Marathi Bible Reading | 4th week of the Easter | Monday 26th 2021

 पुनरुत्थान

चौथा  सप्ताह 

सोमवार 

२६ एप्रिल २०२१ 

✝️

संत क्लेटस

 'मी मेंढरांचे दार आहे..'

संत पेत्राला झालेल्या दृष्टांताप्रमाणे पेत्राने परराष्ट्रीयांना सुद्धा मंडळीत समावून घेतले. त्यांना पुनरुत्थित ख्रिस्ताची सुवार्ता सांगितली. प्रभू येशू सर्वांसाठी तारणारा व संरक्षक असल्याची ग्वाही संत पेत्राने दिली. होय, प्रभू येशू सर्वांचा

जीवनदाता व मेंढपाळ आहे.

 प्रभू येशू म्हणत आहे, 'मी मेंढरांचे दार आहे'. प्रभू येशू स्वतःला मेंढपाळाची उपमा देतो . मेंढपाळ आपल्या सर्व मेंढराची काळजी वाहत असतो. त्यांचे  पालन-पोषण करणे, त्यांना कुरणात फिरवणे, त्यांचे संरक्षण करणे, त्यांना बहकू न देता पुन्हा कळपात आणणे हे मेंढपाळाचे काम असते. अनेकदा मेंढपाळाच्या वेषात लांडगे कळपात शिरतात आणि मेंढरांना बहकवून त्यांचे प्राण घेतात. प्रभू येशू अशा लांडग्यांपासून सावध राहून आपल्या कळपाची काळजी घेतो. लांडगे म्हणजेच दुष्ट, स्वार्थी आणि अत्याचारी प्रवृत्तीची माणसे सामान्य लोकांना बहकवित असतात. अनेकदा जगातील प्रलोभनामुळे सुद्धा माणसे बहकतात. 

प्रभू येशू आज सर्वांना एका कळपात येण्याचे आवाहन करीत आहे. प्रभूने  आपला प्राण अर्पण करून आपले तारण केले आहे. आपण बहकू नये व आपला नाश होऊ नये म्हणून तो सतत त्याच्या कृपा संस्कारातून आपल्याला प्रेरणा व  शक्ति देत असतो. प्रभूच्या आज्ञा पाळून त्याच्या कळपातील विश्वासू मेंढरू बनण्यास आपण तत्पर बनू या.

✝️

             

पहिले वाचन  प्रे.  कृ. ११:१-१८

वाचक : प्रेषितांची कृत्ये या पुस्तकातून घेतलेले वाचन 

   "देवाने परराष्ट्रीयांनाही जीवन मिळावे म्हणून पश्चात्तापबुद्धी दिली आहे."

प्रेषितांनी आणि यहुदिया प्रांतात असलेल्या बंधुजनांनी असे ऐकले की, परराष्ट्रीयांनीही देवाचे ग्रहण केले. मग पेत्र येरुशलेमला गेला तेव्हा सुंता झालेले लोक त्याच्याबरोबर वाद घालू लागले की, सुंता न झालेल्या माणसांकडे जाऊन त्यांच्याबरोबर तुम्ही का जेवलात ? तेव्हा पेत्रने अनुक्रमाने सविस्तर सांगण्यास सुरुवात केली, “मी यापो नगरात प्रार्थना करीत होतो. तेव्हा देहभान सुटून मी असा एक दृष्टान्त पाहिला की, एक पात्र उतरले आणि ते मोठ्या चांदव्यासारखे चार कोपरे धरून आकाशातून सोडलेले असे माझ्यापर्यंत आले. त्याच्याकडे मी न्याहाळून पाहून विचार करीत होतो तो पृथ्वीवरले चतुष्पाद,, श्वापदे, सरपटणारे जीव आणि आकाशातील पाखरे माझ्या दृष्टीस पडली आणि मी अशी वाणीही माझ्याबरोबर बोलताना ऐकली की, “पेत्र, ऊठ, मारून खा,” परंतु मी म्हणालो, “नको, प्रभू ! कारण निषिद्ध किंवा अशुद्ध असे काही माझ्या तोंडात अजून कधी गेले नाही. मग दुसऱ्यांदा आकाशातून वाणी होऊन ती मला म्हणाली, “देवाने जे शुद्ध केले आहे ते तू निषिद्ध मानू नको.” असे तीनदा झाले. नंतर ते अवघे सारे पुन्हा आकाशात वर ओढले गेले. इतक्यात पाहा, ज्या घरात आम्ही होतो त्याच्यापुढे कैसरियातून माझ्याकडे पाठवलेली तीन माणसे येऊन उभी राहीली. तेव्हा आत्म्याने मला सांगितले की, काही संशय न धरता त्यांच्याबरोबर जा. मग हे सहा बंधूही माझ्याबरोबर आले आणि आम्ही त्या माणसाच्या घरी गेलो. त्याने आम्हांला सांगितले की, "मी आपल्या घरी देवदूत उभा राहिलेला पाहिला." तो म्हणाला, “यापो येथे कोणाला पाठवून पेत्र म्हटलेल्या शिमोनाला बोलावून आण. ज्यांच्या योगे तुझे आणि तुझ्या सर्व कुटुंबांचे तारण होईल अशा गोष्टी तो तुला सांगेल." मी बोलू लागलो तो, जसा आरंभी आपल्यावर तसा त्यांच्यावरही पवित्र आत्मा उतरला. तेव्हा प्रभूने सांगितलेली गोष्ट मला आठवली, ती अशी की, योहान पाण्याने बाप्तिस्मा करी हे खरे, परंतु तुमचा बाप्तिस्मा पवित्र आत्म्याने होईल. जेव्हा आपण प्रभू येशू ख्रिस्तावर विश्वास ठेवला तेव्हा जसे आपणांला तसे त्यांनाही देवाने सारखेच दान दिले, तर मग देवाला अडवणारा असा मी कोण ?" हे ऐकून ते गप्प राहिले आणि देवाचा गौरव करीत बोलले, “तर मग देवाने परराष्ट्रीयांनाही जीवन मिळावे म्हणून पश्चात्तापबुद्धी दिली आहे."

हा प्रभूचा शब्द आहे 

सर्व : देवाला धन्यवाद.

प्रतिसाद स्तोत्र ४२:२,३,४२:३,४

प्रतिसाद : माझा जीव देवाकरिता तान्हेला आहे.

१) पाण्याच्या प्रवाहासाठी एखादी हरिणी धापा टाकते तसाच माझा जीव हे देवा, तुझ्यासाठी धापा टाकीत आहे. 

२) माझा जीव देवाकरिता, जिवंत देवाकरिता तान्हेला झाला आहे.

३) तुझे तेज, तुझे सत्य प्रकट कर. ते मला मार्गदर्शन करोत. तुझ्या पवित्र डोंगरावर, तुझ्या निवासस्थानी घेऊन जावोत.

४) मग मी देवाच्या वेदीजवळ देव जो माझा परमानंद त्याच्याजवळ जाईन माझ्या उद्धारका, हे देवा, माझ्या देवा, वीणेवर मी तुझे गुणगान गाईन..

जयघोष                                                 

आलेलुया, आलेलुया! 

हे येशूख्रिस्ता, तू विश्वसनीय साक्षी व मेलेल्यांमधून प्रथम जन्मलेला आहेस. तू आम्हांवर प्रीती करतोस आणि आपल्या रक्ताने आम्हांला पापांपासून मुक्त करतोस.

आलेलुया!

शुभवर्तमान योहान १० : १-१०

वाचक :  योहानलिखित शुभवर्तमानातून घेतलेले वाचन

"मी मेंढरांचे दार आहे."

येशू म्हणाला, “मी तुम्हांला खचित सांगतो, जो मेंढवाड्यात दाराने न जाता दुसरीकडून चढून जातो तो चोर आणि लुटारू आहे. जो दाराने जातो तो मेंढपाळ आहे. त्याच्यासाठी द्वारपाळ दार उघडतो. मेंढरे त्याची वाणी ऐकतात आणि तो आपल्या मेंढरांना ज्याच्या त्याच्या नावाने हाक मारतो आणि त्यांना बाहेर नेतो. तो आपली सर्व मेंढरे बाहेर काढल्यावर त्यांच्यापुढे चालतो आणि मेंढरे त्याच्यामागे चालतात, कारण ती त्याची वाणी ओळखतात. ती परक्याच्या मागे कधीच जाणार नाहीत, तर ती त्याच्यापासून दूर पळतील. कारण ती परक्यांची वाणी ओळखत नाहीत." हा दृष्टान्त येशूने त्यांना सांगितला. तरी ज्या गोष्टी तो त्यांच्याबरोबर बोलला त्या काय आहेत हे त्यांना समजले नाही.

म्हणून येशू त्यांना पुन्हा म्हणाला, मी तुम्हांला सत्य सांगतो की, मी मेंढरांचे दार आहे. जे माझ्यापूर्वी आले ते सर्व चोर आणि लुटारू आहेत, त्यांचे मेंढरांनी ऐकले नाही. मी दार आहे, माझ्याद्वारे कोणी आत जाईल तर त्याला तारणाप्राप्ती होईल, तो आत येईल व बाहेर जाईल आणि त्याला खायला मिळेल. चोर येतो तो केवळ चोरी, घात आणि नाश करायला येतो मी तर त्यांना जीवनप्राप्ती व्हावी आणि ती विपुलपणे व्हावी म्हणून आलो आहे."

प्रभूचे हे शुभवर्तमान

सर्व : हे ख्रिस्ता  तुझी स्तुती असो. 

चिंतन :- ‘चोर येतो ते केवळ चोरी, घात आणि नाश करावयास येतो, मी तर त्यांना जीवनप्राप्ती व्हावी आणि ती विपुल प्रमाणात व्हावी म्हणून आलो आहे.' ह्या एका वाक्यात येशूने मानवी जीवनातील एक महान सत्य सांगितलेले आहे. माणसाच्या मनात एखादा वाईट विचार येतो. त्या विचाराला कल्पनाशक्तीची जोड मिळते. हळूहळू तो विचार योजना आखण्यास माणसाला प्रवृत्त करतो. माणसाला त्या योजनेची स्वप्ने पडू लागतात. माणूस संधी शोधू लागतो, कृतियोजना आखू लागतो. चांगल्या विचारांना तो बाजूला सारू लागतो. त्याच्या हातून कृती घडते. ती पुन्हा पुन्हा घडली की, त्याची सवय बनते. त्याची शांती, प्रतिष्ठा, पैसा, आरोग्य, नातेसंबंध धोक्यात येतात. त्याचे चारित्र्य डागाळू लागते. अशाप्रकारे एक वाईट विचार त्याला रसातळाला घेऊन जातो. याउलट एक चांगला विचार उलट क्रमाने त्याला कळसाला घेऊन जातो. माणसाला विपुल प्रमाणात जीवनप्राप्ती देऊन जातो. मात्र त्यासाठी उत्तम मेंढपाळाची वाणी ऐकून माणसाने त्याच्यामागे जायला हवे. माझ्या जीवनात मला सुविचारांची बुद्धी व्हावी व कुविचारांना थारा नसावा म्हणून मी कोणती काळजी घेतो. मी येशूची वाणी ऐकतो की सैतानाची ?

प्रार्थना : हे प्रभू येशू, तू आमचा उत्तम मेंढपाळ आहेस. तुझी वाणी ऐकून तुला अनुसरण्यास आम्हाला प्रेरणा दे, आमेन.