Marathi Bible Reading | St. Theodosius the Cenobiarch | 11th January 2021

सामान्यकाळ

सामान्यकाळातील पहिला सप्ताह

 सोमवार 

११ जानेवारी २०२१

संत थिओडोसियस

(वर्तनसाक्षी)

देवपुत्र ह्या जगात आला आणि त्याने स्वतः सुवार्ता प्रचाराला सुरुवात केली. परमेश्वर पित्याची अनादी कालापासूनची मानवाच्या तारणाची योजना  प्रभूयेशू ख्रिस्ताद्वारे पूर्ण झाली.  प्रभू येशूच्या  येण्याने नवजीवनाची सुरुवात झाली.  देवराज्यात जाण्यासाठी आपण आपले पापी जीवन शुद्ध बनविणे गरजेचे आहे. देवाविरुद्ध आणि आपल्या बंधु-भगिनी विरूद्ध केलेल्या सर्व अपराधांबद्धल पश्चाताप करण्याचे आवाहन प्रभू येशूने केले आहे. आपण शुद्ध व निर्मळ बनण्यासाठी योग्य  पावले उचलणार आहोत .    त्याच्या स्वर्गीय राज्याची सुवार्ता पूर्णपणे प्रीतिभोजनात दृश्यपणे सामावलेली आहे.  'देव पुत्र जगात आला, त्यांने आम्हावर प्रीति केली आणि पित्याचा आज्ञेप्रमाणे यज्ञबळी समर्पित केला'. आपण प्रभू वर पूर्ण विश्वास ठेवून त्याला शरण जाऊ या.

✝️

"पश्चाताप करा आणि शुभवर्तमानावर विश्वास ठेवा."

✝️

पहिले वाचन :  इब्री  १:१-६

वाचक :  इब्री लोकांस पत्र यातून घेतलेले वाचन १:१-६

देव प्राचीन काळी अंशाअंशानी आणि प्रकाराप्रकारांनी संदेष्ट्यांच्या द्वारे पूर्वजांशी बोलला. तो ह्या काळाच्या शेवटी पुत्राद्वारे आपल्याशी बोलला आहे. त्याने त्याला सर्व गोष्टींचा वारस करून ठेवले आणि त्याच्याद्वारे त्याने विश्व निर्माण केले. हा पुत्र त्याच्या गौरवाचे तेज आणि त्याच्या तत्त्वाचे प्रतिरूप असून आपल्या सामर्थ्याच्या शब्दाने विश्वाधार आहे आणि पापांची शुद्धी केल्यावर तो ऊर्ध्वलोकी राजवैभवाच्या उजवीकडे बसला. ज्या मानाने त्याला वारसाने देवदूतांपेक्षा श्रेष्ठ नाव मिळाले आहे त्या मानाने तो त्यांच्यापेक्षा अधिक श्रेष्ठ आहे. कारण त्याने कोणत्या देवदूताला कधी असे म्हटले :

"तू माझा पुत्र आहेस,

आज मी तुला जन्म दिला आहे ?"

आणि पुन्हा

"मी त्याला पिता असा होईन आणि तो मला पुत्र असा होईल ?"

आणि तो पुन्हा ज्येष्ठ पुत्राला जगात आणतो तेव्हा तो म्हणतो:  "देवाचे सर्व दूत त्याला नमन करोत."

हा प्रभूचा शब्द आहे 

सर्व : देवाला धन्यवाद.

प्रतिसाद स्तोत्र ९७:१-२,६,७,९

प्रतिसाद :  सर्व दैवतांनो, प्रभूलाच नमन करा, 

१) प्रभू राज्य करतो, पृथ्वी जयघोष करो; बेटांच्या समुदायांना आनंद होतो. मेघ आणि अंधकार त्याच्या सभोवती आहेत, त्याचे सिंहासन न्यायनीतीवर आधारलेले आहे.

२) आकाश त्याची न्यायपरायणता जाहीर करते, सारी मानवजात त्याचे ऐश्वर्य पाहते. सर्व दैवतांनो, त्यालाच नमन करा.

३)  कारण हे प्रभो, तूच साऱ्या भूतलावर परमश्रेष्ठ आहेस. सर्व दैवतांहून तू थोर आहेस.

जयघोष

आलेलूया,आलेलूया !

हे परमेश्वरा, बोल, तुझा दास ऐकत आहे: 

सार्वकालिक जीवनाची वचने आपणाजवळ आहेत. आलेलुया!

आलेलूया !

शुभवर्तमान 

मार्क १: १४-२०

वाचक :   मार्कलिखित शुभवर्तमानातून घेतलेले वाचन १:१४-२०

   योहानला अटक झाल्यानंतर येशू देवाचे शुभवर्तमान प्रकट करीत गालिलात आला आणि म्हणाला, "काळाची पूर्णता झाली आहे आणि देवाचे राज्य जवळ आले आहे. पश्चाताप करा आणि शुभवर्तमानावर विश्वास ठेवा." नंतर गालिल समुद्राजवळून जात असताना त्याला शिमोन आणि त्याचा भाऊ आंद्रेया हे समुद्रात जाळे टाकताना दिसले, कारण ते मासे धरणारे होते आणि येशू त्यांना म्हणाला, “माझ्यामागे या म्हणजे तुम्ही माणसे धरणारे व्हाल, असे मी करीन." मग ते लागलेच जाळी सोडून त्याला अनुसरले. तेथून काहीसे पुढे गेल्यावर त्याला जब्दीचा मुलगा याकोब आणि त्याचा भाऊ योहान हे तारवात जाळी नीट करताना दिसले आणि त्याने त्यांना लागलेच बोलावले. मग ते आपला बाप जब्दी ह्याला भाडोत्री चाकरांबरोबर तारवात सोडून त्याच्यामागे गेले.

प्रभूचे हे शुभवर्तमान...

सर्व :  हे ख्रिस्त तुझी स्तुती असो.  

चिंतन : 

आजच्या शुभवर्तमानात येशू आपल्या पहिल्या अनुयायांची निवड करतो. ते कोण होते हे आपण लक्षात घेतले पाहिजे. ती सर्व एकदम साधी माणसे होती. ते शाळेत आणि कॉलेजमध्ये शिकलेले नव्हते. ते कुलीन कुटुंबातील नव्हते. सामान्य माणसांवर येशूचा खूप विश्वास होता. माझ्या मागे या म्हणजे मी तुम्हाला माणसे धरणारे करीन.' हे विशेष आहे की, हा तरुण गुरु स्वतःला एक उभरते व्यक्तिमत्त्व म्हणून जगापुढे सादर करतो. येशूने जेव्हा ह्या साध्या माणसांना पाचारण केले तेव्हा ते काय करत होते, हे लक्षात घेणे आवश्यक आहे. ते आपले दैनंदिन काम करीत होते. देवाचे पाचारण ह्या माणसांना प्रार्थना करीत असताना झाले नाही, तर त्यांचे दैनंदिन काम करीत असताना झाले. येशूचे अनुकरण करणे म्हणजे आपल्या पूर्वीच्या जीवनाचा आणि आचरणाचा त्याग करणे आणि अनावश्यक गोष्टी सोडून देण्याची इच्छाशक्ती असणे. मासेमारी करणाऱ्या त्या चार माणसांनी आपली जाळी सोडून दिली व ते येशूला अनुसरले. येशू सातत्याने आपल्याला जबाबदारी देतो. आपली इच्छा आहे का त्याला अनुसरण्याची ?

प्रार्थना :  हे प्रभू येशू, देवराज्याचे सहभागीदार बनण्यास आम्हाला पात्र बनव, आमेन.