सामान्यकाळातील पहिला सप्ताह
शुक्रवार दि. १७ जानेवारी २०२५
✝️
मठाधिकारी अँथनी १०५ वर्षांच्या प्रदीर्घ जीवनमानानंतर ख्रिस्तवासी झाले. त्यांना हॉस्पिटलमधील कर्मचारी, खाच खणणारे, खाटिक, ब्रश आणि टोपल्या तयार करणारे, ह्यांचा आश्रयदाता संत म्हणून गौरविण्यात आले आहे. अपस्मार, फिट्स येणे, मरी, त्वचा रोग इ. आजारांतून मुक्ती मिळावी म्हणून संत अँथनी ह्यांची मध्यस्थी केली जाते.
चिंतन : हजारो फुलांमधून मकरंद गोळा करणाऱ्या मधमाशीप्रमाणे ख्रिस्ती व्यक्तीने आपल्या मित्रांकडून चांगले तेच घ्यावे. कोणाकडून सौजन्य, कोणाकडून साधेपणा आणि मौन, तर कोणाकडून सहनशीलता शिकून घ्यावी. - संत अँथनी महान
वाचक : इब्री लोकांस पत्र यातून घेतलेले वाचन
"त्या विसाव्यात येण्याचा आपण होईल तितका प्रयत्न करावा."
प्रभूच्या विसाव्यात येण्याविषयीचे वचन अद्यापि देऊन ठेवलेले आहे, ह्यामुळे तुम्हांतील कोणी त्याला अंतरल्यासारखे दिसू नये म्हणून आपण भिऊन वागू. कारण त्यांच्यासारखी आपल्यालाही सुवार्ता सांगण्यात आली आहे, परंतु ऐकलेले वचन त्यांना लाभदायक झाले नाही, कारण त्यांचा ऐकणाऱ्यामध्ये विश्वासाबरोबर संयोग झाला नाही. त्यांची कृत्ये जगाच्या स्थापनेपासून समाप्त झाली. तथापि, "त्याप्रमाणे मी रागाने शपथ वाहून म्हणालो, हे माझ्या विसाव्यात निश्चित येणार नाहीत. असे ज्या विसाव्याविषयी त्याने सांगितलेले आहे त्यात, आपण विश्वास ठेवला आहे व आपण प्रवेश करीत आहो. "सातव्या दिवशी असे एका ठिकाणी त्याने म्हटले, देवाने आपल्या सर्व कृत्यांपासून विसावा घेतला" आणि ह्या ठिकाणी पुन्हा म्हटले आहे,"हे माझ्या विसाव्यात निश्चित येणार नाहीत." त्यांच्या अवज्ञेच्या उदाहरणाप्रमाणे कोणी पतित होऊ नये. तर त्या विसाव्यात येण्याचा आपण होईल तितका प्रयत्न करावा.
प्रतिसाद : देवाची कृत्ये विसरु नयेत.
१.ज्या आम्ही ऐकल्या, ज्या आम्हांला समजल्या,
आमच्या वडिलांनी ज्या आम्हांला सांगितल्या
त्या गोष्टी आम्ही त्याच्या वंशजांपासून गुप्त ठेवणार नाही,
तर परमेश्वराची स्तुत्य कृत्ये, त्याचा पराक्रम
आणि त्याने केलेली अद्भुत कृत्ये पुढच्या पिढीला सांगू.
२.पुढच्या पिढीने, म्हणजे पुढे जन्मास येणाऱ्या
संततीने ह्या गोष्टी जाणाव्या,
त्या आपल्या मुलांस कथन करण्यास
त्यांनी उद्युक्त व्हावे.त्यांनी देवावर भाव ठेवावा,
देवाची कृत्ये विसरु नयेत, तर त्याच्या आज्ञा पाळाव्या.
३.त्यांनी आपल्या पूर्वजांसारखी हट्टी
आणि बंडखोर स्वभावाची पिढी,
आपली अंत:करणे नीट न राखणारी
आणि देवाशी एकनिष्ठ नसणारी पिढी होऊ नये.
हे परमेश्वरा, तुझ्या नियमाने चालण्यास
मला शिकव ते मनापासून पाळण्यास मला सुबुद्धी दे.
वाचक : मार्कलिखित पवित्र शुभवर्तमानातून घेतलेले वाचन
मनुष्याच्या पुत्राला पृथ्वीवर पापांची क्षमा करण्याचा अधिकार आहे
येशू पुन्हा कफर्णहूमात आला आणि तो घरी आहे असे लोकांच्या कानी पडले. तेव्हा इतके लोक जमले की, दारात देखील त्यांना जागा होईना, तेव्हा तो त्यांना संदेश देत होता. मग लोक त्याच्याकडे एका पक्षघाती माणसाला घेऊन आले, त्याला चौघांनी उचलून आणले होते. त्यांना दाटीमुळे त्याच्याजवळ जाता येईना, म्हणून तो होता तेथील छप्पर त्यांनी उस्तरून काढले आणि वाट करून ज्या बाजेवर पक्षघाती पडून होता ती खाली सोडली. त्यांचा विश्वास पाहून येशू पक्षघाती माणसाला म्हणाला, "मुला, तुझ्या पापांची क्षमा झाली आहे." कित्येक शास्त्री तेथे बसले होते, त्यांच्या मनात असा विचार आला, "हा असे का बोलतो ? हा दुर्भाषण करतो. एकावाचून म्हणजे देवावाचून पापांची क्षमा कोण करू शकतो ?" ते स्वत:शी असा विचार करीत आहेत हे येशूने अंतर्ज्ञानाने लगेच ओळखून त्यांना म्हटले, "तुम्ही आपल्या मनात असले विचार का आणता ? तुझ्या पापांची क्षमा झाली आहे,' असे पक्षघाती माणसाला म्हणणे सोपे किंवा 'ऊठ, आपली बाज उचलून चाल' असे म्हणणे सोपे? परंतु मनुष्याच्या पुत्राला पृथ्वीवर पापांची क्षमा करण्याचा अधिकार आहे हे तुम्हांला समजावे म्हणून तो पक्षघाती माणसाला म्हणाला, "मी तुला सांगतो, ऊठ, आपली बाज उचलून घे आणि आपल्या घरी जा." मग तो उठला आणि लगेच आपली बाज उचलून सर्वांच्यादेखत निघाला. ह्यावरून सर्वजण थक्क झाले आणि देवाचा गौरव करीत म्हणाले, "आम्ही असे कधीच पाहिले नव्हते!".
✝️
0 टिप्पण्या