प्रकटीकरणानंतरचा सप्ताह
शनिवार दि. ८ जानेवारी २०२२
✝️
“मनुष्याला स्वर्गातून दिल्यावाचून काहीच मिळू शकत नाही.”
✝️
“मनुष्याला स्वर्गातून दिल्यावाचून काहीच मिळू शकत नाही.”
✝️
संत सेवरीन
मठाधिकारी (४८२)
प्रभू येशू ख्रिस्त देवापासून जन्मला आणि ख्रिस्ताने सर्वांना विपुल प्रमाणात जीवन मिळावे ही शाश्वती दिली. स्वर्गातून उतरलेला व मानवरुप धारण केलेला ख्रिस्त येशू हाच तारणारा आहे,
आजच्या शुभवर्तमानात प्रभू येशू आणि योहान बाप्तिस्ता ह्यांच्या बद्दलचा वाद शिष्यांमध्ये व यहुद्यांमध्ये निर्माण झाला. कारण योहान व येशू दोघेही लोकांना बाप्तिस्मा देत होते. मात्र योहानाने आपली भूमिका स्पष्टपणे मांडली, 'मी ख्रिस्त नव्हे तर त्याच्यापुढे पाठविलेला आहे.' येशूच्या येण्याने योहानाचे कार्य सफल झाले. म्हणून तो पुढे म्हणतो 'माझा आनंद पूर्ण झाला आहे, त्याची वृद्धी व्हावी आणि माझा न्हास व्हावा हे अवश्य आहे.' योहान बाप्तिस्ताच्या जीवनाचे अंतिम उद्घीष्ट प्रभू येशूच्या आगमनाची व स्वागताची तयारी हेच होते. .
आपण चिंतन करु या.सर्वदा देवाची स्तुति व्हावी देवाचा गौरव व सन्मान व्हावा. आपण देवापुढे नगण्य आहोत म्हणूनच नम्रतेने त्याला शरण जाऊन सर्वस्वी त्याच्या आज्ञेप्रमाणे जीवन जगण्याचा प्रयत्न करु या. कुटुंबात व समाजात अनेकांना आपल्या प्रोत्साहनाची गरज आहे. योग्य व्याक्तिंना सन्मानाने व आदराने वागविले पाहिजे. सर्वदा येशूचा व परमपित्याचा गौरव आणि स्तुति करू या
✝️
पहिले वाचन १ योहान ५:१४-२१
वाचक :योहानचे पहिले पत्र यातून घेतलेले वाचन
"आपण जर त्याच्या इच्छेप्रमाणे काही मागितले तर तो आपले ऐकेल."
त्याच्यासमोर येण्यास आपल्याला जे धैर्य आहे ते ह्यावरून की, आपण त्याच्या इच्छेप्रमाणे काही मागितले तर तो आपले ऐकेल आणि आपण जे काही मागतो ते तो ऐकतो,हे आपल्याला ठाऊक आहे, म्हणून ज्या मागण्या आपण त्याच्याजवळ केल्या आहेत त्या आपल्याला मिळाल्या आहेत हेही आपल्याला ठाऊक आहे.
ज्याचा परिणाम मरण नाही असे पाप करताना आपल्या बंधूला कोणी पाहिले तर त्याने त्याच्याकरिता देवाजवळ मागावे म्हणजे तो त्याला जीवन देईल, अर्थात ज्याचा परिणाम मरण नाही असे पाप करणाऱ्यांना ते देईल. ज्याचा परिणाम मरण आहे असेही पाप आहे आणि ह्याविषयी मागावे असे मी म्हणत नाही. सर्व प्रकारची अनीती पापच आहे, तरीपण ज्याचा परिणाम मरण नाही असेही पाप आहे.
जो कोणी देवापासून जन्मलेला आहे तो पाप करीत नाही, हे आपल्याला ठाऊक आहे. जो देवापासून जन्मला तो (ख्रिस्त) त्याला सुरक्षित ठेवतो आणि त्या दुष्टाचा संपर्क त्याला होत नाही. आपण देवापासून आहो हे आपल्याला ठाऊक आहे. सगळे जग त्या दृष्टाला वश झाले आहे. आपल्याला ठाऊक आहे की, देवाचा पुत्र आला आहे आणि तो सत्य आहे. त्याला ओळखण्याची बुद्धी त्याने आपल्याला दिली आहे. जो सत्य आहे त्याच्या ठायी, म्हणजे त्याचा पुत्र ख्रिस्त ह्याच्या ठायी, आपण आहो हाच खरा देव आणि सार्वकालिक जीवन आहे.
मुलांनो, तुम्ही स्वतःला मूर्तीपासून दूर ठेवा
हा प्रभूचा शब्द आहे.
सर्व : देवाला धन्यवाद.
प्रतिसाद स्तोत्र १४९: १-६,९
प्रतिसाद : प्रभू आपल्या लोकांवर प्रसन्न आहे.
१) एखादे नवीन गीत गाऊन गुणगान करा.
त्याच्या भक्तजनांच्या मेळाव्यात त्याचे स्तवन करा.
इस्राएलला त्याचा निर्माणकर्ता आनंदित करो.
सियोनच्या नागरिकांना त्यांच्या राजामुळे आनंद देवो.
२) नृत्य करीत ते त्याच्या नामाचा महिमा वर्णोत.
ते डफ व वीणा वाजवून त्याची स्तुती गावोत.
कारण प्रभू आपल्या लोकांवर प्रसन्न आहे;
नम्र जनांना तो विजयाने भूषवितो.
३) भक्तजनांना विजयाचा उन्माद चढो.
अंथरूणांवर त्यांना आनंदाने गजर करू द्या.
त्यांना मुक्तकंठाने देवाचे स्तवन करू द्या.
हे साऱ्या भक्तजनांचे भूषण आहे.
जयघोष
आलेलुया, आलेलुया !
यहुदियांना प्रकट झालेल्या ख्रिस्ताचा गौरव असो, जगात ज्यावर विश्वास ठेवला गेला त्या ख्रिस्ताचा गौरव असो.
आलेलुया!
शुभवर्तमान योहान ३:२२-३०
वाचक : योहानलिखित शुभवर्तमानातून घेतलेले वाचन
“वराच्या मित्राला वराच्या वाणीने आनंद होतो."
येशू आणि त्याचे शिष्य यहुदा प्रांतात आले आणि तेथे त्यांच्याबरोबर राहून तो बाप्तिस्मा करीत होता. योहानही शालिमाजवळचे एनोन येथे बाप्तिस्मा करीत होता, कारण तेथे पाणी मुबलक होते. आणि लोक येऊन बाप्तिस्मा घेत असत, कारण योहान तोपर्यंत कैदेत पडला नव्हता.
मग योहानच्या शिष्यांचा एका यहुद्याबरोबर शुद्धीकरणाविषयी वादविवाद झाला. ते योहानकडे येऊन त्याला म्हणाले, "गुरुजी, पाहा, यार्देनच्या पलीकडे जो आपल्याबरोबर होता, ज्याच्याविषयी आपण साक्ष दिली आहे तो बाप्तिस्मा करतो आणि सर्व लोक त्याच्याकडे जातात." योहानने उत्तर दिले, “मनुष्याला स्वर्गातून दिल्यावाचून काहीच मिळू शकत नाही. मी ख्रिस्त नव्हे तर त्याच्यापुढे पाठवलेला आहे असे मी म्हणालो होतो, ह्याविषयी तुम्हीच माझे साक्षी आहा. वधू ज्याची आहे तोच वर आहे आणि उभा राहून त्याचे बोलणे जो ऐकतो तो वराचा मित्र आहे. त्याला वराच्या वाणीने अत्यानंद होतो. तसा हा माझा आनंद पूर्ण झाला आहे. त्याची वृद्धी व्हावी व माझा हास व्हावा हे अवश्य आहे.”
प्रभूचे हे शुभवर्तमान
सर्व : हे ख्रिस्ता तुझी स्तुती असो.
चिंतन: आपल्या चांगल्या कामाबद्दल किंवा आपल्या स्वभावातील चांगल्या गुणांबद्दल माणसे आपली स्तुती करतात तेव्हा आपल्याला आनंद होणे स्वाभाविक आहे. वास्तविक अशा स्तुतीची आपल्याला अधिक गुणसंपन्न होण्यासाठी गरजही असते. मात्र इतरांच्या तुलनेत आपण अधिक चांगले आहोत असे आपल्याला सांगितले जाते तेव्हा त्या स्तुतीमुळे आपण वाहवत जाऊ नये. अशा स्तुतीमुळे माणूस वाहवत जातो तेव्हा तो गर्विष्ठपणाच्या गढूळ पाण्याच्या डोहात पडण्याची शक्यता असते. स्तुती करणाऱ्या माणसात आपल्याविषयी सद्भावना असू शकते किंवा आपल्याच घरातल्या किंवा जवळच्या माणसांशी अपवित्र स्पर्धा करून एकमेकांमध्ये वितुष्ट निर्माण करण्यासाठी आपल्यासमोर फेकलेला फास असू शकतो. स्तुती करण्याचा आभास निर्माण करून एकमेकातील संबंध बिघडविल्याची अनेक उदाहरणे आपण पाहतो. भावाभावामध्ये, समाज सेवकांमध्ये केवळ आपली पोळी भाजण्यासाठी समाजकंटकांनी ओकलेल्या स्तुती- वजा विषामुळे अनेक गुण्यागोविंद्याने नांदणारी कुटुंबे उध्वस्त झाली आहेत व समाजात दुही पसरून समाजाच्या प्रगतीला खीळ बसली आहे. आजच्या शुभवर्तमानात वर्णन केलेले संत जॉन बॅप्टिस्टचे वर्णन अशावेळी आपल्याला मार्गदर्शक ठरते. यहुद्यांनी एकतर अजाणपणे किंवा जाणून बुजून जॉनच्या मनात हेवा निर्माण करणारे शब्द वापरले पण जॉन त्या शब्दांनी मनातल्या मनात खूष होण्याचे सोडाच पण येशू माझ्यापेक्षा खूप मोठा आहे असे सांगून त्याने त्यांच्या कृत्याला कायमची खीळ घातली.
प्रार्थना : हे प्रभू परमेश्वरा, सर्वदा तुझा सन्मान व गौरव करण्यास प्रेरणा दे, आमेन.
सिनडसाठी प्रार्थना
हे पवित्र आत्म्या, तुझ्या नावाने एकत्र येऊन
आम्ही तुझ्यासमोर उभे राहतो.
तू आमचा एकमेव मार्गदर्शक आहेस,
आमच्या हृदयात तू वस्ती कर;
आम्ही पुढे कसे जावे याबद्दल आम्हांला मार्गदर्शन कर
आणि त्या मार्गाशी आम्हांला एकनिष्ठ ठेव.
आम्ही दुर्बळ आणि पापी आहोत;
अस्थिरतेपासून आम्हाला दूर ठेव;
अज्ञानाने आमचा मार्ग भ्रष्ट होऊ देऊ नकोस,
पक्षपाताचा आमच्या कृतीवर प्रभाव पडू देऊ नकोस.
हे पवित्र आत्म्या,
तुझ्यामध्ये आम्हाला आमचे ऐक्य पाहू देः
म्हणजे आम्ही शाश्वत जीवनाकडे एकत्र वाटचाल करू
आणि सत्याच्या व योग्यतेच्या मार्गापासूनआम्ही भरकटणार नाही.
पिता आणि पुत्र ह्यांच्या ऐक्यात
तू सर्वत्र आणि सर्वकाळ कार्य करतोस
त्या तुझ्याकडे हे सर्व आम्ही मागतो, आमेन !
✝️
0 टिप्पण्या