आगमनकाळातील पहिला सप्ताह
शनिवार
४ डिसेंबर २०२१
स्वर्गराज्य जवळ आले आहे.
संत जॉन दमासिन
वर्तनसाक्षी, धर्मपाल व धर्मपंडित (६५०-७५३)
आत्यंतिक तळमळीने केलेल्या प्रार्थनेविना केवळ बुद्धीच्या जोरावर केलेला विचार ही मेंदूची शुष्क करामत वा कसरत ठरते. जशी वाऱ्याने एखादी मेणबत्ती विझावी तसे नम्र, शांत अशा आत्मिक प्रार्थनेने ज्ञानाचा गर्वही नाहीसा होतो. - संत जॉन दमासिन
यशया संदेष्टा आजच्या पहिल्या वाचनात देवकृपेचे अभिवचन देत आहे. भूमि पीक देईल, भाकरीची टंचाई भासणार नाही, पाऊस पडेल, डोंगरावरून झरे वाहतील. परमेश्वर आपल्या लोकांचे घाय बांधील, त्यांच्या प्रहाराच्या जखमा बऱ्या करील. हे अभिवचन म्हणजेच देवराज्य आहे. यशयाची हीच भविष्यवाणी प्रभू येशूद्वारे पूर्णत्वास आली.
स्वर्गराज्याची घोषणा करुन प्रभू येशूने ते प्रत्यक्षपणे साकारले. सामान्यजनांच्या गरजेनुसार प्रभू येशू ख्रिस्ताने त्यांचे आजार बरे केले, आंधळ्यांना दृष्टी दिली, पांगळ्यांना शक्ती दिली, भूतग्रस्तांस बंधमुक्त केले, भूकेल्यांस अन्न दिले. इतकेच नव्हे तर मृतांना जिवंत सुद्धा केले. शिष्यांसोबत देवराज्याची सुवार्ता पसरवित असताना प्रभू येशूने आपल्या शिष्यांची निवड करुन त्यांना म्हटले, 'रोग्यांस बरे करा, मेलेल्यांस उठवा, कुष्ट्यांस शुद्ध करा, भूते काढा.' प्रभू येशूने स्वर्गाचे राज्य भूतलावर आणण्यासाठी आपल्या निवडलेल्या शिष्यांना पाचारण करुन अधिकार बहाल केले आहेत. प्रभू येशूच्या नावाने, सामर्थ्याने आणि कृपेने प्रेषितांनी विश्वासाने प्रभूचे सुवार्ता कार्य पसरविले. प्रभू येशू ख्रिस्ताने तोच अधिकार त्याच्या नावाने बाप्तिस्मा घेतलेल्या प्रत्येकाला दिलेला आहे. सर्व ख्रिस्ती जनांना देवराज्याची सुवार्ता पसरविण्यासाठी पाचारण करण्यात आले आहे.
प्रभूच्या तारणदायी कृपासामर्थ्यावर विश्वास ठेवून आपण जीवन आचरण
करतो का ह्यावर आज चिंतन करु या. आपल्या दररोजच्या जीवनात प्रभूला प्राधान्य देऊन त्याची सुवार्ता पसरविण्यास व देवराज्य अनुभवण्यास प्रेरणा लाभावी म्हणून प्रयत्नशील बनू या..
✝️
पहिले वाचन : यशया ३० :१९-२१,२३-२६
वाचक :यशया या पुस्तकातून घेतलेले वाचन
"तुझ्या विनवणीमुळे प्रभू तुझ्यावर कृपा करील."
इस्राएलचा प्रभू परमेश्वर म्हणतो:
“सियोनात, येरुशलेमात, लोकांची वस्ती राहील. तू यापुढे कधी शोक करणार नाहीस. तुझ्या विनवणीच्या शब्दांबरोबर तुझ्यावर अवश्य कृपा करील. ती ऐकताच तो तुला पावेल. प्रभू भाकरीची टंचाई आणि पाण्याचे दुर्भिक्ष्य करील, ती यापुढे तुझे शिक्षक दृष्टिआड राहणार नाहीत. तुझ्या डोळ्यांना तुझे शिक्षक दिसतील. हाच मार्ग आहे, या मार्गाने चला, अशी वाणी तुमच्या मागून कानी पडेल. मग तुम्हांला उजवीकडे जावयाचे असो किंवा डावीकडे जावयाचे असो. तू आपले बी पेरशील त्यावर तो पाऊस पाडील. भूमी पीक देईल. ते अन्न रसभरित आणि सत्त्वपूर्ण असेल. त्या काळी तुझी गुरेढोरे विस्तीर्ण कुरणात चरतील. शेतात राबणारे बैल आणि जवान गाढव यांना दाताळ्याने उफणलेल्या आणि सुपाने पाखडलेल्या धन्याचे आंबवण खायला मिळेल. मोठ्या कत्तलीच्या दिवशी बुरुज पडतील तेव्हा उंच डोंगरावर आणि प्रत्येक उंच टेकडीवर झरे व ओहोळ होतील. त्या दिवशी परमेश्वर आपल्या लोकांच्या जखमा बांधील, त्याच्या प्रहाराच्या जखमा बऱ्या करील, त्या दिवशी चंद्रप्रकाश सूर्यप्रकाशासारखा आणि सूर्यप्रकाश सात दिवसांच्या प्रकाशासारखा मोठा होईल'
हा प्रभूचा शब्द आहे.
सर्व : देवाला धन्यवाद.
प्रतिसाद स्तोत्र १४७:१-६
प्रतिसाद : जे परमेश्वराची आशा बाळगतात ते सर्व धन्य.
१) प्रभूचे स्तवन करा. आपल्या देवाचे गुणगान करणे
चांगले आहे. त्याचे स्तवन करणे
सुखदायक आणि योग्य आहे.
प्रभू येरुशलेम उभारतो.
पांगलेल्या इस्रायलला गोळा करतो.
२) भग्नहृदयी लोकांना तो बरे करतो.
त्यांच्या जखमांवर पट्ट्या बांधतो.
तो ताऱ्यांची गणती करतो.
त्या सर्वांना नावे देतो.
३) आमचा स्वामी महान आहे.
त्याचे सामर्थ्य प्रचंड आहे.
त्याची बुद्धिमत्ता कल्पनातीत आहे.
नम्रजनांना प्रभू उचलून धरतो.
दुर्जनांना धुळीस मिळवतो.
जयघोष
आलेलुया, आलेलुया !
परमेश्वर प्राप्तीचा काळ आहे तोवर त्याला शोधा, तो जवळ आहे तोच त्याचा धावा करा.
आलेलुया!
शुभवर्तमान मत्तय ९: ३५-१०:१,६-८
वाचक : मत्तयलिखित शुभवर्तमानातून घेतलेले वाचन
येशूने लोकसमुदाय पाहिला तेव्हा त्याचा त्याला कळवळा आला.
येशू साऱ्या शहरातून आणि गावातून फिरत होता. त्याने त्यांच्या सभास्थानांतून शिक्षण दिले, स्वर्गराज्याचा शुभसंदेश दिला आणि सर्व प्रकारच्या रोगदुखण्यांनी पीडलेल्यांना बरे केले. त्याने लोकसमुदायाला पाहिले तेव्हा त्यांचा त्याला कळवळा आला, कारण ते मेंढपाळ नसलेल्या मेंढरांसारखे गांजलेले आणि पांगलेले होते. मग तो शिष्यांना म्हणाला, “पीक फार आहे खरे, पण कामगार थोडे आहेत, ह्यास्तव पिकाच्या धन्याने आपल्या कापणीसाठी कामगार पाठवून द्यावेत म्हणून त्याची प्रार्थना करा." येशूने मग आपल्या बारा शिष्यांना आपल्याजवळ एकत्र बोलावून त्यांना भुताखेतांवर सत्ता देऊन ते काढून टाकण्याचा आणि सर्व प्रकारचे रोग आणि दुखणी बरी करण्याचा अधिकार दिला.त्या बारा जणांना येशूने अशी आज्ञा देऊन पाठवले, "इस्राएल घराण्यातल्या हरवलेल्या मेंढरांकडे जा. जाता जाता अशी घोषणा करा, की, स्वर्गराज्य जवळ आले आहे. रोग्यांना बरे करा, मेलेल्यांना जिवंत करा, महारोग्यांना शुद्ध करा, भुते काढा. तुम्हांला विनामूल्य मिळाले आहे, तुम्हीही विनामूल्य द्या.'
प्रभूचे हे शुभवर्तमान
सर्व : हे ख्रिस्ता तुझी स्तुती असो.
चिंतन: परमेश्वराचे आगमन मनुष्यजातीमध्ये आणि निसर्गामध्ये अमुलाग्र बदल घडवून आणत असतात. परमेश्वराच्या आगमनाने घडून येणारे बदल यशया संदेष्टा आपल्यासमोर सादर करतो. भरभराट, समृद्धी, मार्गदर्शन, मुक्ती, संरक्षण, तृप्ती, समाधान, मनःशांती, आत्मविश्वास अशा 3 सद्गुणांनी सृष्टी मानवजात समृद्ध आहे. यशयाने मांडलेले हे चित्र प्रभू येशूच्या कार्यात पुढे कसे गेले |त्याचे वर्णन शुभवर्तमानात ऐकावयास मिळते. प्रथम येशू स्वतः हे स्वप्न सत्यात उतरवितो. त्यानंतर तो आपल्या शिष्यांना प्रार्थना करायला सांगतो आणि तिसऱ्या टप्प्यात तो आपल्या शिष्यांना विशेष अधिकार देऊन त्यांना प्रेषितीय कामगिरीवर पाठवितो. पूर्वी इस्त्रायलपुरता मर्यादित असलेले कार्य पुढे येशू सर्व राष्ट्रांसाठी खुले करतो.
प्रार्थना :- हे प्रभू येशू, तुझ्या आज्ञेप्रमाणे जीवन आचरण करुन तुझी साक्ष इतरांना देण्यास आम्ही तत्पर असावे म्हणून आम्हाला प्रेरणा दे, आमेन.
सिनडसाठी प्रार्थना
हे पवित्र आत्म्या, तुझ्या नावाने एकत्र येऊन
आम्ही तुझ्यासमोर उभे राहतो.
तू आमचा एकमेव मार्गदर्शक आहेस,
आमच्या हृदयात तू वस्ती कर;
आम्ही पुढे कसे जावे याबद्दल आम्हांला मार्गदर्शन कर
आणि त्या मार्गाशी आम्हांला एकनिष्ठ ठेव.
आम्ही दुर्बळ आणि पापी आहोत;
अस्थिरतेपासून आम्हाला दूर ठेव;
अज्ञानाने आमचा मार्ग भ्रष्ट होऊ देऊ नकोस,
पक्षपाताचा आमच्या कृतीवर प्रभाव पडू देऊ नकोस.
हे पवित्र आत्म्या,
तुझ्यामध्ये आम्हाला आमचे ऐक्य पाहू देः
म्हणजे आम्ही शाश्वत जीवनाकडे एकत्र वाटचाल करू
आणि सत्याच्या व योग्यतेच्या मार्गापासूनआम्ही भरकटणार नाही.
पिता आणि पुत्र ह्यांच्या ऐक्यात
तू सर्वत्र आणि सर्वकाळ कार्य करतोस
त्या तुझ्याकडे हे सर्व आम्ही मागतो, आमेन !
✝️
0 टिप्पण्या