Marathi Bible Reading | 2nd week of Easter Thursday 15th April 2021

पुनरुत्थान

दुसरा सप्ताह

गुरुवार 

१५ एप्रिल २०२१

✝️

   संत बेनेडिक्ट जोसेफ लाब्रे

(वर्तनसाक्षी)

देव इतका चांगला व दयाळू आहे की केवळ अंतःकरणापासून प्रार्थना केल्यास तो आपल्याला स्वर्गीय सुखाचे दान देऊ शकतो.-संत बेनेडिक्ट जोसेफ लाब्रे 

✝️

            

ख्रिस्तासाठी सर्वप्रकारचा छळ सोसायला तयार झालेल्या प्रेषितांचा त्यावेळचा विश्वास व त्यांची चिकाटी खरोखर वाखाणण्यासारखी आहे.

 'परमेश्वर पित्याने सर्वकाही त्याच्या (प्रभू येशूच्या) हाती दिले आहे.' प्रभू येशू ख्रिस्ताचा निसर्गावर, दुष्ट आत्म्यांवर, आजारांवर व मरणांवर देखिल अधिकार होता. येशूने त्यांच्या चमत्काराद्वारे ते स्पष्ट केले आहे. प्रभूचे हेच सार्वभौमत्व व देवत्व स्वीकारणाऱ्याला प्रभूच्या दयेचा, कृपेचा व आशीर्वादाचा अनुभव येत असतो. आपण सर्वजण त्याच्यावरील विश्वासात दृढ व्हावेत व त्याच्या आज्ञापालनाने खरे अनुयायी बनावेत म्हणून योहान बाप्तिस्ता येशूची साक्ष देत आहे. होय, येशूवर विश्वास ठेवणाऱ्यास व त्याच्या वचनाप्रमाणे आचरण करणाऱ्यांस सार्वकालिक जीवन मिळणार आहे. प्रभू येशूचे अधिपत्य मान्य करुन त्याला आपण शरण जाऊ या.  

✝️

"पिता पुत्रावर प्रीती करतो आणि त्याने सर्व काही त्याच्या हाती दिले आहे." 

✝️

पहिले वाचन  प्रे.  कृ.  ५:२७-३३

वाचक :  प्रे. कृ. या पुस्तकातून घेतलेले वाचन

"ह्या गोष्टींविषयी आम्ही साक्षी आहोत आणि पवित्र आत्मापण साक्षी आहे."

जेव्हा सरदाराने आणि वडीलमंडळाने प्रेषितांना आणून न्यायसभेपुढे उभे केले, तेव्हा प्रमुख याजकाने त्यांना विचारले, "ह्या नावाने शिक्षण देऊ नका असे आम्ही तुम्हांस निक्षून सांगितले होते की नाही? तरी पाहा, तुम्ही आपल्या शिकवणीने येरुशलेम भरून टाकले आहे आणि ह्या मनुष्याच्या रक्तपाताचा दोष आम्हांवर आणू पाहत आहा." परंतु पेत्र आणि इतर प्रेषितांनी उत्तर केले, "आम्ही मनुष्यांपेक्षा देवाची आज्ञा मानली पाहीजे. ज्या येशूला तुम्ही खांबावर टांगून मारले त्याला आपल्या पूर्वजांच्या देवाने उठवले. त्याने इस्राएलला पश्चात्ताप आणि पापांची क्षमा ही देणगी देण्याकरिता देवाने त्याला आपल्या उजव्या हाताशी अधिपती व तारणारा असे उच्च पद दिले. ह्या गोष्टींविषयी आम्ही साक्षी आहो आणि देवाने आपल्या आज्ञा पाळणाऱ्यांना जो पवित्र आत्मा दिला आहे तोही साक्षी आहे."

हे ऐकून ते चिडून गेले आणि त्यांस जिवे मारण्याचा विचार करू लागले.

हा प्रभूचा शब्द आहे 

सर्व : देवाला धन्यवाद.

प्रतिसाद स्तोत्र  ३४:२,९,१७-२०

प्रतिसाद : मी पामराने धावा केला आणि प्रभूने तो ऐकला.

१) प्रभूचे धन्यवाद मी सदासर्वदा गाईन,त्याचे स्तवन सतत माझ्या मुखी असेल. प्रभू किती चांगला आहे हे अनुभव घेऊन पाहा. त्याच्यावर भाव ठेवणारा माणूस धन्य !

२) प्रभूची दृष्टी सात्त्विकांकडे लागलेली असते, त्यांची हाक ऐकायला त्याचे कान उघडे असतात. सात्त्विक धावा करतात, प्रभू ऐकतो. तो सर्व संकटातून त्यांना सोडवतो.

३) ज्यांची कंबर खचली आहे अशांच्या जवळ प्रभू असतो. ज्यांचे अवसान गाळले आहे अशांचा तो उद्धार करतो. सात्त्विकांवर अनेक आपत्ती ओढवतात, पण प्रभू त्या सर्वांतून त्याला सोडवतो.

जयघोष                                                 

आलेलुया, आलेलुया! 

आलेलुया, आलेलुया! प्रभूने म्हटले, "थोमा, तू मला पाहिले आहे म्हणून विश्वास ठेवला आहे. पाहिल्यावाचून विश्वास ठेवणारे ते धन्य."

 आलेलुया!

शुभवर्तमान योहान  ३:१६-२१

वाचक :  योहानलिखित शुभवर्तमानातून घेतलेले वाचन 

येशू निकदेमला म्हणाला, "जो वरून येतो तो सर्वांच्या वर आहे. जो पृथ्वीपासून आला तो पृथ्वीचा आहे व ऐहिक गोष्टी बोलतो, जो स्वर्गातून येतो तो सर्वांच्या वर आहे. जे त्याने पाहिले आहे आणि ऐकले आहे त्याविषयी तो साक्ष देतो आणि त्याची साक्ष कोणी मानीत नाही. ज्याने त्याची साक्ष मान्य केली त्याने देव सत्य आहे ह्या गोष्टींवर शिक्कामोर्तब केले आहे. कारण ज्याला देवाने पाठवले तो देवाची वचने बोलतो, तो आत्मा मोजून मापून देत नाहीन. पिता पुत्रावर प्रीती करतो आणि त्याने सर्व काही त्याच्या हाती दिले आहे. जो पुत्रावर विश्वास ठेवतो त्याला सार्वकालिक जीवन प्राप्त झाले आहे; परंतु जो पुत्राचे ऐकत नाही त्याच्या दृष्टीस जीवन पडणार नाही, पण देवाचा क्रोध त्याच्यावर राहतो.

प्रभूचे हे शुभवर्तमान

सर्व : हे ख्रिस्ता  तुझी स्तुती असो. 

चिंतन :-  निकोदेमस समोर दोन पर्याय ठेवून झाले. आता येशू त्याचे विस्तृतपणे स्पष्टीकरण करतो. तो स्वतः वरून म्हणजे स्वर्गातून आलेला असल्यामुळे तो स्वर्गीय, पारमार्थिक व आध्यात्मिक गोष्टींविषयी बोलतो. निकोदेमसची दृष्टी अजूनही पृथ्वीवरील गोष्टींकडे लागलेली आहे. तो शारीरिक, भौतिक व जागतिक गोष्टींविषयी बोलत असलेला आढळतो. येशूची नजर स्वर्गाकडे लागलेली आहे, त्यामुळे जो येशूवर विश्वास ठेवतो त्यालाही हे स्वर्गीय व सार्वकालिक जीवन लाभेल असे तो म्हणतो. यावरून संत योहानाच्या शुभवर्तमानासाठी गरुडाचे चिन्ह का वापरले जाते ते लक्षात येईल. गरुड व गिधाड दोघेही वर उंच आकाशात भरारी मारतात. मात्र गरुडाची नजर सूर्याकडे तर गिधाडाची नजर जमिनीवरील किडे, मुंग्या, प्रेते यांच्याकडे लागलेली असते. माझे जीवन गरुडासारखे आहे की गिधाडासारखे आहे ? येशूवर व स्वर्गीय गोष्टींवर लक्ष केंद्रित करण्यासाठी मी काय काय करायला हवे?

प्रार्थना : हे सर्व समर्थ प्रभू परमेश्वरा, तुला सर्वस्वी शरण येण्यास व तुझ्या वचनाप्रमाणे आचरण करण्यास प्रेरणा व कृपा दे, आमेन.