पुनरुत्थान
तिसरा सप्तह
बुधवार
२१ एप्रिल २०२१
संत आन्सेल्म
महागुरू, वर्तनसाक्षी, धर्मपंडित (१०३३-११०९)
“हे प्रभो, आमच्या देवा अगदी मनाच्या खोल कप्प्यातून आम्ही केवळ तुझाच ध्यास धरावा अशी कृपा आम्हाला दे. तुला प्राप्त करण्याची इच्छा आमच्या मनात उत्पन्न कर. ही इच्छा बाळगल्याने आम्ही तुझा शोध करावा, तुझा शोध लागल्यानंतर आम्ही तुजवर प्रेम करावे, तुझ्यावर प्रेम केल्याने आम्ही पापांचा तिरस्कार करावा असे कर कारण आम्हावरील प्रेमाखातर तू ह्या पापांपासून आम्हाला मुक्त केलेले आहेस."- संत आन्सेल्म
✝️
ख्रिस्ती लोकांचा छळ झाला आणि त्यांची पांगापाग झाली. तरी शोमरोनमध्ये फिलिप्पाने ख्रिस्ताची सुवार्ता पसरविली. ख्रिस्ताशी एकरुप झालेल्या फिलिप्पाच्या प्रार्थनेमुळे अनेकांचे आजार बरे झाले व अनेक अशुद्ध आत्मे लोकांमधून निघून गेले. त्यांच्या विश्वासामुळे ख्रिस्ताची साक्ष त्यांना अनुभवावयास मिळाली.
प्रभू येशू आपल्या शिष्यांना त्याची ओळख करुन देताना, 'तो स्वर्गातून उतरलेला देवाचा पुत्र आहे,' अशी जाणीव करून देत आहे. देवाला सर्व माणसे त्याची लेकरे आहेत. कोणीही बहकून जाऊ नये तर सर्वांना सार्वकालिक जीवन मिळावे म्हणून त्याच्या पुत्रावर आपण विश्वास ठेवणे गरजेचे आहे. देवाला प्रत्येकाची काळजी आहे कारण तो सर्वावर प्रेम करतो. खऱ्या अर्थाने जन्माला आलेल्या प्रत्येक माणसाची व्यवस्था देवाने केलेली असते.
✝️
“मीच जीवनाची भाकर आहे. जो माझ्याकडे येतो त्याला कधीही भूक लागणार नाही
पहिले वाचन प्रे. कृ. ८:१-८
वाचक : प्रे. कृ. या पुस्तकातून घेतलेले वाचन
"ज्यांची पांगापांग झाली होती ते तर वचनाची सुवार्ता सांगत चहूकडे फिरले."
येरुशलेममधल्या मंडळीचा फार छळ झाला, म्हणून प्रेषितांखेरीज त्या सर्वांची यहुदिया आणि शोमरोन ह्या प्रदेशात पांगापांग झाली. भक्तिमान माणसांनी स्तेफनला नेऊन पुरले आणि त्याच्यासाठी फार शोक केला. इकडे शौल मंडळीला हैराण करू लागला. तो घरोघर जाऊन पुरुषांना आणि स्त्रियांनाही धरून आणून तुरुंगात टाकीत असे.
तेव्हा ज्यांची पांगापाग झाली होती ते तर वचनाची सुवार्ता सांगत चहूकडे फिरले आणि फिलीपने शोमरोन शहरी जाऊन तेथील लोकांपुढे ख्रिस्ताची घोषणा केली. तेव्हा फिलीपचे भाषण ऐकून आणि तो करीत असलेली चिन्हे पाहून लोकसमुदायाने त्याने सांगितलेल्या गोष्टीकडे एकमताने लक्ष दिले. कारण ज्यांना अशुद्ध आत्मे लागले होते त्यांच्यातील पुष्कळातून ते अशुद्ध आत्मे मोठ्याने ओरडून निघून गेले, पुष्कळ पक्षपाती आणि पांगळी माणसे बरी झाली. अशा प्रकारे त्या नगरात आनंदीआनंद झाला.
हा प्रभूचा शब्द आहे
सर्व : देवाला धन्यवाद.
प्रतिसाद स्तोत्र ६६:१-७
प्रतिसाद : पृथ्वीवरील समस्त जनहो, देवाचा जयजयकार करा.
१) पृथ्वीवरील समस्त जनहो, देवाचा जयजयकार करा. त्याच्या नावाच्या महिम्याचे गुणगान गा. त्याचे स्तवन करून माहात्म्य वाढवा. देवाला म्हणा, “तुझी करणी किती अगाध आहे!”
२ ) "सारे भूमंडळ तुझ्या चरणी लागेल. तुझे गुणगान गाईल, तुझ्या नावाचा महिमा वर्णील!” या आणि देवाचे कार्य बघा. मानवजातीला त्याच्या करणीचा धाक बसतो.
३) त्याने समुद्राच्या जागी कोरडी जमीन केली, लोक नदीपार गेले. तेव्हा त्याची करणी पाहून आम्हांला अत्यानंद झाला; तो आपल्या पराक्रमाने सदासर्वदा राज्य करतो.
जयघोष
आलेलुया, आलेलुया!
प्रभू म्हणतो, माझी मेंढरे माझी वाणी ऐकतात, मी त्यांना ओळखतो आणि ती माझ्यामागे येतात.
आलेलुया!
शुभवर्तमान योहान ६:३५-४०
वाचक : योहानलिखित शुभवर्तमानातून घेतलेले वाचन
"माझ्या पित्याची इच्छा हीच आहे की, जो कोणी पुत्राला पाहील त्याला सार्वकालिक जीवन प्राप्त व्हावे."
येशू त्यांना म्हणाला, “मीच जीवनाची भाकर आहे. जो माझ्याकडे येतो त्याला कधीही भूक लागणार नाही आणि जो माझ्यावर विश्वास ठेवतो त्याला कधीही तहान लागणार नाही. परंतु तुम्ही मला पाहिले असताही विश्वास ठेवला नाही, असे मी तुम्हांला सांगितले. पिता जे मला देतो ते सर्व माझ्याकडे येईल आणि जो माझ्याकडे येतो त्याला मी मुळीच घालवून देणार नाही. कारण मी स्वतःच्या इच्छेप्रमाणे नव्हे, तर ज्याने मला पाठवले त्याच्या इच्छेप्रमाणे करावे म्हणून स्वर्गातून उतरलो आहे आणि ज्याने मला पाठवले त्याची इच्छा आहे की, त्याने जे सर्व मला दिले आहे त्यातून मी काहीही हरवू नये, तर शेवटल्या दिवशी मी ते उठवावे. माझ्या पित्याची इच्छा हीच आहे की, जो कोणी पुत्राला पाहून त्याच्यावर विश्वास ठेवतो, त्याला सार्वकालिक जीवन प्राप्त व्हावे.. त्याला मीच शेवटल्या दिवशी उठवीन."
प्रभूचे हे शुभवर्तमान
सर्व : हे ख्रिस्ता तुझी स्तुती असो.
चिंतन :- केवळ योहानलिखित शुभवर्तमानातच येशूने 'मी... आहे' अशा प्रकारची सात वाक्ये उच्चारली आहेत. त्याद्वारे येशूने आपले आत्म प्रकटीकरण केलेले आहे. तो मेंढपाळ, मेंढराचे दार, द्राक्षवेल, मार्ग, सत्य, जीवन, पुनरुत्थान व जीवन, जगाचा प्रकाश आणि जीवनाची भाकर असल्याचे सांगतो. आजच्या शुभवर्तमानात तो म्हणतो, 'मीच जीवनाची भाकर आहे.' निकोदेमसला त्याने नवा जन्म घेण्यामागचे गुपित उलगडून दाखविले, शोमरोनी स्त्रीला त्याने उपळत्या पाण्याचा झरा दाखविला, पंगू मनुष्यासाठी त्याने नवजीवनाचे दालन उघडले, जन्मांधाला त्याने खऱ्या प्रकाशाची वाट दाखविली. लाझरसला त्याने पुनरुज्जीवनाचा अनुभव दिला. शौलाने प्रारंभीच्या ख्रिस्तसभेत छळ सुरू केला तेव्हा डीकन फिलीप ह्याने शोमरोनातील पुष्कळ रोगी, पंगू आणि भूतग्रस्त लोकांना बरे केले. ही सगळी शक्ती त्याला प्रभू येशूकडून मिळाली. 'मी जीवनाची भाकर आहे' असे म्हणणारा येशू आज साक्रामेंतामध्ये हजर आहे. त्याच्याठायी सर्वप्रकारचे सामर्थ्य आहे. चांगले जीवन जगण्यासाठी मला कोठून शक्ती प्राप्त होते ? येशू माझ्या जीवनाची भाकर बनलेला आहे का ?
प्रार्थना : हे प्रभू येशू, तुझ्या वरील आमच्या विश्वास दृढ करण्यास व तुला आंतरिक मनाने जाणण्यास आम्हाला प्रेरणा दे, आमेन.
0 टिप्पण्या