Marathi Bible Reading

सामान्य काळातील ३४वा सप्ताह

गुरुवार

२५ नोव्हेंबर २०२१

"मनुष्याचा पुत्र पराक्रमाने व मोठ्या वैभवाने मेघांतून येतांना लोकांच्या दृष्टीस पडेल. "

आलेक्झांड्रियाची संत कॅथरीन

दारयावेश राजाच्या दरबारी असताना दानीएलला राजाज्ञाविरुद्ध गुन्हा केल्याची शिक्षा देण्यात आली. दानीएलला हिंस्त्र सिंहाच्या गुहेत टाकण्यात आले, मात्र देवावरील विश्वासामुळे सिंहानी त्याला उपद्रव केला नाही. त्यावेळी राजाने फर्मान काढून जाहीर केलेले शब्द पुढील प्रमाणे आहेत. 'माझ्या साम्राज्याच्या सर्व हद्दीतील लोकांनी दानीएलच्या देवापुढे कंपित होऊन त्याचे भय धरावे, कारण तो जिवंत देव आहे, तो सर्वकाळ जवळ आहे, तो बचाव करणारा व मुक्तिदाता आहे, तो आकाशात व पृथ्वीवर चिन्हे व उत्पात घडविणारा आहे. आजच्या पहिल्या वाचनातील हा संदेश सर्वर्थाने मुक्तिचा संदेश आहे.

सर्व विश्वासणाऱ्यांचे पुनरुत्थान आहे आणि सर्वांना ख्रिस्ताच्या पुनरुत्थान समयी मुक्तता आहे, मात्र त्यासाठी प्रभूच्या वचनांप्रमाणे जीवन आचरण करण्याची गरज आहे. प्रभू येशू ख्रिस्त वैभवाने पुन्हा येणार आहे, ह्याचा उल्लेख पवित्र शास्त्रामध्ये तिनशे वेळा आला आहे. मात्र ती घटका व वेळ कधी येईल ह्याचा उल्लेख नाही. त्या घटनेला प्रभू येशू 'मुक्तिसमय' म्हणत आहे. मात्र ‘मुक्तिसमय' येण्याआधी घडणाऱ्या चिन्हे आणि घटनाविषयी प्रभू येशू पुर्वसुचना देत आहे. जे विश्वासाने धीराने प्रभूच्या येण्याची तयारी करुन वाट पाहत आहेत त्यांचे तारण होईल.

आपण आपल्या प्रभूच्या पुन्हा येण्याच्या स्वागतासाठी तयार आहोत का? देवावरील दृढश्रद्धा, प्रार्थना, सत्कृत्ये, परस्परप्रेम व सेवा करुन आपण सर्वदा आचरणाने शुद्धा बनून स्थिर व तयार असावे.

✝️

पहिले वाचन :दानिएल ६:११-२७

वाचक :दानिएल या पुस्तकातून घेतलेले वाचन

“देवाने आपला दूत पाठवून सिंहाची तोंडे बंद केली."

अध्यक्ष व प्रांताधिकारी जमावाने आले तेव्हा दानिएल आपल्या देवाची प्रार्थना आणि आराधना करत आहे असे त्यांना आढळून आले. तेव्हा ते राजाजवळ जाऊन त्याने फिरवलेल्या द्वाहीविषयी त्याला म्हणाले, “महाराज, तीन दिवसभर जो कोणी आपणाशिवाय कोणा देवाची अथवा मनुष्याची आराधना करील त्यांना सिंहांच्या गुहेत टाकावे अशी द्वाही आपण फिरवली ना?” राजाने उत्तर दिले की, "मेदी आणि पारशी यांच्या न पालटणाऱ्या कायद्याप्रमाणे हे निश्चित ठरवले आहे.” तेव्हा ते राजाला म्हणाले, "महाराज, पकडून आणलेल्या यहुद्यांपैकी तो दानिएल, आपणांला आणि आपण सही केलेल्या द्वाहीला जुमानत नाही, तर तो नित्य तीनदा प्रार्थना करतो." हे शब्द ऐकून राजा फार खिन्न झाला आणि दानिएलचा बचाव करण्याचा तो विचार करू लागला, त्याचा बचाव करावा म्हणून त्याने सूर्य मावळेपर्यंत प्रयत्न केला. मग ती माणसे राजाकडे जमावाने आली आणि त्याला म्हणाली, "हे राजा, हे लक्षात आण, मेदी आणि पारसी यांचा असा दंडक आहे की, राजाने फिरवलेल्या द्वाह्या किंवा केलेले नियम पालटता येत नाहीत."

त्यावर राजाज्ञेवरून दानिएलला आणवून सिंहाच्या गुहेत टाकले. राजा दानिएलला म्हणाला, "ज्या देवाची तू नित्य सेवा करतोस तो देव तुझी सुटका करो.” त्यांनी एक शिला आणून गुहेच्या दारावर ठेवली आणि राजाने आपल्या मुद्रेचा आणि आपल्या सरदारांच्या मुद्रांचा तिच्यावर शिक्का मारला, तो अशासाठी की, दानिएलच्या बाबतीत काहीएक फेरबदल होऊ नये. नंतर राजा आपल्या महालात गेला. त्याने ती रात्र उपाशीच काढली. त्याच्यासमोर वाद्ये आणली नाहीत, त्याची झोप उडाली.

मग राजा मोठ्या पहाटेस उठून त्वरेने सिंहाच्या गुहेनजीक गेला. तो गुहेजवळ दानिएलकडे जाऊन शोकस्वराने ओरडून म्हणाला, "हे दानिएल, जिवंत देवाच्या सेवका, ज्या देवाची सेवा तू नित्य करतोस त्याला सिंहापासून तुला सोडवता आले आहे काय ?" दानिएल राजाला म्हणाला, "महाराज चिरायू व्हा. माझ्या देवाने आपला दूत पाठवून सिंहाची तोंडे बंद केली, त्यांनी मला काहीएक उपद्रव केला नाही. कारण त्या देवासमोर मी निरपराधी ठरलो आणि महाराज, आपलाही मी काही अपराध केला नाही." तेव्हा राजाने अत्यंत हर्षित होऊन आज्ञा केली की, दानिएलला गुहेतून बाहेर काढा. त्यांना गुहेतून बाहेर काढले तो त्याला काही इजा झाल्याचे दिसून आले नाही, कारण त्याचा आपल्या देवावर पूर्ण विश्वास होता. तेव्हा ज्या माणसांनी दानिएलवर आरोप आणला होता, त्यांना राजाज्ञेवरून पकडून आणले आणि त्यांना व त्यांच्या बायकामुलांना सिंहाच्या गुहेत टाकले, तेव्हा ते सिंहाच्या तडाक्यात सापडून त्या गुहेच्या तळाशी पोहचण्यापूर्वीच त्या सर्वांच्या हाडांचा त्यांनी चुराडा केला.

मग पृथ्वीवरील सर्व लोकांना, सर्व राष्ट्रांच्या आणि सर्व भाषा बोलणाऱ्या लोकांना, दारियावेश राजाने असे लिहून कळवले की, "तुमचे कल्याण असो, मी फर्मावतो की, माझ्या साम्राज्याच्या सर्व हद्दीतील लोकांनी दानिएलच्या देवापुढे कंपित होऊन त्याचे भय धरावे,कारण तो जिवंत आहे, तो सर्वकाळ जवळ आहे. त्याचे राज्य अविनाशी आणि त्याचे प्रभुत्व अनंत आहे. ज्याने दानिएलला सिंहाच्या पंजातून सोडवले तोच बचाव करणारा आणि मुक्तिदाता आहे. तो आकाशात आणि पृथ्वीवर चिन्हे आणि उत्पात घडवणारा आहे.

हा प्रभूचा शब्द आहे.

सर्व : देवाला धन्यवाद.

प्रतिसाद स्तोत्र दानिएल ३ : ६८-७४

प्रतिसाद : प्रभूची स्तवने गा, आणि सर्वकाळ त्याची प्रशंसा करा.

१) हिम आणि दवबिंदूंनो, प्रभूला धन्यवाद द्या: