सामान्य काळातील
पंधरावा सप्ताह
शनिवार
१७ जुलै २०२१
संत आलेक्सियस
वर्तनसाक्षी (५ वे शतक)
मोशेच्या नेतृत्वाखाली इसरायली जनतेने मिसर देश सोडला.. परमेश्वराच्या योजनेप्रमाणे लाखोंच्या संख्येने इसरायली लोकांची गुलामगिरीतून मुक्तता झाली. आजच्या पहिल्या वाचनात परमेश्वर जो सर्वांचा रक्षणकर्ता आहे त्याची योजना पूर्णत्वास येते ह्याविषयी सांगण्यात आले आहे.
प्रभू येशू देव पित्याची तारणदायी योजना पूर्णत्वास नेण्यास सिद्ध असल्याचे स्पष्ट करण्यात आले आहे. विरोध असताना सुद्धा 'बरेच लोक त्याच्या मागे चालले, म्हणजेच प्रभू येशूला अनुसरून त्याची शिकवणूक आचारणात आणू लागले. अनुसरणाऱ्या सर्वांना प्रभू येशूने बरे केले. ह्याचा अर्थ व्यापक स्वरुपात लावला जाऊ शकतो.
प्रभू येशूने लोकांना आजारातून बरे केले.
संकटग्रस्त लोकांना धीर देऊन त्यांचे सांत्वन केले.
अशुद्ध आत्म्याने पीडित असलेल्यांना बंधमुक्त केले,
अंधांना दृष्टीदान,
बहिरे व मुक्यांना वाचा
आणि भुकेल्यांस अन्नसुद्धा प्रभूने पुरवले. प्रभूच्या मागे चालणाऱ्या अशा सर्वांनी प्रभू येशू हाच एकमेव तारणारा आहे हे स्वीकारले.
प्रभू शब्दाचे ग्रहण करुन त्यावर चिंतन-मनन करणारी आणि प्रभूच्या| शिकवणुकीप्रमाणे आचरण करणारी प्रत्येक व्यक्ती खऱ्या अर्थाने प्रभूच्या मागे चालत असते. अशा माणसांच्या जीवनात प्रभू आमुलाग्र परिवर्तन घडवून आणित असतो, अशी माणसे स्वतः बरोबरच इतरांच्या जीवनात सुद्धा आनंद निर्माण करु लागतात.
✝️
“पाहा, हा माझा सेवक, ह्याला मी निवडले आहे, तो मला परमप्रिय आहे.
✝️
वाचक : निर्गम या पुस्तकातून घेतलेले वाचन
"परमेश्वराने त्यांना इजिप्त देशातून बाहेर आणले ह्याकरिता परमेश्वराप्रीत्यर्थ ही जागरणाची रात्र आहे."
इस्राएल लोक रामसेस येथून कूच करून सुक्कोथ येथे गेले; जे पुरुष पायी गेले ते मुलेबाळे खेरीजकरून सुमारे सहा लाख होते. त्याच्याबरोबर एक मोठा मिश्र समुदाय पण गेला; तशीच शेरडेमेंढरे, गुरेढोरे वगैरे पुष्कळ जनावरे गेली. त्यांनी आपल्याबरोबर इजिप्त देशातून मळलेली कणीक आणली होती, तिच्या बेखमीर भाकऱ्या भाजल्या, तिच्यात काहीच खमीर नव्हते; इजिप्त देशातून त्यांना जबरीने बाहेर काढले होते, म्हणून त्यांना थांबायला वेळ मिळाला नाही. त्यांना खाण्यास काही तयार करून घेता आले नाही. इस्राएल लोकांना इजिप्त देशात राहून चारशेतीस वर्षे लोटली होती. चारशेतीस वर्षे संपली त्याच दिवशी परमेश्वराच्या सर्व सेना इजिप्त देशातून निघाल्या. परमेश्वराने त्यांस इजिप्त देशातून बाहेर आणले ह्याकरिता परमेश्वराप्रीत्यर्थ ही जागरणाची रात्र आहे. इस्राएल लोकांसाठी पिढ्यान्पिढ्या परमेश्वराप्रीत्यर्थ ही जागरणाची रात्र आहे म्हणून अवश्य पाळावी.
हा प्रभूचा शब्द आहे.
सर्व : देवाला धन्यवाद.
प्रतिसाद स्तोत्र १३६:१.२३-२४,१०-१२,१३-१५
प्रतिसाद : “परमेश्वराच्या महान प्रेमाला सीमा नाही.”
१) आलेलुया !
परमेश्वराचे उपकारस्मरण करा,
कारण तो चांगला आहे.
कारण त्याची दया सनातन आहे.
त्याने आमच्या दैन्यावस्थेत आमची आठवण केली,
कारण त्याची दया सनातन आहे.
त्याने आम्हाला आमच्या शत्रूपासून सोडवले,
करण त्याची दया सनातन आहे.
२) त्याने इजिप्त देशातील प्रथम जन्मलेले मारून टाकले,
कारण त्याची दया सनातन आहे.
ज्यांने इजिप्तच्या लोकांतून इस्राएल लोकांना बाहेर आणले,
कारण त्याची दया सनातन आहे.
त्याने प्रतापी हाताने आणि पुढे केलेल्या बाहूने त्यांना बाहेर आणले,
कारण त्याची दया सनातन आहे.
३) त्याने तांबडा समुद्र दुभागला, कारण त्याची दया सनातन आहे;
त्याने इस्राएलला त्यामधून पार नेले,
कारण त्याची दया सनातन आहे; त्याने फारोला आणि त्याच्या सैन्याला तांबड्या समुद्रात गडप केले, कारण त्याची दया सनातन आहे.
जयघोष
आलेलुया, आलेलुया !
आलेलुया, आलेलुया! तुझे वचन माझ्या पावलांकरिता दिव्यासारखे आणि माझ्या मार्गावर प्रकाशासारखे आहे. आलेलुया !
आलेलुया!
शुभवर्तमान मत्तय १२:१४-२१
वाचक: मत्तयलिखित शुभवर्तमानातून घेतलेले वाचन
“जे आजारातून बरे झाले होते त्यांना येशूने यशया संदेष्ट्याद्वारे जे सांगितले होते ते पूर्ण व्हावे म्हणून ताकीद दिली की, मला प्रकट करू नका."
परुश्यांनी बाहेर जाऊन येशूचा घात कसा करावा अशी त्याच्याविरूद्ध मसलत केली.पण हे ओळखून येशू तेथून निघाला. तेव्हा बरेच लोक त्याच्यामागून चालले आणि त्या सर्वांना त्याने बरे केले आणि यशया संदेष्ट्याच्या द्वारे जे सांगितले होते, ते पूर्ण व्हावे; म्हणून मला प्रकट करू नका अशी त्यांना ताकीद दिली. यशयाद्वारे सांगितले होते, “पाहा, हा माझा सेवक, ह्याला मी निवडले आहे, तो मला परमप्रिय आहे. त्याच्याविषयी माझा जीव संतुष्ट आहे; त्याच्यावर मी आपला आत्मा घालीन, तो परराष्ट्रीयांना न्याय कळवील. तो भांडणार नाही आणि ओरडणार नाही आणि रस्त्यांवर त्याची वाणी कोणाला ऐकू येणार नाही; चेपलेला बोरू तो मोडणार नाही आणि ; मिणमिणती वात विझवणार नाही; तो न्यायाला विजय देईल तोपर्यंत असे होईल आणि परराष्ट्रीय त्याच्या नावाची आशा धरतील.”
प्रभूचे हे शुभवर्तमान
सर्व : हे ख्रिस्ता तुझी स्तुती असो.
चिंतन : - आजच्या शुभवर्तमानात परूशी येशूला मारण्याविषयी मसलत करत असल्याविषयी आपण ऐकतो. येशूची शिकवण त्यांना आपल्या सामाजिक प्रतिष्ठेला धोकादायक वाटत होती म्हणून ते येशूविरुद्ध कट करू लागले होते. परुशी काय करीत आहेत हे माहित असूनसुद्धा येशू शांत राहतो. त्यांच्याबरोबर वादविवाद न करता तो तेथून निघून जाणे उचित समजतो. आपल्या जीवनात जेव्हा असे प्रसंग येतात तेव्हा आपण स्वतःला सिद्ध करण्यासाठी बाचाबाची करतो. परंतु येशू आज आपणास अगदी विरुद्ध वागण्यास सांगत आहे. येशूप्रमाणे समंजस वागता यावे म्हणून प्रार्थना करू या. तसेच जेव्हा आपल्या आजूबाजूला लोक क्षुल्लक कारणावरून भांडण करतात तेव्हा आपली भूमिका काय असते? आपण बघ्याची भूमिका घेतो की अश्या व्यक्तींना योग्य सल्ला देऊन त्यांच्यात सलोखा निर्माण करण्याचा प्रयत्न करतो ?
प्रार्थना: हे प्रभू येशू, तुला सर्वार्थाने जाणण्यास व तुझी शिकवण आत्मसात करुन खरे ख्रिस्ती जीवन जगण्यास आम्हाला प्रेरणा दे, आमेन.
0 टिप्पण्या