सामान्यकाळातील पहिला सप्ताह
"तो त्यांना शास्त्री लोकांसारखा नव्हे तर अधिकार असल्यासारखा शिकवीत होता."
✝️
पहिले वाचन :इब्री २:५-१२
वाचक : इब्री लोकांस पत्र यातून घेतलेले वाचन
आम्ही ज्या भावी जगाविषयी बोलत आहो ते त्याने देवदूतांच्या अधीन ठेवले नाही. तर एका ठिकाणी कोणी अशी साक्ष दिली आहे :
"मर्त्य मानव तो काय की तू त्याची आठवण करावी? अथवा मानवपुत्र तो काय की तू त्याला दर्शन द्यावे? तू त्याला देवदूतांपेक्षा किंचितकाल कनिष्ठ केले आहे, तू त्याला गौरव आणि थोरवी ह्यांनी मुकुटमंडित केले आहे, तू सर्व काही त्याच्या अधीन-त्याच्या पायांखाली ठेवले आहे.'
सर्व काही त्याच्या अधीन ठेवले आहे, म्हणजे त्याच्या अधीन ठेवलेले नाही असे काही राहू दिले नाही. परंतु सर्व काही त्याच्या अधीन ठेवले आहे असे अजून आपल्या दृष्टीस पडत नाही खरे. देवाच्या कृपेने प्रत्येकाकरिता मरणाचा अनुभव घ्यावा म्हणून ज्याला देवदूतांपेक्षा किंचितकाल कनिष्ठ केले होते, तो येशू मरण सोसल्यामुळे गौरव आणि थोरवी ह्यांनी मुकुटमंडित केलेला असा आपण पाहतो.
कारण ज्याच्यासाठी सर्व काही आहे आणि ज्याच्याद्वारे सर्व काही आहे, त्याने पुष्कळ पुत्रांना गौरवात आणताना त्यांच्या तारणाचा जो प्रवर्तक त्याला दु:खसहनाद्वारे त्याने परिपूर्ण करावे हे उचित होते. कारण जो पवित्र करणारा आणि ज्यांना पवित्र करण्यात येत आहे ते सर्व एकापासूनच आहेत; ह्या कारणास्तव त्यांना बंधू म्हणावयाची त्याला लाज वाटत नाही. तो म्हणतो, "मी आपल्या बंधूजवळ तुझ्या नावाची कीर्ती वर्णीन, महामंडळात तुझे स्तवन करीन."
हा प्रभूचा शब्द आहे
सर्व : देवाला धन्यवाद.
प्रतिसाद स्तोत्र ८:२,५-९
प्रतिसाद :प्रभो, आपल्या हातच्या कलाकृतींवर तू तुझ्या पुत्राला स्वामित्व दिले आहेस.
१) हे प्रभो, आमच्या परमेश्वरा, साऱ्या भूतलावर तुझे नाम कितीतरी थोर आहे! तू मर्त्य मानवाची आठवण करावी, क्षुद्र मानवजातीची तू पर्वा करावी, असा तो कोण?
२) तरीपण देवापेक्षा तू त्याला किंचित कनिष्ठ केले आहेस; त्याला वैभव आणि मोठेपणा ह्यांनी अलंकृत केले आहेस, आपल्या हातच्या कलाकृतीवर तू त्याला स्वामित्व दिले आहेस, सारे काही त्याच्या चरणांपाशी ठेवले आहेस.
३) शेरडेमेंढरे, गुरे ढोरे, अगदी एकूणएक जंगली जनावरे, आकाशातली पाखरे, समुद्रातले मासे, सागरात संचार करणारे प्राणी देखील तू त्याच्या चरणापाशी ठेवले आहेत.
जयघोष
आलेलूया,आलेलूया !
माझ्या प्रभो, तुझा मार्ग मला दाखव, तुझ्या सत्याला अनुसरून वागायला मला शिकव.
शुभवर्तमान
मार्क १: २१-२८
वाचक : मार्कलिखित शुभवर्तमानातून घेतलेले वाचन १:२१-२८
येशू आणि त्याचे शिष्य कफर्नाहुमस गेले आणि लागलेच त्याने शब्बाथ दिवशी सभास्थानात जाऊन शिक्षण दिले. त्याच्या शिकवणीवरून लोक थक्क झाले, कारण तो त्यांना शास्त्री लोकांसारखा नव्हे तर अधिकार असल्यासारखा शिकवीत होता. त्याचवेळी त्यांच्या सभास्थानात अशुद्ध आत्मा लागलेला एक मनुष्य होता, तो ओरडून म्हणाला "हे येशू नाझरेथकरा तू आमच्यामध्ये का पडतोस? आमचा नाश करावयास आलास काय ? तू कोण आहेस हे मला ठाऊक आहे, देवाचा पवित्र तो तूच." परंतु येशूने त्याला धमकावून म्हटले, "गप्प राहा आणि ह्याच्यातून नीघ , तेव्हा अशुद्ध आत्मा त्याला पिळून मोठ्याने ओरडला आणि त्याच्यातून निघून गेला. तेव्हा ते सर्व इतके थक्क झाले की ते एकमेकांस विचारू लागले, "हे आहे तरी काय ? काय ही अधिकारयुक्त नवीन शिकवण! हा अशुद्ध आत्म्यांनाही आज्ञा करतो आणि ते त्याचे ऐकतात." ही त्याचा कीर्ती लागलीच गालिलाच्या चहूकडल्या सर्व प्रांतात पसरली.
प्रभूचे हे शुभवर्तमान...
0 टिप्पण्या