शुभवर्तमान मत्तय १५: २९-३७
वाचक : मत्तयलिखित शुभवर्तमानातून घेतलेल वाचन
"येशू अनेकांना बरे करतो आणि भाकरींचा चमत्कार करतो."
येशू सोर नि सिदोन भागातून निघून गालील सरोवराच्या बाजूने पुढे डोंगराळ भागात गेला आणि तेथे बसला. तेव्हा लोकांच्या झुंडीच्या झुंडी त्याच्याकडे लोटल्या. लंगडे, पांगळे, आंधळे, मुके अशा अनेकांना लोकांनी आणून येशूच्या पायांवर घातले. तेव्हा येशूने त्यांना बरे केले. मुके बोलू लागले, पांगळे बरे झाले, लंगडे चालू लागले आणि आंधळ्यांना दिसू लागले हे पाहून लोक चकित झाले आणि त्यांनी इस्राएलच्या देवाला धन्यवाद दिले.मग आपल्या शिष्यांना जवळ बोलावून येशू त्यांना म्हणाला, "मला या जनसमुदायाची दया येते. गेले तीन दिवस ते माझ्याबरोबर आहेत. त्यांना खायला काही नाही. त्यांना उपाशी परत पाठवायची माझी इच्छा नाही, कारण कदाचित वाटेत ते कासावीस होतील.” “या निर्जन प्रदेशात एवढ्या मोठ्या जमावाला खाऊ घालायला पुरेशा भाकरी आम्हांला कुठून मिळणार ?” शिष्यांनी त्याला विचारले. येशू त्यांना म्हणाला, “किती भाकरी आहेत तुमच्याजवळ ?" “सात आणि थोडे लहान मासे," ते म्हणाले. मग लोकांना जमिनीवर बसायची आज्ञा करून येशूने त्या सात भाकरी आणि मासे घेतले, देवाचे आभार मानून त्यांचे तुकडे केले आणि शिष्यांजवळ ते दिले. शिष्य ते लोकसमुदायाला वाढत गेले. तेव्हा ते सगळे जेवून तृप्त झाले. नंतर शिष्यांनी उरलेले तुकडे जमा केले ते सात पाट्या भरले.
प्रभूचे हे शुभवर्तमान
सर्व : हे ख्रिस्ता तुझी स्तुती असो.
चिंतन: प्रारंभीच्या ख्रिस्तसभेमध्ये भाकरीच्या चमत्काराला अतिशय महत्वाचे स्थान प्राप्त झालेले होते. रोमच्या कॅटाकोम्बमध्ये जतन करून ठेवण्यात आलेल्या ख्रिस्ती चित्रकलेमध्ये ह्या चमत्कारात दडलेला पवित्र मिस्साच्या उगमाचे प्रतिबिंब पडलेले आहे. खरे पाहता शुभवर्तमानकारांनी प्रत्यक्ष ह्या घटनेचे वर्णन लेखी स्वरूपात आपल्या शुभवर्तमानामध्ये करण्यापूर्वीच हे चमत्कार आणि त्यांचा पवित्र मिस्साशी असलेला संबंध मौखिक किंवा तोंडी परंपरेमध्ये अभिप्रेत असावा. काही तज्ञांच्या मते कदाचित पवित्र मिस्सा - विषयीचे धर्मशिक्षण ख्रिस्ती होऊ पाहणाऱ्या इच्छुक उमेदवारांना देताना भाकरींच्या चमत्कारांचा आधार हमखास धर्मशिक्षकांनी घेतलेला असावा. अरण्यात जाणे, सहभोजन घेणे, प्रेषित आणि येशूचा सहवास लाभणे, जेवून तृप्त होणे, गटागटात बसणे ह्या सगळ्या कृती प्रारंभीच्या ख्रिस्तसभेतील पवित्र मिस्साच्या वेळी तयार होणाऱ्या धार्मिक वातावरणाची चिन्हे मानली जातात. त्याच दृष्टीकोनातून आपण जेव्हा पवित्र मिस्साबलीतील भाषा आणि भाकरीच्या चमत्कारातील भाषा ह्यांची तुलना करतो तेव्हा तेव्हा त्यांचा परस्परसंबंध असल्याचे आपल्याला स्पष्टपणे दिसून येतो..
प्रार्थना :- हे प्रभू, तुझ्या सार्वकालिक जीवनात सहभागी होण्यास पात्र बनावेत म्हणून आम्हाला तुझा करुणायुक्त स्पर्श कर, आमेन.
सिनडसाठी प्रार्थना
हे पवित्र आत्म्या, तुझ्या नावाने एकत्र येऊन
आम्ही तुझ्यासमोर उभे राहतो.
तू आमचा एकमेव मार्गदर्शक आहेस,
आमच्या हृदयात तू वस्ती कर;
आम्ही पुढे कसे जावे याबद्दल आम्हांला मार्गदर्शन कर
आणि त्या मार्गाशी आम्हांला एकनिष्ठ ठेव.
आम्ही दुर्बळ आणि पापी आहोत;
अस्थिरतेपासून आम्हाला दूर ठेव;
अज्ञानाने आमचा मार्ग भ्रष्ट होऊ देऊ नकोस,
पक्षपाताचा आमच्या कृतीवर प्रभाव पडू देऊ नकोस.
हे पवित्र आत्म्या,
तुझ्यामध्ये आम्हाला आमचे ऐक्य पाहू देः
म्हणजे आम्ही शाश्वत जीवनाकडे एकत्र वाटचाल करू
आणि सत्याच्या व योग्यतेच्या मार्गापासूनआम्ही भरकटणार नाही.
पिता आणि पुत्र ह्यांच्या ऐक्यात
तू सर्वत्र आणि सर्वकाळ कार्य करतोस
त्या तुझ्याकडे हे सर्व आम्ही मागतो, आमेन !
0 टिप्पण्या