सामान्य काळातील २रा सप्ताह
✝️
पहिले वाचन : इब्री ७:१-३,१५-१७
वाचक : इब्री लोकांस पत्र यातून घेतलेले वाचन
मलकीसदेक, शालेमचा राजा आणि परात्पर देवाचा याजक होता. आब्राहाम जेव्हा राजास ठार मारून परत आला तेव्हा ह्याने त्याला सामोरे जाऊन आशीर्वाद दिला आणि आब्राहामने त्याला सर्व लुटीचा दशांश दिला. तो आपल्या नावाच्या अर्थाप्रमाणे एक तर नीतिमत्त्वाचा राजा आणि दुसरे शालेमचा राजा म्हणजे शांतीचा राजा होता. त्याची मातापितरे, वंशावळ, जन्मदिवस अथवा त्याच्या आयुष्याचा शेवट (ह्यांचा उल्लेख कोठेही सापडत) नाही. तरी त्याला देवाच्या पुत्रासारखे करण्यात आल्यामुळे तो नित्य याजक राहतो आणि दैहिक आज्ञेच्या नियमाने नव्हे तर अक्षय जीवनाच्या सामर्थ्यने झालेला असा मलकीसदेकसारखा निराळा याजक जर उद्भवला आहे, तर ह्यावरून आम्ही सांगितलेले ते अधिकच स्पष्ट होते. कारण त्याच्याविषयी अशी साक्ष आहे, "तू मलकीसदेकच्या संप्रदायाप्रमाणे युगानुयुग याजक आहेस."
हा प्रभूचा शब्द आहे
सर्व : देवाला धन्यवाद.
प्रतिसाद स्तोत्र ११०:१-४
प्रतिसाद :मलकीसदेकच्या संप्रदायाप्रमाणे तू युगानुयुग याजक आहेस.
१) माझ्या प्रभूला परमेश्वर म्हणतो : "मी तुझे वैरी तुझे पदासन करीपर्यंत तू माझ्या उजवीकडे बैस."
२) परमेश्वर तुझा राजदंड सियोनातून पुढे नेईल; तो म्हणतो, तू आपल्या शत्रूंवर प्रभुत्व कर.
३) तुझ्या पराक्रमाच्या दिवशी तुझे लोक संतोषाने पुढे होतात, पावित्र्याने मंडित झालेले तुझे तरुण तुला पहाटेच्या दंहिवरासारखे आहेत.
४) परमेश्वराने शपथ वाहिली आहे आणि ती तो बदलणार नाही. "मलकीसदेकच्या संप्रदायाप्रमाणे तू युगानुयुग याजक आहेस."
जयघोष
आलेलूया, आलेलूया !
मनुष्य केवळ भाकरीने नव्हे, तर परमेश्वराच्या मुखातून निघणाऱ्या प्रत्येक वचनाने जगेल..
शुभवर्तमान
मार्क ३:१-६
वाचक : मार्कलिखित शुभवर्तमानातून घेतलेले वाचन
येशु सभास्थानात गेला. तेथे वाळलेल्या हाताचा एक माणूस होता आणि त्याच्यावर दोष ठेवावा म्हणून शब्बाथ दिवशी तो त्याला बरे करतो की काय हे पाहावयास ते टपून बसले होते. तेव्हा त्याने हात वाळलेल्या माणसाला म्हटले, "असा पुढे ये.' मग तो त्यांना म्हणाला, "शब्बाथ दिवशी बरे करणे किंवा वाईट करणे, जीव वाचवणे किंवा जीव घेणे, ह्यातून कोणते सशास्त्र आहे?" पण ते उगेच राहिले. मग त्याने त्यांच्या अंत:करणाच्या कठीणपणामुळे खिन्न होऊन त्या सर्वांकडे रागाने पाहिले आणि त्या माणसाला म्हटले, "हात लांब कर." त्याने हात लांब केला आणि तो बरा झाला. मग परुशी बाहेर जाऊन येशूचा घात कसा करावा ह्याविषयी लागलीच हेरोदियांबरोबर त्याच्याविरुद्ध मसलत करीत बसले.
प्रभूचे हे शुभवर्तमान...
0 टिप्पण्या