सामान्यकाळातील दुसरा सप्ताह
शुक्रवार दि.२० जानेवारी २०२३
(ख्रिस्ती ऐक्य सप्ताह) (१८ ते २५ जानेवारी)
पहिले वाचन : इब्री ८:६-१३
वाचक : इब्री लोकांस पत्र यातून घेतलेले वाचन
तो पहिला करार निर्दोष असता, तर दुसरा शोधण्याचा प्रसंग आला नसता. आता ज्या कराराचा मध्यस्थ येशु आहे तो अधिक चांगल्या अभिवचनांनी स्थापित असल्यामुळे जेवढ्या प्रमाणात तो अधिक चांगला आहे तेवढ्या प्रमाणात अधिक श्रेष्ठ सेवा येशूला मिळाली आहे.
लोकांना दोष लावून तो म्हणतो: "परमेश्वर म्हणतो, पाहा, असे दिवस येत आहेत की, त्यात इस्राएलचे घराणे आणि यहुदाचे घराणे ह्यांच्याबरोबर मी नवा करार करीन;
मी त्यांच्या पूर्वजांचा हात धरून त्यांना मिसर देशातून बाहेर आणले, त्या दिवशी मी त्यांच्याशी केलेल्या करारासारखा हा करार असणार नाही; कारण माझ्या कराराप्रमाणे ते वागले नाहीत आणि मी त्यांच्याकडे दुर्लक्ष केले, असे प्रभू म्हणतो.
परमेश्वर म्हणतो, त्या दिवसानंतर इस्राएलच्या घराण्याशी जो करार मी करीन तो हा: "मी आपले नियम त्यांच्या मनात घालीन आणि ते त्यांच्या हृदयपटांवर लिहीन आणि मी त्यांना देव असा होईन आणि ते मला माझे लोक असे होतील. तेव्हा 'परमेश्वराला ओळखा,' असे प्रत्येकजण आपल्या सहनागरिकाला आणि प्रत्येकजण आपल्या बंधूला शिकवणार नाही; कारण त्यातील लहानांपासून थोरांपर्यंत, ते सर्व मला ओळखतील.
कारण मी त्यांच्या अनीतीच्या कृत्यांविषयी क्षमाशील होईन आणि त्यांची पापे मी ह्यापुढे आठवणारच नाही. त्याने नवा असे म्हटल्याने पहिल्या कराराला जुना असे ठरवले आहे आणि ते जुने आणि जीर्ण होत आहे, ते नाहीसे होण्याच्या बेतात आले आहे.
हा प्रभूचा शब्द
प्रतिसाद : दया आणि सत्य ही एकत्र झाली आहेत.
१) हे परमेश्वरा, तुझ्या दयेचा आम्हांला अनुभव येऊ दे
आणि आम्हाला मुक्तिदान दे
त्याचे भय धरणाऱ्यांना तारण समीप असते
आणि आमच्या देशात त्याचे वैभव नांदेल.
२) दया आणि सत्य ही एकत्र झाली आहेत,
नीती आणि शांती ह्यांनी एकमेकींना आलिंगन दिले आहे.
पृथ्वीतून सत्य बाहेर पडत आहे,
स्वर्गातून नीतिमत्त्व अवलोकन करीत आहे.
३) परमेश्वर आमची भरभराट करील
आणि आमची भूमी आपले फळ देईल.
त्याच्यापुढे नीतिमत्त्व चालेल
आणि शांती त्याच्या पावलांचे अनुकरण करील.
जयघोष
आलेलूया, आलेलूया !
प्रभू म्हणतो, मीच जगाचा प्रकाश आहे; जो मला अनुसरतो त्याच्याजवळ जीवनाचा प्रकाश राहील.
शुभवर्तमान मार्क ३:१३-१९
वाचक : मार्कलिखित पवित्र शुभवर्तमानातून घेतलेले वाचन
येशू डोंगर चढून गेला आणि त्याला जे हवे होते त्यांना त्याने बोलावले आणि ते त्याच्याकडे आले. त्यांनी आपणाबरोबर असावे आणि भुते काढण्याचा अधिकार देऊन, उपदेश करावयास त्यांस पाठवावे, यासाठी त्याने ह्या बारा जणांची नेमणूक केली; शिमोन याला त्याने पेत्र हे उपनाव दिले; जब्दीचा मुलगा याकोब आणि याकोबचा भाऊ योहान ह्यांस बोआनेर्गेस म्हणजे गर्जनेचे पुत्र हेही नाव दिले; आंद्रेया, फिलीप, बार्थोलोम्यू, मत्तय, थोमा, अल्फीचा मुलगा याकोब, तद्दय, शिमोन कनानी आणि त्याला धरून देणारा यहुदा इस्कार्योत.
सर्व : हे प्रभू येशू ख्रिस्ता, तुझी स्तुती असो.
✝️
0 टिप्पण्या