Marathi Bible Reading | Epiphany of the Lord | Sunday 2nd January 2022

प्रभू येशूचे प्रकटीकरण 

 रविवार  दि. २ जानेवारी  २०२२

✝️ 

“ “राष्ट्रे तुझ्या प्रकाशाकडे येतील."

मागी लोक पूर्वेकडून यरुशलेम येथे आले

✝️   

आज ख्रिस्तसभा प्रभू येशूच्या प्रकटीकरणाचा म्हणजेच तीन ज्ञानीराजे येशूला बाळाला भेटण्यास येतात त्यांचा सण साजरा करीत आहे. प्रभू येशू जगाचा प्रकाश आहे. त्या प्रकाशाचे रहस्य आज प्रकट करण्यात आले. ह्या रहस्यावर आपण आज चिंतन करु या. हा दैवी प्रकाश म्हणजेच प्रभू येशू आपल्या जीवनाचा प्रकाश स्रोत आहे. प्रकाशाचे रहस्य तीन प्रकारे सांगता येते. मागी पुरुषांनी तारा पाहिला. तारा हे निसर्गाचे चिन्ह आहे. आपण देवाचे अस्तित्व सभोवतालचा निसर्गात शोधायला हवे. तो तारा  यरुशलेमेत दिसला नाही कारण हेरोदाने तेथे रक्तपात घडवून आणला होता. मागी पुरुषांनी येरुशलेमच्या लोकांना यहुद्यांच्या राजाच्या जन्माविषयी विचारले  आणि मेरी व योसेफ ह्यांच्या कुंटुंबात त्यांना ख्रिस्त सापडला. आपल्याला अनपेक्षित अशाच ठिकाणी ख्रिस्त सापडेल. येरुशलेमेतील मुख्य याजक आणि शास्त्री ह्यांनी त्यावेळी शास्त्र उघडले. मिखाच्या ग्रंथातील वचनानुसार येशूचा जन्म बेथलेहेमात होणार असल्याचे सांगण्यात आले. मागी ज्ञानी पवित्र  शास्त्रावर विश्वास ठेवून त्याचा शोध केला व येशू त्यांना सापडला.

निसर्गातील तारा, सामान्यजनता आणि पवित्र शास्त्र अशा तीन माध्यमाने प्रकाशाचा उलगडा झाला व तारणाऱ्याचे प्रकटीकरण झाले. आपण सुद्धा  तारणाऱ्याचा खऱ्या अर्थाने शोध घेऊ व त्याला आपले सर्वस्व समर्पण करु या. ! 

✝️   

पहिले वाचन यशया  ६०:१-६

वाचक :यशयाच्या पुस्तकातून घेतलेले वाचन

“परमेश्वराचे तेज तुझ्यावर उदय पावले आहे."

ऊठ, प्रकाशमान हो, कारण प्रकाश तुझ्याकडे आला आहे. परमेश्वराचे तेज तुझ्यावर उदय पावले आहे. पाहा, अंधकार पृथ्वीला झाकत आहे. निबिड काळोख राष्ट्रांना झाकत आहे, पण तुझ्यावर परमेश्वर उदय पावत आहे. त्याचे तेज तुझ्यावर दिसत आहे. राष्ट्रे तुझ्या प्रकाशाकडे येतील. राजे तुझ्या उदयप्रभेकडे येतील. तू आपले डोळे वर करून चोहोकडे पाहा. ते सर्व एकत्र होत आहेत. तुझ्याकडे येत आहेत. तुझे पुत्र दुरून येत आहेत. तुझ्या कन्यांना कडेवर बसवून आणत आहेत. हे पाहशील तेव्हा तुझ्या मुखावर आनंद चमकेल तुझ्या हृदयाला स्फुरण येऊन ते विकास पावेल, कारण समुद्राकडून विपुल धन तुझ्याकडे लोटेल. राष्ट्राची संपत्ती तुझ्याकडे येईल. उंटांच्या झुंडी, मिद्यान व एफ्रा येथील तरुण उंट तुला व्यापून टाकतील. सर्व लोक सोने व ऊद घेऊन शबा येथून येतील. परमेश्वराचा आनंदभराने गुणानुवाद करतील.

हा प्रभूचा शब्द आहे. 

सर्व : देवाला धन्यवाद.

प्रतिसाद स्तोत्र  ७२:१-२,७-८,१०-१३

प्रतिसाद :  प्रभो, सर्व राष्ट्र, तुला दंडवत घालतील.

१) हे देवा, तू आपले न्यायानुशासन राजाला दे. 

राजपुत्राला आपली धर्मनीती शिकव. 

तो नीतीने तुझ्या लोकांचा न्याय करील, 

तुझ्या दीनांचा निवाडा न्यायबुद्धीने करील.

२) त्याच्या काळी धार्मिक उत्कर्ष पावतील 

आणि चंद्र नाहीसा होईपर्यंत विपुल शांती असेल. 

समुद्रापासून महासागर आणि 

नदीपासून पृथ्वीच्या दिगंतापर्यंत तो प्रभुत्व चालवील.

३) तार्शीश व द्वीपे यांचे राजे नजराणे आणतील. 

शबा व सबा यांचे राजे खंडणी देतील. 

सर्व राजे त्याला दंडवत घालतील. 

सर्व राष्ट्रे त्याची सेवा करतील.

४) कारण धावा करणाऱ्या दरिद्री, 

दीन व अनाथ यांना तो सोडवील. 

दुबळ्यांवर तो दया करील, दरिद्र्यांचे जीव तो तारील.

दुसरे वाचन इफिसकरांस पत्र ३:२-३,५-६

वाचक : पौलचे इफिसकरांस पत्र यातून घेतलेले वाचन 

“परराष्ट्रीय त्याच अभिवचनाचे वाटेकरी आहेत असे प्रकट झाले आहे. "

देवाची जी कृपा तुम्हांसाठी मलां प्राप्त झाली तिच्या व्यवस्थेविषयी तुम्ही ऐकले असेल, म्हणजे प्रकटीकरणाच्याद्वारे मला रहस्य कळविले गेले. त्याप्रमाणे मी जे थोडक्यात वर लिहिले आहे ते रहस्य जसे आता आत्म्याच्याद्वारे त्याच्या पवित्र प्रेषितांना व संदेष्ट्यांना प्रकट करून दाखवलेले आहे तसे ते इतर पिढ्यांच्या मनुष्य संतानांना कळविण्यात आले नव्हते. ते रहस्य हे की, परराष्ट्रीय लोक ख्रिस्त येशूच्या ठायी सुवार्तेच्या योगाने आम्हांबरोबर वतनबंधू, आम्हांबरोबर एकशरीर व आम्हांबरोबर अभिवचनाचे वाटेकरी आहेत.

हा प्रभूचा शब्द आहे. 

सर्व : देवाला धन्यवाद.

जयघोष

आलेलुया, आलेलुया ! 

आम्ही पूर्व दिशेस त्याचा तारा पाहूनत्याला नमन करायला आलो आहोत..

 आलेलुया!

शुभवर्तमान मत्तय  २:१-१२ 

वाचक :  मत्तयलिखित शुभवर्तमानातून घेतलेले वाचन २:१-१२ .

"आम्ही त्याचा तारा पाहून त्याला नमन करायला आलो आहोत."

राजा हेरोदच्या अमदानीत, यहूदिया प्रांतातल्या बेथलेहेम येथे येशूचा जन्म झाला. त्याच्या जन्मानंतर काही मागी लोक पूर्वेकडून यरुशलेम येथे आले आणि विचारपूस करू लागले. “यहुद्यांचा राजा जन्माला आला आहे. तो कुठे आहे? आम्ही त्याचा तारा उगवलेला पाहिला म्हणून त्याला मुजरा करायला आम्ही आलोत.”हे ऐकताच राजा हेरोद आणि त्याबरोबर सारे यरुशलेम घाबरून गेले. त्याने यहुद्यांचे प्रमुख पुरोहित व शास्त्री जमवले आणि त्यांना विचारले, "ख्रिस्ताचा जन्म कुठे व्हायचा आहे ?” “यहुदियातल्या बेथलेहेम" येथे ते म्हणाले; कारण संदेष्ट्यांने लिहिले आहे. "यहुदा प्रांतातल्या बेथलेहेमा, यहुदाच्या सत्ताधीशापेक्षा तू मुळीच कनिष्ठ नाहीस; कारण तुझ्यातूनच एक नेता उदयाला येईल. आणि तो माझ्या इस्राएल लोकांचा प्रतिपालक होईल."

मग हेरोदाने त्या पूर्वेकडल्या मागी लोकांना गुपचूप बोलावून घेतले आणि तारा नक्की केव्हा दिसू लागला याची वेळ विचारून घेतली. नंतर त्यांना बेथलेहेमला जाण्यास सांगून तो म्हणाला, “तुम्ही जा आणि त्या बाळाचा बारकाईने शोध करा. त्याचा पत्ता लागला की मला खबर द्या, म्हणजे मीपण येऊन त्याला मुजरा करीन.” 

राजाच्या सांगण्याप्रमाणे ते निघाले. जाता जाता त्यांना पूर्वी जो तारा पूर्वेस उगवलेला दिसला होता तो पुन्हा दिसू लागला. तो त्यांच्या पुढे पुढे जात होता. मग जेथे ते बाळ होते तेथे तो वर थांबला. तारा पाहून त्यांना खूपच आनंद झाला होता. ते घरात गेले तेव्हा ते बाळ आपली आई मरिया हिच्याजवळ असलेले त्यांना आढळले. बाळाच्या पायावर डोके ठेवून त्यांनी त्याला नमन केले. आपल्या थैल्या सोडून त्याला सोने, ऊद व गंधरस यांचे नजराणे दिले. मग ‘हेरोदाकडे परत जाऊ नका,' अशी स्वप्नात सूचना मिळाल्यामुळे ते दुसऱ्या वाटेने आपल्या देशाला निघून गेले.

प्रभूचे हे शुभवर्तमान

सर्व : हे ख्रिस्ता  तुझी स्तुती असो.

चिंतन: प्रभू येशू ख्रिस्त जरी बेथलेहेम येथे जन्माला आलेला असला, तो दाविदाच्या घराण्यात, यहुदा वंशात आणि यहुदी धर्मात व समाजात जरी जन्मलेला असला तरी सर्वांसाठी या जगात आलेला होता. हे सत्य आजच्या सोहळ्याद्वारे ख्रिस्तसभा साजरे करते. त्यासाठी आजच्या वाचनांमध्ये प्रकाशाचे प्रतिक वापरण्यात आलेले आहे. तीन प्रकारच्या लोकांनी हे प्रकटीकरण अनुभवले : 

१. बाबिलोनहून परतलेले इस्राएली लोकः जगाच्या कल्याणास संतांच्या विभूती किंवा “बुडती हे जन न देखवे डोळा” ह्या उक्तीनुसार जेव्हा जेव्हा इस्राएली लोकांच्या जीवनात अडी-अडचणी व संघर्षमय परिस्थिती निर्माण झाली तेव्हा तेव्हा परमेश्वराने यशया, यिर्मया, यहेज्केल यासारखे संदेष्टे त्यांच्याकडे पाठविले. त्यांनी लोकांना निराशेच्या काळोखातून बाहेर पडण्यास मदत केली. आजच्या पहिल्या वाचनात यशया संदेष्टा लोकांसमोर असेच एक उज्ज्वल भविष्याचे स्वप्न सादर करतो. त्या स्वप्नात सर्वप्रकारचे लोक, राष्ट्रे, स्त्रिया, पुरुष, राजे, उंट, सोने, ऊद अशा सर्वांचा उल्लेख करण्यात आलेला आहे. ख्रिस्ताच्या प्रकट होण्याने ह्या सर्वांना एक नवा प्रकाशझोत लाभला, असे संदेष्टा म्हणतो. 

२. विविध धर्मियांच्या विळख्यात सापडलेली इफिस येथील ख्रिस्तमंडळी : इफिसची अर्तमी (म्हणजे डायना देवी) थोर अशा घोषणांनी सदैव दुमदुमणारे एक मंदिर इफिसमध्ये होते. तेथील धर्मगुरू व संदेष्टे लोकांना देवाच्या नावाने पारमर्थिक स्वरूपाचा संदेश देत. अशा पार्श्वभूमीवर आपल्याला झालेले प्रकटीकरण अस्सल आहे असा दावा पौल करतो. हे प्रकटीकरण सर्वांसाठी विशेषतः परराष्ट्रीयांसाठी आहे असे तो स्पष्ट करतो. ३. राजाच्या शोधात असलेले तीन राजे : तीन मागी लोकांनी (परराष्ट्रीय) ताऱ्याचा मागोवा घेत येरूशलेमपर्यंत प्रवास केला. बायबलमधील भाकित ऐकून ते बेथलेहेमला गेले. येशूबाळाचे दर्शन झाल्यानंतर देवदूतांच्या सूचनेनुसार ते दुसऱ्या मार्गाने आपल्या देशास गेले. ह्या संपूर्ण प्रवासात निसर्ग, बायबल, लोक, देवदूत आणि साक्षात पवित्र कुटुंब ही त्यांच्यासाठी प्रकटीकरणाची विविध साधने बनली. 

आत्मपरीक्षण: येशू सर्वांसाठी जन्मला हे सत्य माझ्या इतरांशी असलेल्या संबंधावर, सुवार्ता प्रसार कार्यावर, मला होणाऱ्या प्रकटीकरणावर व इतर धर्माकडे पाहण्याचा माझा जो दृष्टिकोण आहे त्यावर कोणता प्रकाश पाडते ?

सिनडसाठी प्रार्थना

हे पवित्र आत्म्या, तुझ्या नावाने एकत्र येऊन  

आम्ही तुझ्यासमोर उभे राहतो.

तू आमचा एकमेव मार्गदर्शक आहेस, 

आमच्या हृदयात तू वस्ती कर; 

आम्ही पुढे कसे जावे याबद्दल आम्हांला मार्गदर्शन कर 

आणि त्या मार्गाशी आम्हांला एकनिष्ठ ठेव.

आम्ही दुर्बळ आणि पापी आहोत; 

अस्थिरतेपासून आम्हाला दूर ठेव; 

अज्ञानाने आमचा मार्ग भ्रष्ट होऊ देऊ नकोस, 

पक्षपाताचा आमच्या कृतीवर प्रभाव पडू देऊ नकोस.

हे पवित्र आत्म्या,

तुझ्यामध्ये आम्हाला आमचे ऐक्य पाहू देः 

म्हणजे आम्ही शाश्वत जीवनाकडे एकत्र वाटचाल करू 

आणि सत्याच्या व योग्यतेच्या मार्गापासूनआम्ही भरकटणार नाही.

पिता आणि पुत्र ह्यांच्या ऐक्यात 

तू सर्वत्र आणि सर्वकाळ कार्य करतोस 

त्या तुझ्याकडे हे सर्व आम्ही मागतो, आमेन !

✝️