Marathi Bible Reading | 3rd week of Easter Thursday 22nd April 2021

पुनरुत्थान

तिसरा सप्तह

गुरुवार 

२२ एप्रिल २०२१

संत सौतेर 

(परमगुरु व रक्तसाक्षी )

✝️

 

प्रभूच्या दुतने  फिलिप्पाला कुशी षंढाकडे पाठविले आणि त्याच्या मार्गदर्शनाखाली त्या षंढाने  बाप्तिस्मा स्वीकारला. देवपित्याने फिलिप्पाच्या मध्यस्थीने प्रभूची सुवार्ता पसरविली. पवित्र आत्म्याठायी त्याच्या प्रेरणेने आणि विश्वासाद्वारे आपण सर्वजण परमेश्वराकडे आकर्षिले जात असतो.

प्रभू येशू स्वतःच जिवंत भाकर बनून आला होता. सर्वांना जीवन व तेही सार्वकालिक जीवन प्राप्त  करुन देण्यासाठीच तो आला होता. अनंत जीवन देणारी भाकर प्रभू येशू आज  सुद्धा ख्रिस्तशरीर संस्काराद्वारे आपल्याला देत आहे. प्रभू येशू देत असलेली जीवनदायी कृपा आपल्याला सहज प्राप्त होत नाही तर त्यासाठी आपला विश्वास आणि देवपित्याची इच्छा समजून घेणे महत्त्वाचे आहे. प्रभू आज म्हणत आहे, 'जो विश्वास ठेवितो त्याला सार्वकालिक जीवन प्राप्त झाले आहे.' आपले चर्चमध्ये जाणे, सहभाग घणे, प्रार्थना करणे व सत्कृत्ये करणे हे देवपित्याचे आकर्षून घेणे आहे. आपली श्रद्धा हे देवाचे आपल्याला मिळालेले दान आहे.

✝️

             

“ स्वर्गातून उतरणारी भाकर अशी आहे की, ती जर कोणी खाल्ली तर तो मरणार नाही."

पहिले वाचन  प्रे.  कृ. ८:२६-४०

वाचक : प्रे. कृ. या पुस्तकातून घेतलेले वाचन

"जर तू तुझ्या संपूर्ण अंतःकरणाने विश्वास ठेवलास तर तुला बाप्तिस्मा मिळेल."

प्रभूच्या दूताने फिलीपला म्हटले, "ऊठ, जी वाट येरुशलेमपासून गज्जाकडे जाते त्या वाटेने दक्षिणेकडे जा. ती "ओसाड आहे." मग तो उठला व निघाला, तेव्हा पाहा, एक कुशी षंढ, कुशी लोकांची राणी कांदके हिचा मोठा अधिकारी होता आणि त्याच्या हाती तिचे सर्व भांडार होते, तो येरुशलेममध्ये उपासनेसाठी आला होता. तो परत जाताना आपल्या रथात बसून यशया संदेष्ट्याचा ग्रंथ वाचीत होता. तेव्हा आत्म्याने फिलीपला सांगितले, “तू जाऊन त्याचा रथ गाठ." फिलीप धावत गेला आणि त्याने यशया संदेष्ट्याचा ग्रंथ वाचताना ऐकले. त्यावर तो म्हणाला, “आपण जे वाचत आहा ते आपल्याला समजते काय ?" त्याने म्हटले, "कोणी मार्ग दाखवल्याखेरीज मला कसे समजणार?" मग त्याने फिलीपला आपल्याजवळ येऊन बसावयास वर बोलावले. तो जो शास्त्रलेख वाचीत होता तो असा :   

त्याला मेंढरासारखे वधासाठी नेले आणि जसे कोकरू कातरणाऱ्याच्या पुढे गप्प असते, तसा तो आपले तोंड उघडत नाही. त्याच्या लीन अवस्थेत त्याला न्याय मिळाला नाही. त्याच्या पिढीचे वर्णन कोण करील? कारण त्याचा जीव पृथ्वीवरून घेतला गेला." तेव्हा षंढाने फिलीपला म्हटले, "मी तुम्हाला विनंतीपूर्वक विचारतो, संदेष्टा कोणाविषयी असे म्हणतो, स्वतःविषयी की दुसऱ्या कोणाविषयी ?” तेव्हा फिलीपने बोलायला आरंभ केला आणि ह्या शास्त्रलेखापासून सुरुवात करून येशूविषयीची सुवार्ता त्याला सांगितली. मग वाटेने जात असता ते पाणवठ्याजवळ आले, तेव्हा षंढ म्हणाला, “पाहा, हे पाणी! मला बाप्तिस्मा घेण्यास काय हरकत आहे?" तेव्हा त्याने रथ उभा करायला सांगितले आणि फिलीप आणि षंढ असे ते दोघे पाण्यात उतरले आणि त्याने त्याला बाप्तिस्मा दिला. मग ते पाण्यावरुन वर आले तोच प्रभूचा आत्मा फिलीपला घेऊन गेला म्हणून तो पुन्हा षंढाच्या दृष्टीस पडला नाही. नंतर तो आपल्या वाटेने हर्ष करीत चालला. इकडे फिलीप अजोत नगरात आढळला आणि कैसरिया येथे येईपर्यंत त्याला वाटेत जी जी गावे लागली त्यातून जाताना त्याने सुवार्ता सांगितली

हा प्रभूचा शब्द आहे 

सर्व : देवाला धन्यवाद.

प्रतिसाद स्तोत्र ६६:८-९,१६-१७,२०

प्रतिसाद : पृथ्वीवरील समस्त जनहो, देवाचा जयजयकार करा.

१ ) लोकहो, आमच्या देवाचे धन्यवाद गा. त्याच्या स्तवनाचा गजर ऐकू द्या. त्याने आमचे प्राण वाचवले आहेत. आमचे पाय ढळू दिले नाहीत.

 २)  देवाचे भय बाळगणाऱ्यांनो, या व ऐका. त्याने माझ्यासाठी काय काय केले ते मी तुम्हांला सांगतो. मी माझ्या मुखाने त्याचा धावा केला, माझ्या जिभेवर त्याचे स्तवन होते.

३)  धन्य तो देव ! माझी प्रार्थना त्याने झिडकारली नाही, आपले प्रेम कमी केले नाही.

जयघोष                                                 

आलेलुया, आलेलुया! 

येशूने थोमाला म्हटले, तू मला पाहिले आहे म्हणून श्रद्धा ठेवली आहे. पाहिल्यावाचून श्रद्धा ठेवणारे ते धन्य. 

आलेलुया!

शुभवर्तमान योहान ६:४४-५१

वाचक :  योहानलिखित शुभवर्तमानातून घेतलेले वाचन

“स्वर्गातून उतरणारी जिवंत भाकर मीच आहे.”

येशूने लोकसमुदायाला म्हटले, “ज्याने मला पाठवले त्या पित्याने आकर्षिल्याशिवाय कोणीही माझ्याकडे येऊ शकत नाही. त्याला शेवटल्या दिवशी मी उठवीन. संदेष्ट्यांच्या ग्रंथात लिहिले आहे की, 'ते सर्व देवाने शिकवलेले असे होतील.' जो कोणी पित्याचे ऐकून शिकला आहे तो माझ्याकडे येतो. पित्याला कोणी पाहिले आहे असे नाही, जो देवापासून आहे त्याने मात्र पित्याला पाहिले आहे. मी तुम्हांला सत्य सांगतो, जो विश्वास ठेवतो त्याला सार्वकालिक जीवन प्राप्त झाले आहे. मीच जीवनाची भाकर आहे. तुमच्या पूर्वजांनी अरण्यात मात्रा खाल्ला तरी ते मेले. स्वर्गातून उतरणारी भाकर अशी आहे की, ती जर कोणी खाल्ली तर तो मरणार नाही. स्वर्गातून उतरलेली जिवंत भाकर मीच आहे, ह्या भाकरीतून जो कोणी खाईल तो सर्वकाळ जगेल, जी भाकर मी देईन ती माझा देह असून जगाच्या जीवनासाठी आहे.”

प्रभूचे हे शुभवर्तमान

सर्व : हे ख्रिस्ता  तुझी स्तुती असो. 

चिंतन :- 'पित्याने आकर्षिल्याशिवाय कोणीही माझ्याकडे येऊ शकत नाही' असे येशू आजच्या शुभवर्तमानात सांगतो. माणसाच्या मनात नाना प्रकारच्या इच्छा-आकांक्षा उत्पन्न होत असतात. मात्र केवळ इच्छा निर्माण झाली, योजना आखली की, आपोआप कृती घडतेच असे नाही. 'माझ्या पित्याने न लावलेले प्रत्येक रोपटे उपटले जाईल’ असे जेव्हा येशू इतरत्र म्हणतो त्याचा अर्थ आपल्या मनातील इच्छा ही परमेश्वराच्या इच्छेला धरून आहे की नाही ह्याची पारख माणसाने करून घेतली पाहिजे. त्यानुसार योग्य तो निर्णय घेतला पाहिजे आणि शेवटी त्या निर्णयाला साजेशी अशी शिस्त आपल्या अंगी बाणली पाहिजे. तेव्हाच इच्छा-पारख- निर्णय - शिस्त- कृती अशी साखळी तयार होते. आजच्या पहिल्या वाचनातील इथिओपियन (कुशी) षंढ ह्या अवस्थेतून जातो. डीकन फिलीपच्या हातून बाप्तिस्मा घेतो आणि ख्रिस्ती जीवन जगू लागतो. अशाप्रकारच्या ख्रिस्ती जीवनात टिकून राहण्यासाठी जीवनाची भाकर ख्रिस्त ह्याच्याशी सतत एकरूप व्हावे लागते. माझ्या इच्छा-आकांक्षा ईश्वरी योजनेला धरून आहेत का ? माझ्या जीवनाचे पोषण कसे होत असते ?

प्रार्थना : हे प्रभू परमेश्वरा, तुझ्या सहवासाचा गोड अनुभव घेण्यास आम्हाला प्रेरणा दे, आमेन.