Marathi Bible Reading | Friday 14th January 2022 |1st Week in Ordinary Time

सामान्यकाळातील पहिला सप्ताह

शुक्रवार दि. १४ जानेवारी  २०२२
✝️ 
 'तुझ्या पापांची क्षमा झाली आहे,' 

✝️

धन्यवादीत देवसहायम् पिल्लय

रक्तसाक्षी

(२३ एप्रील १७१२ - १४ जानेवारी १७५२)

 पोप फ्रान्सिस हे देवसाय पिल्लई ह्यांना १५ मे २०२२ रोजी संत म्हणून घोषित करतील

देवसहायम् पिल्लय (जन्माच्या वेळचे मूळ नाव निळकंठ पिल्लय) ह्यांचा जन्म एका श्रिमंत नायर समाजातील कुटूंबात नत्तालम् ह्या सध्याच्या कन्याकुमारी जिल्ह्यातील ठिकाणी २३ एप्रील १७१२ रोजी झाला होता. नायर समाजातील तत्कालीन मातृसत्ताक परंपरेत देवसहायम् पिल्लय ह्यांची जडनघडन त्यांच्या मामांनी केली, आणि लवकरच त्यांना हिंदू श्रद्धा व परंपरा ह्यांचेही ज्ञान झाले.

     देवसहायम् ह्यांच्या  कुटूंबावर त्रवणकोरचे राजे महाराजा मारतंड वर्मा ह्यांच्या शाही महालाचा प्रभाव होता, आणि देवसहायम् तरुणपणी महालात सेवेसाठी रुजू झाले. त्यांच्या क्षमता व उत्साह महालात दुर्लक्षीत राहिला नाही, त्यामुळे लवकरच त्यांना त्रवणकोरचे दिवण रामायन दलावा ह्यांच्या अधिकाराखाली राज्यातील घडामोडींचे अधिकृत प्रमूख म्हणून नेमण्यात आले.

 ख्रिस्ती श्रद्धेत परिवर्तन:

१७४१ मध्ये एड डच नौदल कमांडर कॅप्टन युस्टाचीयस डी लॅनॉय ह्यांना डच इंस्ट इंडिया कंपनी मार्फत त्रवणकोरच्या अखत्यारीत असलेल्या कोलाचेल ह्या बंदरावर नौदलाच्या एका मोहिमेसाठी पाठवण्यात आले होते. त्रवणकोरचे सैन्य आणि डि लॅनॉय ह्यांची माणसे ह्यांच्यात झालेल्या लढाईत डच सैन्यांची हार झाली आणि त्यांची अनेक माणसे मारली गेली व अनेक कैद करण्यात आली. युस्टाचियस डी लॅनॉय, त्याचा साथीदार डोनाडी आणि आणखी काही डच सैनीक कैदेत ठेवण्यात आले.

डी लॅनॉय व त्याच्या सैनिकांना नंतर राजाकडून ह्या अटीवर अभय मिळाले की ते त्रवणकोरच्या लष्करात सेवा देतील. डी लॅनॉय नंतर अनेक लढाया जिंकून व अनेक शेजारील राज्ये त्रवणकोरला मिळवून देऊन राजाची मर्जी संपादन करून त्रवणकोर लष्करात कंमांडर बनला.

 राजाच्या मर्जीत असतानात डी लॅनॉय आणि देवसहायम् पिल्लय ह्यांचा चांगला परिचय झाला. डी लॅनॉयच्या ख्रिस्ती श्रद्धेत देवसहायम् ह्यांना रसवाटू लागला आणि डी लॅनॉय कडून त्यांच्या मनात ही श्रद्धेची ज्योत प्रज्वलीत केली ज्याचे पर्यावसन १७४५ सालच्या त्यांच्या धर्मपरिवर्तनात झाले.

स्नानसंस्कार: ख्रिस्ती श्रद्धेचा स्विकार करून देवसहायम ह्यांनी वडक्कनकुलम गावातील(आताच्या तमीलनाडूतील तिरुनेलवेली जिल्ह्यातील) रोमन कॅथोलीक लॅटीन राईट चर्च मध्ये बाप्तीस्मा घेतला, जिथे येशुसंघीय धर्मगुरू मठ चालवीत असत. निळकंठ पिल्लय हे त्यांचे जन्माच्या वेळचे नाव त्यावेळी बदलून लाझर ठेवण्यात आले तरी ते त्यांच्या नावाच्या तमीळ व मल्याळम भाषांतराने बनणारे देवसहायम ह्या नावानेच सगळीकडे सुपरिचीत आहेत(ज्याचा अर्थ होतो देवाचे सहाय). तोपर्यंत त्यांचा विवाह त्रवणकोर मधील भार्गवी अम्मल ह्यांच्याशी झाला होता. पतीकडून त्यांचेही पुढे मनपरिवर्तन होऊन त्यांनीही ख्रिस्ती श्रद्घा स्विकारली. त्यांना बाप्तीसम्याच्या वेळी ग्नानापू अम्मल(ज्याचे तमीळ व मल्याळम भाषांतर तेरेसा असे होते) हे नाव देण्यात आले होते. धर्मांतरामुळे त्यांच्या गावात त्यांच्या विरुद्घ उठलेल्या रोशाच्या भीतिने तिने त्या गावचे विस्थापीत नागरीक म्हणून राहणे पसंत केले. देवसहायमच्या कुटुंबियांनीही नंतर बाप्तीसमा स्विकारला.

चर्च इतिहासकार सांगतात की, राज्यातील ब्राहामण मुख्य पुरोहीत, सामंत स्वामी, राजघराण्याचे सदस्य आणि नायर समाजाने दिवान रामायन देलावा ह्यांच्यासमोर देवसहायमवर चुकीचे आरोप केले. देवसहायम ह्यांना त्यांच्या सेवेतून पदच्यूत करण्यात आले आणि त्यांच्यावर राजद्रोह केल्याचा व राज्याची गुपिते प्रतिस्पर्धी   युरोपीयन ह्यांच्यासमोर फोडल्याचा आरोप ठेवण्यात आला. त्यांना नंतर अटक करण्यात आली व तीन वर्षे त्यांचा छळ करण्यात आला.

नीलकंठ पिल्लई यांचा जन्म २३ एप्रिल १७१२ मध्ये त्रावणकोर राज्यातील  एका हिंदू कुटुंबात झाला.  ते त्रावणकोरचे महाराज मार्तंड वर्मा यांच्या दरबारात अधिकारी म्हणून कार्य करत होते. सदरच्या काळात त्यांची ओळख डच नाविक कॅप्टन युस्टाशिअस डे लेनाॅय यांच्याशी झाली. कॅप्टननी निलकंठ  ह्यांना कॅथोलिक विश्वासाची ओळख दिली व ख्रिस्ती श्रद्धेत मार्गदर्शन केले. बाप्तिस्माच्या वेळी त्यांनी देवसहाय्यम (लाजरस) हे नाव घेतले.  त्यांनी आपला कॅथोलिक विश्वास जाहीर केल्यामुळे त्रावणकोर राज्यात त्यांना  रक्तसाक्षी म्हणून मरण आले इसवी सन 2004 मध्ये कोट्टर डायोसिस, तामिळनाडू विशपांची काउंसिल व भारतीय कॅथोलिक बिशपांची परिषद यांनी देवसहाय्यम पिल्लई यांच्या धन्यवादिपणाची प्रक्रिया सुरू करण्याविषयी वॅटिकनला विनंती केली. 28 जून 2012 रोजी पोप बेनेडिक्ट सोळावे यांनी संती करण्याची प्रक्रिया पाहणाऱ्या संघटनेला/ समितीला देवसहाय्यम पिल्लई यांना आशीर्वादित रक्तसाक्षी म्हणून त्याविषयी योग्य कार्यवाही करण्याविषयी सूचना केली. 2 डिसेंबर 2012 रोजी दक्षिण भारतातील कॉटर कॅथलिक डायलिसिस मधील नागरकोईल येथे देव सहायम पिल्लई यांचं धन्यवादितपणाचा व रक्तसाक्षी म्हणून बहुमान करण्याचा विधी पोपचसाहेबांचे  प्रतिनिधी कार्डिनल अांजेलो अमातो यांच्या पौरोहित्याखाली पार पडला. देवसहाय्यम  हे पहिले भारतीय प्रापंचिक आहेत ज्यांना धन्यवादित घोषित करण्यात आले आहे. आणि कॅथोलिक कॅनल लाॅ च्या अनुषंगाने त्यांचं संतीकरणाच प्रक्रिया ही फक्त एक पाऊल अजून बाकी आहे. २१ फेब्रुवारी २०२० रोजी पोप फ्रान्सिस ह्यांनी देवसहाय्यम यांच्या मध्यस्थीने झालेल्या चमत्काराला अधिकृत मान्यता दिली. आणि त्यांच्या संती करणाची प्रक्रिया पुढे चालवावी असे सांगितले

नम्रतेने देवाला शरण आलेल्या माणसाला देव क्षमा करतो. विश्वास आणि क्षमादान ह्यामुळे आपल्या जीवनात चमत्कार घडू शकतो. आज नम्रतेने आणि श्रद्धेने प्रभू  येशूजवळ जाऊ या. त्या दयावंत येशूची दया व कृपा अनुभवून इतरांना प्रभूच्याजवळ नेण्यास सहाय्य करु या.

✝️   

पहिले वाचन १ शमुवेल ८:४-७,१०-२२

वाचक :शमुवेलच्या पहिल्या पुस्तकातून घेतलेले वाचन

"तुम्ही निवडून घेतलेल्या राजाविषयी गाऱ्हाणी कराल, पण परमेश्वर तुमचे एकेणार नाही."

इस्राएलांचे सर्व वडील जमा होऊन रामा येथे शमुवेलकडे आले. ते त्यास म्हणाले, "पाहा, आता तुम्ही वृद्ध झाला आहा आणि तुमच्या मार्गाने तुमचे पुत्र चालत नाहीत, तर आता इतर सर्व राष्ट्रांप्रमाणे आमचा न्यायइन्साफ करावयास आम्हावर एक राजा नेमा." "आमचा न्यायइन्साफ करावयास आम्हांला एक "राजा द्या" असे ते म्हणाले त्यामुळे शमुवेलला वाईट वाटले. मग शमुवेलने परमेश्वराची प्रार्थना केली. तेव्हा परमेश्वर शमुवेलला म्हणाला, "हे लोक जे तुला सांगत आहेत ते सगळे ऐक, कारण त्यात ते तुझा धिक्कार करीत नाहीत, तर मी त्यांचा राजा नसावे म्हणून ते माझाच धिक्कार करीत आहेत."

मग ज्या लोकांनी त्याच्यापाशी राजा मागितला होता त्यांना शमुवेलने परमेश्वराचे सर्व म्हणणे कळवले. तो म्हणाला, तुम्हावर जो राजा राज्य करील तो अशी सत्ता चालवील की तो तुमच्या पुत्रांस धरुन आपले रथ आणि घोडे यांची चाकरी करावयास ठेवील आणि ते त्याच्या रथांपुढे धावतील. त्यातून कित्येक हजाराहजारांवर आणि पत्रासापत्रासांवर नायक म्हणून तो नेमील; कित्येकांस आपली शेते नांगरावयास, कापावयास आणि आपल्या लढाईची शस्त्रास्त्रे आणि रथांची साहित्ये करण्याच्या कामास लावील. तो तुमच्या कन्यांस धरुन हलवाइणी, स्वयंपाकिणी आणि भटारणो करील. तो तुमची उत्तम उत्तम शेते, द्राक्षांचे मळे आणि जैतुनांचे मळे घेऊन आपल्या नोकरांस देईल. तो तुमचे धान्य आणि द्राक्षांचे मळे यांचा एक दशमांश घेऊन आपले खोजे आणि चाकर यांस देईल. तो तुमचे दास आणि दासी, तुमची खिल्लारे आणि गाढवे धरून आपल्या कामास लावील. तो तुमच्या शेरडामेंढरांचा एक दशमांश घेईल, तुम्ही त्याचे दास व्हाल. त्यावेळी तुम्ही निवडून घेतलेल्या राजाविषयी गान्हाणी कराल, पण परमेश्वर त्या समयी तुमचे ऐकणार नाही."

तरी पण लोक शमुवेलचे म्हणणे ऐकेनात. ते म्हणाले, "नाही, नाही, आमच्यावर राजा पाहिजेच, म्हणजे इतर सर्व राष्ट्रांसमान आम्ही होऊ. आमचा राजा आमचा न्यायइन्साफ करील आणि आमच्यापुढे चालून तो आमच्या लढाया लढेल." 

शमुवेलने लोकांचे हे सर्व म्हणणे ऐकून परमे बराच्या कानावर घातले. परमेश्वर शमुवेलला म्हणाला, "त्यांचे म्हणणे ऐक आणि त्यांच्यावर एक राजा नेम." मग शमुवेल इसाएल लोकांना म्हणाला, "तुम्ही आपआपल्या नगरांस जा."

हा प्रभूचा शब्द आहे. 

सर्व : देवाला धन्यवाद.

प्रतिसाद स्तोत्र  ८९:१६-१९

प्रतिसाद :    हे परमेश्वरा, तुझ्या दयेविषयी मी नित्य गीत गाईन..

१) ज्या लोकांस उत्साह शब्दांचा परिचय आहे ते धन्य 

हे परमेश्वरा, ते तुझ्या मुखप्रकाशात चालतात,

 ते तुझ्या नावामुळे नेहमी उल्हास करतात,

तुझ्या न्यायपरायणतेने त्यांची उन्नती होते. 

२) कारण त्यांच्या बलाचे वैभव तू आहेस, 

तुझ्या प्रसादाने आमचा उत्कर्ष होत राहील. 

आमची ढाल परमेश्वराच्या मालकीची आहे. 

आमचा राजाही इस्राएलच्या पवित्र प्रभूचा आहे.

जयघोष

आलेलुया, आलेलुया ! 

हे प्रभो, तुझ्या इच्छेप्रमाणे वागण्यास माझे मन वळव आणि तुझे नियम मला शिकव. 

 आलेलुया!

शुभवर्तमान मार्क   २:१-१२

वाचक :  मार्कलिखित शुभवर्तमानातून घेतलेले वाचन 

"मनुष्याच्या पुत्राला पृथ्वीवर पापांची क्षमा करण्याचा अधिकार आहे."

येशू पुन्हा कफर्णहूमात आला आणि तो घरी आहे असे लोकांच्या कानी पडले. तेव्हा इतके लोक जमले की, दारात देखील त्यांना जागा होईना, तेव्हा तो त्यांना संदेश देत होता. मग लोक त्याच्याकडे एका पक्षपाती माणसाला घेऊन आले, त्याला चौघांनी उचलून आणले होते. त्यांना दाटीमुळे त्याच्याजवळ जाता येईना, म्हणून तो होता तेथील छप्पर त्यांनी उस्तरून काढले आणि वाट करून ज्या बाजेवर पक्षघाती पडून होता तो खाली सोडली. त्यांचा विश्वास पाहून येशू पक्षघाती माणसाला म्हणाला, "मुला, तुझ्या पापांची क्षमा झाली आहे." कित्येक शास्त्री तेथे बसले होते, त्यांच्या मनात असा विचार आला, “हा असे का बोलतो ? हा दुर्भाषण करतो. एकावाचून म्हणजे देवावाचून पापांची क्षमा कोण करू शकतो ?" ते स्वतःशी असा विचार करीत आहेत हे येशूने अंतर्ज्ञानाने लगेच ओळखून त्यांना म्हटले, “तुम्ही आपल्या मनात असले विचार का आणता ? 'तुझ्या पापांची क्षमा झाली आहे,' असे पक्षघाती माणसाला म्हणणे सोपे किंवा 'ऊठ, आपली बाज उचलून चाल' असे म्हणणे सोपे ? परंतु मनुष्याच्या पुत्राला पृथ्वीवर पापांची क्षमा करण्याचा अधिकार आहे हे तुम्हांला समजावे म्हणून तो पक्षघाती माणसाला म्हणाला, “मी तुला सांगतो, ऊठ, आपली बाज उचलून घे आणि आपल्या घरी जा." मग तो उठला आणि लगेच आपली बाज उचलून सर्वांच्यादेखत निघाला. ह्यावरून सर्वजण थक्क झाले आणि देवाचा गौरव करीत म्हणाले, “आम्ही असे कधीच पाहिले नव्हते!"

प्रभूचे हे शुभवर्तमान

सर्व : हे ख्रिस्ता  तुझी स्तुती असो.

चिंतन: पक्षाघाती माणसाच्या चाहत्यांना वाटत होते की, पक्षाघातापासून मुक्ती हीच त्या माणसाला सुखी करण्याची सर्वात मोठी गरज होती. पापापासून मुक्ती येशूने ती गरज अचूक टिपली आणि त्या माणसाला पापाच्या बंधनातून मुक्त केले व त्यानंतर त्याचा आजार बरा केला. आपल्या प्रेमाच्या माणसाला आजाराचे भक्ष्य बनलेले पाहातो तेव्हा आपण त्याच्यासाठी प्रार्थना करतो, ताबडतोब औषधोपचार सुरु करतो, त्याला डॉक्टरकडे नेतो. हे सर्व करणे स्तुत्य आहे. पण आजारी माणसाच्या हृदयात पापाची कोळीष्टके, पापाचे डाग असू शकतील ह्याचा विचार होणे आवश्यक असते. म्हणूनच आजाऱ्यांच्या साक्रामेंताविषयी अभ्यास करीत असतांना ख्रिस्तसभा आपल्याला शिकविते की, एखाद्या आजारामुळे किंवा म्हातारपणामुळे एखाद्या माणसाच्या मरणाची आपल्याला चाहूल लागते तेव्हां ज्या तत्परतेने आणि तातडीने आपण डॉक्टर बोलावतो किंवा त्या माणसाला हॉस्पीटलमध्ये हालविण्याची तजवीज करतो त्याच तत्परतेने आपण त्या माणसाला आजाऱ्यांचा साक्रामेंत देण्याची तजवीज करायला हवी. ख्रिस्तसभा आपल्याला हेही शिकविते की, आजाऱ्यांच्या साक्रामेंतामुळे रोग्याला पापानिवेदन करण्याची किंवा पापांबद्दल पश्चात्ताप करण्याची संधी मिळते व देवाची इच्छा असल्यास त्याचे आजारपणही नाहीसे होते.

प्रार्थना : हे प्रभू येशू, विश्वासाने शरण येऊन तुझी क्षमा व कृपा मिळविण्यास आम्ही  पात्र व्हावे म्हणून आम्हाला प्रेरणा व कृपा दे, आमेन.

सिनडसाठी प्रार्थना

हे पवित्र आत्म्या, तुझ्या नावाने एकत्र येऊन  

आम्ही तुझ्यासमोर उभे राहतो.

तू आमचा एकमेव मार्गदर्शक आहेस, 

आमच्या हृदयात तू वस्ती कर; 

आम्ही पुढे कसे जावे याबद्दल आम्हांला मार्गदर्शन कर 

आणि त्या मार्गाशी आम्हांला एकनिष्ठ ठेव.

आम्ही दुर्बळ आणि पापी आहोत; 

अस्थिरतेपासून आम्हाला दूर ठेव; 

अज्ञानाने आमचा मार्ग भ्रष्ट होऊ देऊ नकोस, 

पक्षपाताचा आमच्या कृतीवर प्रभाव पडू देऊ नकोस.

हे पवित्र आत्म्या,

तुझ्यामध्ये आम्हाला आमचे ऐक्य पाहू देः 

म्हणजे आम्ही शाश्वत जीवनाकडे एकत्र वाटचाल करू 

आणि सत्याच्या व योग्यतेच्या मार्गापासूनआम्ही भरकटणार नाही.

पिता आणि पुत्र ह्यांच्या ऐक्यात 

तू सर्वत्र आणि सर्वकाळ कार्य करतोस 

त्या तुझ्याकडे हे सर्व आम्ही मागतो, आमेन !

✝️