Marathi Bible Reading | Tuesday 8th February 2022 | 5th Week in Ordinary Time

सामान्यकाळातील पाचवा सप्ताह 

मंगळवार 

 दि. ८ फेब्रुवारी  २०२२

✝️ 

  "तुम्ही देवाची आज्ञा बाजूला सारून देता."

संत जोसेफिन बाखीता

✝️

शलमोन राजाने बांधलेल्या मंदिराचे समर्पण केल्याचा वृत्तांत आहे. सार्वभौम असा देव एकच असून त्याची आज्ञा पाळणाऱ्यांवर त्याची दयादृष्टी असते, असा ठाम विश्वास शलमोनाने आपल्या प्रार्थनेत व्यक्त केला आहे. शलमोनाने मंदिराचे समर्पण करताना इस्त्राएल जनतेसाठी कळकळीने प्रार्थना केली.

देवासंबंधाने आणि मानवा संबंधाने देवाच्या आज्ञा न पाळता मानवी परंपरा व संप्रदायाला जास्त महत्व देणाऱ्या शास्त्री-परुश्यांना प्रभू येशू ढोंगी म्हणत आहे. त्यांची प्रार्थना म्हणजे व्यर्थ बडबड असून त्यांचे अंतःकरण देवापासून दूर गेलेले असल्यामुळे देवाच्या वचनांचा ते सन्मान करीत नव्हते. आपण आज ह्या वचनांवर चिंतन करीत असताना, आपल्या जीवनात आपण देवाच्या आज्ञा कशाप्रकारे पाळतो ह्याचे परीक्षण करु या. देवाच्या आज्ञा देवप्रीति आणि परस्पर प्रीतिच्या आहेत.

अंतःकरणापासून देवाचा धावा करता यावा, देवाच्या आज्ञा पाळाव्या ! आणि देवाच्या वचनानुसार जीवन जगता यावे म्हणून पश्चात्तापपूर्वक आपण प्रार्थना करु या. अंतःकरणापासून देवाचा सन्मान करुन त्याच्या आज्ञा पाळण्यासाठी कृपा मागू या.

✝️   

पहिले वाचन १ राजे ८:२२ - २३,२७-३०

वाचक :राजाच्या पहिल्या पुस्तकातून घेतलेले वाचन

तू म्हणालास, "माझ्या नावाचा निवास येथे होईल; तुझ्या लोकांच्या प्रार्थनेकडे कान दे."

शलमोन राजाने इस्राएलच्या सर्व मंडळी देखत परमेश्वराच्या वेदीसमोर उभे राहून आकाशाकडे हात पसरले; तो म्हणाला, “परमेश्वरा, इस्राएलच्या देवा, वर आकाशात अथवा खाली पृथ्वीवर तुझ्यासमान कोणी देव नाही; जे तुझे सेवक मनोभावे तुझ्यासमोर वागतात त्यांच्याशी तू आपल्या करारानुसार आणि दयेने वागतोस.

“परंतु देव हा भूतलावर खरोखर निवास करील काय ? आकाश आधी नभोमंडळ यात तुझा समावेश होणे नाही; तर हे मंदिर मी बांधले आहे यात तो कसा व्हावा? तरी हे माझ्या देवा, परमेश्वरा, तुझ्या सेवकाच्या प्रार्थनेकडे, विनंतीकडे लक्ष दे; आज तुझा सेवक तुझा धावा करीत आहे आणि तुझ्यापुढे प्रार्थना करीत आहे, तिच्याकडे कान दे; माझ्या नावाचा निवास येथे होईल असे ज्या स्थलाविषयी तू म्हटले त्या ह्या तू स्थलाकडे, ह्या मंदिराकडे अहोरात्र तुझी दृष्टी असो. जी प्रार्थना तुझा सेवक या स्थलाकडे तोंड करून करीत आहे ती ऐक. तुझ्या सेवकाच्या विनवणीकडे आणि तुझे लोक इस्राएल ह्या स्थलाकडे तोंड करून तुझी विनवणी करतील तिच्याकडे तू कान दे; स्वर्गातील तुझ्या निवासस्थानी तू ती श्रवण कर आणि श्रवण करून त्यांना क्षमा कर."

हा प्रभूचा शब्द आहे. 

सर्व : देवाला धन्यवाद.

प्रतिसाद स्तोत्र ८३:३३, ४, ५.१०, ११

प्रतिसाद :  हे सेनाधीश परमेश्वरा, तुझी निवासस्थाने किती रम्य आहेत !

१ माझ्या जिवाला परमेश्वराच्या 

अंगणांची उत्कंठा लागली असून 

मी झुरत आहे. माझा जीव आणि 

देह हर्षाने जिवंत देवाचा घोष करत आहेत.

२ हे सेनाधीश परमेश्वरा, माझ्या राजा, माझ्या देवा, 

तुझ्या वेदीजवळ चिमणीला घरटे करावयास 

आणि निळवीला आपल्या पिलांसाठी कोटर

 बांधावयास स्थळ मिळाले आहे.

३ तुझ्या मंदिरात राहणारे कितीधन्य आहेत! 

ते निरंतर तुझी स्तुती करीत राहतील. 

हे देवा, तू आमची ढाल आहेस, अवलोकन कर, 

तू आपल्या अभिषिक्ताच्या मुखाकडे दृष्टी लाव. 

४ खरोखर तुझ्या अंगणातील 

एक दिवस हा सहस्र दिवसांपेक्षा 

उत्तम आहे. दुष्टपणाच्या तंबूत 

राहण्यापेक्षा माझ्या देवाच्या घराचा

द्वारपाळ होणे मला इष्ट वाटते.

जयघोष 

आलेलुया, आलेलुया ! 

परमेश्वराचे गुनगाण गा!

तो आपले आदेश पृथ्वीवर पाठवतो.

 आलेलुया!

शुभवर्तमान मार्क ७:१-१३

वाचक :मार्कलिखित शुभवर्तमानातून घेतलेले वाचन

"तुम्ही देवाची आज्ञा बाजूला सारून देता आणि माणसांच्या संप्रदायाला चिकटून राहता."

परुशी आणि येरुशलेमहून आलेले कित्येक शास्त्री एकत्र जमून येशूकडे आले. त्यांनी त्याच्या काही शिष्यांना अस्वच्छ म्हणजे न धुतलेल्या हातांनी जेवताना पाहिले होते. (कारण परुशी आणि इतर सर्व यहुदी वाडवडिलांच्या संप्रदायाला अनुसरून हात नीट धुतल्यावाचून जेवत नाहीत; बाजारातून आल्यावर पाणी शिंपडल्याशिवाय ते जेवत नाहीत आणि पेले, घागरी, पितळेची भांडी धुणे आणि असल्या बऱ्याच रूढी ते पाळत असत.) ह्यावरून परुश्यांनी आणि शास्त्रांनी त्याला विचारले, “आपले शिष्य हात न धुता जेवतात, वाडवडिलांच्या संप्रदायाप्रमाणे ते का चालत नाहीत ?” त्याने त्याला उत्तर दिले, “तुम्हा ढोंग्यांविषयी यशयाने चांगलाच संदेश देऊन ठेवला आहे. त्याचा लेख असाः

“हे लोक ओठांनी माझा सन्मान करतात, परंतु त्यांचे अंतःकरण माझ्यापासून दूर आहे; ते माझी व्यर्थ उपासना करतात,

कारण ते शास्त्र म्हणून जे शिकतात, ते असतात मनुष्याचे नियम." तुम्ही देवांची आज्ञा बाजूला सारून देता आणि माणसांच्या संप्रदायाला चिकटून राहता."

आणखी तो त्यांना म्हणाला, “तुम्ही आपला संप्रदाय पाळण्याकरिता देवाची आज्ञा मोडण्याचा छान मार्ग शोधून काढला आहे! कारण मोशेने सांगितले आहे की, 'तू आपला बाप आणि आपली आई ह्यांचा मान राख आणि जो कोणी आपल्या बापाची किंवा आईची निंदा करतो त्याला देहान्त शिक्षा व्हावी.' पण तुम्ही म्हणता, 'जर एखादा आपल्या बापाला अथवा आईला म्हणाला की, जे मी तुम्हाला पोषणासाठी द्यावयाचे ते कुर्बान (म्हणजे अर्पण) केले आहे, ' तर तुम्ही त्याला आपल्या बापासाठी किंवा आईसाठी पुढे काही करू देत नाही; अशा प्रकारे तुम्ही आपला संप्रदाय चालू ठेवून देवाचे वचन रद्द करता आणि ह्यासारख्या आणखी पुष्कळ गोष्टी करता."

प्रभूचे हे शुभवर्तमान

सर्व : हे ख्रिस्ता  तुझी स्तुती असो.

चिंतन: आज सुद्धा समाजात शास्त्री व परूशी आहेत. ते धार्मिक चालीरिती चांगल्याप्रकारे करतात पण नीतिमत्त्व हे गहाण टाकलेले आहे. येशूच्या काळीसुद्धा अशाप्रकारचे लोक अस्तित्वात होते. ते गरीब व गरजू लोकांचा फायदा घ्यायचे. नियम काटेकोरपणे पाळत होते. पण गरिबांना दया दाखवणे त्यांना जमत नव्हते. ते नियम चांगल्याप्रकारे पार पाडत परंतु इतरांवर सुद्धा लादत असत. परंतु ते हलके करणे त्यांना जमत नसे. येशू त्यांना म्हणतो, तुम्ही माझा ओठांनी सन्मान करता परंतु अंतःकरणापासून का दूर आहात? आपण स्वतःला विचारा की आपण कुठे आहोत? येशूच्या जवळ की येशूपासून दूर? येशूच्या जवळ येण्यासाठी मनाची नम्रता बाळगूया.

प्रार्थना : हे प्रभू येशू, तन-मनाने एकचित्त होऊन, प्रांजळपणे पश्चात्ताप करुन तुझ्या आज्ञा पाळण्यास आम्हाला प्रेरणा व कृपा दे, आमेन

सिनडसाठी प्रार्थना

हे पवित्र आत्म्या, तुझ्या नावाने एकत्र येऊन  

आम्ही तुझ्यासमोर उभे राहतो.

तू आमचा एकमेव मार्गदर्शक आहेस, 

आमच्या हृदयात तू वस्ती कर; 

आम्ही पुढे कसे जावे याबद्दल आम्हांला मार्गदर्शन कर 

आणि त्या मार्गाशी आम्हांला एकनिष्ठ ठेव.

आम्ही दुर्बळ आणि पापी आहोत; 

अस्थिरतेपासून आम्हाला दूर ठेव; 

अज्ञानाने आमचा मार्ग भ्रष्ट होऊ देऊ नकोस, 

पक्षपाताचा आमच्या कृतीवर प्रभाव पडू देऊ नकोस.

हे पवित्र आत्म्या,

तुझ्यामध्ये आम्हाला आमचे ऐक्य पाहू देः 

म्हणजे आम्ही शाश्वत जीवनाकडे एकत्र वाटचाल करू 

आणि सत्याच्या व योग्यतेच्या मार्गापासूनआम्ही भरकटणार नाही.

पिता आणि पुत्र ह्यांच्या ऐक्यात 

तू सर्वत्र आणि सर्वकाळ कार्य करतोस 

त्या तुझ्याकडे हे सर्व आम्ही मागतो, आमेन !

✝️