आगमनकाळातील तिसरा सप्ताह
शुक्रवार १६ डिसेंबर २०२२
जी कार्ये मी करतो तीच माझ्याविषयी साक्ष देतात की, पित्याने मला पाठवले आहे.
✝️
संत ऍडलेड विधवा हिचा सणं
आपण आगमनकाळातील तिसऱ्या आठवड्यात आहोत. आजच्या शुभवर्तमानात प्रभू येशू योहान बाप्तिस्ताचे उदाहरण देऊन स्पष्ट करीत आहे की, जशी योहानाने सत्याविषयी साक्ष दिली तसेच आपण आपल्या जीवनाद्वारे त्याची साक्ष द्यावी. प्रभू येशू तारणारा असून त्याचे न्यायत्व प्रकट होणार आहे कारण तारण जवळ आले आहे. आपण त्याच्या स्वागतास तयार असावे म्हणून त्याचे देवत्व स्वीकारावे. आपल्या तन, मन, धनानिशी त्याचे आपल्या जीवनात स्वागत करण्यास सिद्ध असावे. प्रभू येशूने नम्रता, प्रेम, करूणा, परोपकार, सेवा, क्षमा व शांतीचा मार्ग आपणास सांगितला आहे.
✝️
पहिले वाचन यशया ५६: १-३,६-८
वाचक :यशया या पुस्तकातून घेतलेले वाचन
"माझ्या मंदिराला सर्व राष्ट्रांसाठी प्रार्थनामंदिरअसे म्हणतील."
“परमेश्वर म्हणतो, न्यायाचे पालन करा. धर्माचरण करा, कारण माझे तारणकार्य जवळ आले आहे, माझे. न्याय्यत्व प्रकट व्हायला आले आहे. जो मानव हे करतो आणि मानवपुत्राला धरून राहतो, जो शब्बाथ पाळतो, काही अपवित्र करीत नाही, जो कोणतेही दुष्कर्म करण्यापासून आपला हात आवरतो तो धन्य." जो विदेशी परमेश्वरचरणी जडला आहे तो असे न म्हणो की, 'परमेश्वर आपल्या लोकांतून माझा उच्छेद करील.'
तसेच परमेश्वराची सेवा करण्यासाठी, त्याच्या नावाची आवड धरण्यासाठी आणि त्याचे सेवक होण्यासाठी जे विदेशी त्याच्या चरणी जडले आहेत, त्यातील जे कोणी शब्बाथ अपवित्र न करावा म्हणून जपतात व माझा करार दृढ धरून राहतात, त्यांना मी आपल्या पवित्र पर्वतावर आणीन आणि माझ्या प्रार्थनामंदिरात त्यांना हर्षित करीन; माझ्या वेदीवर केलेले त्यांचे होम आणि यज्ञ मला पसंत होतील; कारण माझे मंदिर हे सर्व राष्ट्रांसाठी प्रार्थनामंदिर आहे असे म्हणतील. घालवून दिलेल्या इस्राएल लोकांना एकत्र आणणाऱ्या प्रभू परमेश्वराचे हे वचन आहे की, एकवटलेल्या इस्राएलांखेरीज इतरांनाही एकत्र करून मी त्यांच्यात मिळवीन.
हा प्रभूचा शब्द आहे.
सर्व : देवाला धन्यवाद.
प्रतिसाद स्तोत्र ६७:२-३, ५, ७-८
प्रतिसाद : हे देवा, राष्ट्रे तुला धन्यवाद देवोत
१)देवाने आमच्यावर दया करावी.
आम्हाला आशीर्वाद द्यावा.
त्याची तेजस्वी मुद्रा आमच्याकडे वळलेली असावी.
मग साऱ्या विश्वाला तुझी इच्छा कळेल.
तू देत असलेली मुक्ती सगळ्या राष्ट्रांना दिसेल.
२) राष्ट्रांना आनंद होवो, ती आनंदाने गावोत.
कारण तू लोकांना योग्य न्याय देशील
भूतलावरील राष्ट्रांना मार्गदर्शन करशील.
३) जमिनीने आपले उत्पन्न दिले आहे.
देवाने, आमच्या देवाने आम्हाला आशीर्वाद दिला आहे.
देवाने आम्हांला आशीर्वाद द्यावा.
पृथ्वीच्या पाठीवरले सगळेजण त्याचे भय बाळगोत.
जयघोष
आलेलुया, आलेलुया !
हे परमेश्वरा, तुझ्या दयेचा आम्हांला अनुभव दे.
तू सिद्ध केलेले तारण आम्हांला प्रदान कर.
आलेलुया!
शुभवर्तमान योहान ५:३३-३६
वाचक : योहानलिखित शुभवर्तमानातून घेतलेले वाचन
"योहान जळता आणि प्रकाश देणारा दिवा होता."
येशूने यहुद्यांना विचारले "तुम्ही योहानकडे माणसे पाठवून विचारले आणि त्याने सत्याविषयी साक्ष दिली आहे. पण मी माणसांची साक्ष मान्य करीत नाही; तथापि तुम्हांला तारण प्राप्त व्हावे म्हणून मी हे सांगतो. तो जळता आणि प्रकाश देणारा दिवा होता आणि तुम्ही त्याच्या प्रकाशात काही वेळ हर्ष करावयास राजी झाला; परंतु माझ्याजवळ जी साक्ष आहे ती योहानच्या साक्षीपेक्षा मोठी आहे, कारण जी कार्ये सिद्धीस नेण्याचे पित्याने माझ्याकडे सोपवले आहे, म्हणजे जी कार्ये मी करतो तीच माझ्याविषयी साक्ष देतात की, पित्याने मला पाठवले आहे.
वाचक : प्रभूचे हे शुभवर्तमान .
सर्व : हे ख्रिस्ता तुझी स्तुती असो.
चिंतन : आगमन काळात परमेश्वर त्याच्या लोकांना त्याच्याजवळ ओढून घेण्यासाठी येत असतो. त्याच्या आगमनासाठी आपली जय्यत तयारी असणे गरजेचे आहे. आजच्या पहिल्या वाचनात यशया संदेष्टा ही तयारी आपण कशी करावी याविषयी माहिती देतो. तो म्हणतो की, परमेश्वराला प्रसन्न करायचे असेल तर न्यायाने, सचोटीने आणि प्रामाणिकपणे आचरण करा. याचाच दुसरा अर्थ म्हणजे अधर्म आणि दुष्कृत्यांचा त्याग करणे होय. जेव्हा आपल्या अख्रिस्ती बांधवांना आपल्यात हा गुणविशेष आढळेल तेव्हाच खऱ्याखुऱ्या अर्थाने त्याचेसुद्धा तारण जवळ आले आहे. शुभवर्तमानात आपणऐकतो की, योहान बाप्तिस्ता आपल्या उत्तम | आचरणामुळे लोकांना ख्रिस्ताकडे वळण्यासाठी प्रवृत्त करतो. ख्रिस्ताकडे वळण्यासाठी आपण आपल्या दुष्कृत्यांमुळे अख्रिस्ती बांधवांसाठी अडथळा आहोत काय ?
प्रार्थना : हे प्रभू येशू, प्रामाणिकपणे सत्य आचरण करून तुझी साक्ष जगाला देण्यास प्रेरणा मिळावी म्हणून आम्हाला तुझा सामर्थ्याचा पवित्र आत्मा बहाल कर, आमेन.
सिनडसाठी प्रार्थना
हे पवित्र आत्म्या, तुझ्या नावाने एकत्र येऊन
आम्ही तुझ्यासमोर उभे राहतो.
तू आमचा एकमेव मार्गदर्शक आहेस,
आमच्या हृदयात तू वस्ती कर;
आम्ही पुढे कसे जावे याबद्दल आम्हांला मार्गदर्शन कर
आणि त्या मार्गाशी आम्हांला एकनिष्ठ ठेव.
आम्ही दुर्बळ आणि पापी आहोत;
अस्थिरतेपासून आम्हाला दूर ठेव;
अज्ञानाने आमचा मार्ग भ्रष्ट होऊ देऊ नकोस,
पक्षपाताचा आमच्या कृतीवर प्रभाव पडू देऊ नकोस.
हे पवित्र आत्म्या,
तुझ्यामध्ये आम्हाला आमचे ऐक्य पाहू देः
म्हणजे आम्ही शाश्वत जीवनाकडे एकत्र वाटचाल करू
पिता आणि पुत्र ह्यांच्या ऐक्यात
तू सर्वत्र आणि सर्वकाळ कार्य करतोस
त्या तुझ्याकडे हे सर्व आम्ही मागतो, आमेन !
✝️
0 टिप्पण्या