"देवाचे जे निवडले लोक रात्रंदिवस त्याचा धावा करतात त्यांचा तो न्याय करणार नाही काय?"
परमेश्वर दयाळू , कनवाळू व प्रेमळ आहे, तोच अंतर्यामी परमेश्वर आपल्या भक्तांची प्रार्थना ऐकतो. आपण धैर्याने, चिकाटीने कळकळीने प्रार्थना व विनंती करणे गरजेचे आहे.कारण, देवाचे जे निवडलेले लोक रात्रंदिवस प्रार्थना करतात त्यांना तो निश्चितच प्रतिसाद देतो. आपण सर्वजण देवाचीच लेकरे आहोत. देव आपल्यावर प्रेम करतो.
पहिले वाचन : ३ योहान : १: ५-८
वाचक : योहानाचे दुसरे पत्र यातून घेतलेले वाचन
प्रिय गायस, अनोळखी बंधुजनांसाठी तू जे काही करतोस ते विश्वासूपणाने करतोस. त्यांनी मंडळीसमोर तुझ्या प्रीतीविषयी साक्ष दिली. देवाला आवडेल अशा रीतीने तू त्यांना वाटेस लावशील तर बरे करशील. कारण ते परराष्ट्रीय लोकांपासून काहीएक न घेता खिस्ताच्या नामाखाली बाहेर पडले आहेत. म्हणून आपण अशांचा पाहुणचार करावा, म्हणजे आपण सत्यामध्ये त्यांचे सहकारी घेऊ.
हा प्रभूचा शब्द आहे.
सर्व : देवाला धन्यवाद.
स्तोत्र ११२:१-६
प्रतिसाद : परमेश्वराचे भय धरतो तो मनुष्य धन्य !
१)परमेश्वराचे स्तवन करा. जो मनुष्य परमेश्वराचे भय धरतो. आणि ज्याचा हर्ष त्याच्या आज्ञांमध्ये आहे तो धन्य ! त्याची संतती पृथ्वीवर पराक्रमी होईल. सरळ जनांचा वंश आशीर्वादयुक्त होईल.
२)धनसंपदा त्याच्या घरी असते, त्याचे नीतिमत्त्व सर्वकाळ टिकते. सरळ जनांना अंधकारात प्रकाश प्राप्त होतो. त्याच्या ठायी कृपा, दया आणि न्याय ही आहेत.
३)जो मनुष्य दया करतो आणि उसने देतो त्याचे कल्याण होते. तो न्यायाने आपले व्यवसाय करील, तो कधीही ढळणार नाही, नीतिमानाचे स्मरण सर्वकाळ राहील.
जयगोष
आलेलूया,आलेलूया !
हे परमेश्वरा, तुझे सर्व नियम विश्वसनीय आहेत.
ते सदासर्वकाळ अढळ आहेत.
आलेलूया !
शुभवर्तमान
लूक १८:१-८
वाचक :लूकलिखित शुभवर्तमानातून घेतलेले वाचन.
त्यांनी सर्वदा प्रार्थना करावी आणि खचू नये, ह्याविषयी येशूने आपल्या शिष्यांना एक दाखला सांगितला, तो असाः एका नगरात कोणीएक न्यायाधीश होता, तो देवाला भीत नसे आणि माणसाला जुमानत नसे आणि त्याच नगरात एक विधवा होती, ती त्याच्यापुढे वारंवार येऊन म्हणत असे की, 'माझी दाद घ्या व माझ्या प्रतिवाद्याविरुद्ध न्याय करा.' पण काही काळपर्यंत तो ते करीना. परंतु नंतर त्याने मनात म्हटले, 'जरी मी देवाला भीत नाही आणि माणसाला जुमानत नाही, तरी ही विधवा मला त्रास देते म्हणून मी तिचा न्याय करीन, नाहीतर ती नेहमी येऊन मला अगदी रंजीस आणील.' तेव्हा प्रभूने म्हटले, "अन्यायी न्यायाधीश काय म्हणतो ते ऐका. तर देवाचे जे निवडले लोक रात्रंदिवस त्याचा धावा करतात त्यांचा तो न्याय करणार नाही काय? आणि त्यांच्याविषयी तो विलंब लावील काय? मी तुम्हास सांगतो, तो त्यांचा न्याय लवकर करील. तरी मनुष्याचा पुत्र येईल तेव्हा त्याला पृथ्वीवर विश्वास आढळेल काय?"
0 टिप्पण्या