांच्याद्वारे केलेल्या विनवण्या पश्चात्ताप, स्तवन आणि मध्यस्थी ह्यांच्यामुळे शास्त्र भावपूर्ण बनते. हाच देवशब्द जेव्हा आपण भक्तिपूर्वक वाचतो तेव्हा तो आपणास चिंतन आणि प्रार्थना करण्यास मदत करतो. हाच शब्द प्रार्थनामय वातावरणात आपल्या अंतःकरणाला स्पर्श करतो. आपले आंतरिक परिवर्तन करण्याचे सामर्थ्य देवशब्दात आहे.  देवशब्दाची प्रतिष्ठा आपणास जोपासता यावी व हा देवशब्द आपल्या प्रार्थनेचा भाग बनावा म्हणून आपण थोडावेळ शांत राहून प्रार्थना करू या.

✝️

पहिले वाचन : कलस्सैकरांस  १:९-१४

वाचक : पौलचे कलस्सैकरांस पत्र यातून घेतलेले वाचन

"देवाने आपल्याला अंधाराच्या सत्तेतून काढून आपल्या प्रिय पुत्राच्या राज्यात आणून ठेवले आहे."

आम्ही तुम्हाविषयी ऐकल्या दिवसांपासून तुम्हांसाठी खंड पडू न देता प्रार्थना करून मागतो की, सर्व अध्यात्मिक ज्ञान आणि बुद्धी ह्यांच्याद्वारे तुम्ही त्याच्या इच्छेसंबंधीच्या पूर्ण ज्ञानाने भरले जावे, तुम्ही सर्व प्रकारे प्रभूला संतोषविण्याकरिता त्याला शोभेल असे वागावे, म्हणजे प्रत्येक प्रकारच्या सत्कार्याचे फळ द्यावे आणि देवाच्या पूर्ण ज्ञानाने तुमची वृद्धी व्हावी. सर्व प्रकारचा धीर आणि सहनशक्ती ही तुम्हांला आनंदासह प्राप्त व्हावी म्हणून त्यांच्या गौरवाच्या पराक्रमानुसार तुम्ही सर्व प्रकारच्या सामर्थ्याने समर्थ व्हावे आणि ज्याने तुम्हांला प्रकाशातील पवित्र जनांच्या वतनाने भागीदार होण्याजोगे केले त्या पित्याची तुम्ही उपकारस्तुती करावी. त्याने आपल्याला अंधाराच्या सत्तेतून काढून आपल्या प्रिय पुत्राच्या राज्यात आणून ठेवले, त्या पुत्राच्या ठायी, खंडणी भरून प्राप्त केलेली मुक्ती म्हणजे आपल्या पापांची क्षमा आपल्याला मिळाली आहे.

हा प्रभूचा शब्द आहे. 

सर्व : देवाला धन्यवाद.

प्रतिसाद स्तोत्र  ९८:२-६

प्रतिसाद :   परमेश्वराने आपले तारण जाहीर केले आहे.

१) परमेश्वराने आपण सिद्ध केलेले 

तारण जाहीर केले आहे, 

राष्ट्रांसमक्ष आपले न्यायीपण प्रकट केले आहे.

 इस्राएलच्या घराण्यावरील आपली दया 

आणि सत्यता यांचे स्मरण केले आहे.

२) पृथ्वीच्या सर्व सीमांनी आमच्या देवाने 

सिद्ध केलेले तारण पाहिले आहे. 

अहो, पृथ्वीवरील सर्व लोकहो, 

परमेश्वराचा जयजयकार करा. 

उच्च स्वराने, आनंदाने गा, त्याची स्तोत्रे गा.

३) परमेश्वराचे गुणगान वीणेवर करा, 

वीणेवर सुस्वर स्तोत्र गा.

कर्णा आणि शिंग वाजवून 

परमेश्वर राजासमोर जयघोष करा.

जयघोष

आलेलुया, आलेलुया ! 

हे येरुशलेम, प्रभूचे गुणगान गा. तो आपले आदेश पृथ्वीवर पाठवतो.

 आलेलुया!

शुभवर्तमान लूक ५:१-११

वाचक : लूकलिखित शुभवर्तमानातून घेतलेले वाचन 

 “सर्व सोडून देऊन ते ख्रिस्ताचे अनुयायी झाले."

लोकसमुदाय येशूजवळ गर्दी करून देवाचे वचन ऐकत असता तो गनसरेत सरोवराच्या किनाऱ्याशी उभा होता. तेव्हा त्याने सरोवराच्या किनाऱ्याला लागलेले दोन मचवे पाहिले; त्यांवरील कोळी खाली उतरून जाळी धूत होते. त्या मचव्यांपैकी एक शिमोनचा होता, त्यावर चढून तो किनाऱ्यापासून थोडासा आत लोटावा म्हणून त्याने त्याला सांगीतले. मग तो मचव्यात बसून समुदायांना शिक्षण देऊ लागला. आपले बोलणे संपल्यावर त्याने शिमोनला म्हटले, “खोल पाण्यात हाकार, मग मासे धरण्यासाठी तुम्ही आपली जाळी खाली सोडा.” शिमोनने त्याला उत्तर दिले, “गुरुजी, आम्ही सारी रात्र कष्ट करून काही धरले नाही, तरी आपल्या सांगण्यावरून मी जाळी सोडतो." मग त्यांनी तसे केल्यावर माशांचा मोठा घोळका जाळ्यात सापडला आणि त्यांची जाळी फाटू लागली, तेव्हा त्यांचे जे साथीदार दुसऱ्या मचव्यात होते त्यांनी येऊन आपणाला सहाय्य करावे म्हणून. त्यांनी त्यांना खुणाविले. मग तो आल्यावर दोन्ही मचवे इतके भरले की ते बुडू लागले. हे पाहून शिमोन पेत्र येशूच्या पाया पडून म्हणाला, “प्रभो, माझ्यापासून जा, कारण मी पापी मनुष्य आहे.” कारण त्यांनी धरलेल्या माशांचा घोळका पाहून तो आणि त्याच्याबरोबर असलेले सर्वजण विस्मित झाले होते; तसेच शिमोनचे भागीदार, जब्दीचे मुलगे याकोब आणि योहान हेही विस्मित झाले होते. तेव्हा येशू शिमोनला म्हणाला, “भिऊ नकोस, येथून पुढे तू माणसे धरणारा होशील." मग मचवे किनाऱ्याला लावल्यावर सर्व सोडून देऊन ते त्याचे अनुयायी झाले.

प्रभूचे हे शुभवर्तमान

सर्व : हे ख्रिस्ता  तुझी स्तुती असो.

चिंतन: मासेमारीमध्ये निष्णात असलेला पेत्र येशूला म्हणतो, सारी रात्र आम्ही कष्ट केले, परंतु आमचे कष्ट फोल ठरले. आता केवळ तुझ्या शब्दावर विसंबून पुन्हा जाळी सोडत आहोत. यावेळी मात्र पेत्र व त्याचे साथीदार यांना भरपूर यश मिळाले. मानवी प्रयत्न अपुरे पडतात परंतु देवाला सर्वकाही शक्य आहे. हा दृढ विश्वास पेत्राला ख्रिस्तसभेचे नेतृत्व करण्यास धैर्य देतो. गेल्या वर्षी कोरोना विषाणूच्या साथीने आम्ही भयभीत झालो होतो. त्यातून निभावून जाण्यासाठी शासनाचे व सर्व धार्मियांचे सहकार्य मिळाले. आपले बिशप्स व सर्व सेवाभावी संस्थांनी या संकटाला तोंड देण्यासाठी अविरत प्रयत्न केले. “चला पुन्हा जाळी खोल पाण्यात सोडा.” हे ख्रिस्ताचे शब्द आम्हा सर्वांच्या हृदयांना उभारी देत राहिले.

प्रार्थना:  हे प्रभू येशू, तुझ्या वचनात वाढण्यास व देवराज्याची सुवार्ता घोषविण्यास आम्हाला प्रेरणा व बळ दे, आमेन.

    ✝️

पवित्र मरियेच्या जन्मदिन नोव्हेनाची प्रार्थना २०२१

हे परमेश्वरा, आमच्या स्वर्गातील बापा , तुझा पुत्र आमचा प्रभू येशू ख्रिस्त, ह्याला धन्य कुमारी मरियेने जेव्हा जन्म दिला त्या दिवशी आमच्या तारणाची मंगल पहाट उगवली. आम्हाला तिच्या अखंड मध्यस्थीचा लाभ घडावा,त्याने आम्हाला पापांपासून मुक्त केले आणि आम्ही धन्य झालो . पवित्र मरियेचा जन्मदिवस उत्सव साजरा करीत असताना आजा-यांना आरोग्य लाभावे,दुःखितांचे सांत्वन व्हावे,पाप्यांना क्षमा मिळावी, आणि आम्ही ज्या हेतूंसाठी प्रार्थना करीत आहोत तो सफल व्हावा म्हणून आम्हाला सहाय्य कर ,   

(इथे  आपली विनंती सांगावी)

आम्हाकडे दया दृष्टीने पहा, आणि आमची दयाळू माता पवित्र मरिया हिचा आदर्श डोळ्यासमोर ठेवून आम्ही इतरांसाठी तुझ्या कृपेचे साधन बनावेत म्हणून आम्हाला पवित्र आत्म्याची शक्ती दें. तू धन्य कुमारी मरियेसाठी अदभूत कृत्ये केलेली आहेत. शरीर व आत्म्यासह तिला स्वर्गीय वैभवात सहभागी केलेस  ख्रिस्ताच्या वैभवाच्या आशेने तुझ्या लेकरांची हृदये भरून काढ. आमेन.

हे मोत मावले, आम्हासाठी विनंती कर. 

हे वेलंकनी माते, आम्हासाठी विनंती कर. 

हे नित्य सहाय्यक माते, आम्हासाठी विनंती कर.