Marathi Bible Reading | Monday 23rd January 2023| 3rd Week in Ordinary Time

 सामान्यकाळातील तिसरा   सप्ताह

 सोमवार   दि.२३ जानेवारी  २०२३

(ख्रिस्ती ऐक्य सप्ताह) (१८ ते २५ जानेवारी)

आपसांत फूट पडलेले राज्य टिकत नाही. आपसांत फूट पडलेले घरही टिकत नाही

✝️

संत इमेरेन्तीयाना

कुमारिका रक्तसाक्षी (३०४)

रोमन रक्तसाक्ष्यांच्या यादीनुसार इमेरेन्तीयाना ही आग्नेस (संत) हिची सावत्र बहीण होती. दोघीही सर्वसाधारणपणे एकाच वयाच्या होत्या. आग्नेस ही पूर्णपणे ख्रिस्ती झालेली होती. तर इमेरेन्तीयाना अजूनही धर्मशिक्षण घेत होती.

संत आग्नेसच्या थडग्याजवळ प्रार्थना करीत असताना तिला दगडमार करण्यात आला. त्यात तिचे शरीर ठेचले गेले आणि शरीरातून निघालेल्या रक्ताने ती न्हाऊन निघाली. त्यातून तिला रक्ताचा बाप्तिस्मा मिळाला. संत आग्नेसच्या महामंदिराशेजारीच तिला पुरण्यात आले. नंतर तिचे अवशेष महामंदिरात आणण्यात आले.

 

✝️

पहिले वाचन : इब्री ९:१५,२४-२८

वाचक :  इब्री लोकांस पत्र यातून घेतलेले वाचन  

 "ख्रिस्त पुष्कळांची पापे स्वतःवर घेण्यासाठी एकदाच अर्पिला गेला आणि जे त्याची आतुरतेने वाट पाहतात त्यांना तारणासाठी तो दुसऱ्यांदा दिसेल."

पाचारण केलेल्यांना अभिवचन दिलेले सार्वकालिक वतन मिळावे म्हणून ख्रिस्त नव्या कराराचा मध्यस्थ झाला आहे, कारण पहिल्या कराराखाली असताना त्यांनी केलेल्या अपराधांपासून क्षमा मिळवून देण्यासाठी ख्रिस्त मरण पावला.

खऱ्या गोष्टींचे प्रतिरूप म्हणजे हातांनी केलेले पवित्रस्थान ह्यात ख्रिस्त गेला नाही, तर आपल्यासाठी देवासमोर उभे राहण्यास प्रत्यक्ष स्वर्गात गेला आणि जसा प्रमुख याजक प्रतिवर्षी स्वतःचे नसलेले रक्त घेऊन परमपवित्रस्थानात जातो, तसे त्याला वारंवार स्वतःचे अर्पण करावयाचे नव्हते; तसे असते तर जगाच्या स्थापनेपासून त्याला वारंवार दुःख सोसावे लागले असते. पण आता तो एकदाच युगाच्या समाप्तीस आत्मयज्ञ करून पापे नाहीशी करण्यासाठी प्रकट झाला आहे. ज्याअर्थी माणसांना एकदाच मरणे आणि त्यानंतर न्याय होणे नेमून ठेवले आहे, त्याअर्थी ख्रिस्त पुष्कळांची पापे स्वतःवर घेण्यासाठी एकदाच अर्पिला गेला आणि जे त्याची वाट पाहतात त्यांना पापसंबंधात नव्हे तर तारणासाठी तो दुसऱ्यांदा दिसेल.

हा प्रभूचा शब्द 

सर्व : देवाला धन्यवाद.

प्रतिसाद स्तोत्र ९८:१-६

प्रतिसाद : परमेश्वराचे गुणगान नवे गीत गाऊन करा, 

कारण त्याने अद्भुत कृत्ये केली आहेत.

१ परमेश्वराचे गुणगान नवे गीत गाऊन करा, 

कारण त्याने अद्भुत कृत्ये केली आहेत. 

त्याने आपल्या उजव्या हाताने, 

आपल्या पवित्र बाहूने मुक्तिदान आणले आहे.

२ परमेश्वराने आपले तारणकार्य प्रकट केले आहे, 

राष्ट्रांसमक्ष आपले न्यायीपण प्रकट केले आहे. 

त्याने इस्राएलच्या घराण्यावरील आपली सत्यता 

आणि दया ह्यांचे स्मरण ठेवले आहे.

३ पृथ्वीच्या सर्व सीमांनी आमच्या देवाचे 

तारणकार्य पाहिले आहे. 

अहो पृथ्वीवरील सर्व लोकहो, 

परमेश्वराचा जयजयकार करा; 

उच्च स्वराने आपला आनंद जगजाहीर करा.

४ परमेश्वराची स्तोत्रे वीणेवर गा, 

संगीत स्वराने गा. कर्णा आणि 

शिंग वाजवून परमेश्वर राजा ह्याचा जयघोष करा.

जयघोष

आलेलूया, आलेलूया !

 प्रभू म्हणतो, मी तुम्हाला मित्र म्हटले आहे, 

कारण जे काही मी आपल्या पित्यापासून 

ऐकून घेतले ते सर्व मी तुम्हाला कळवले आहे

आलेलूया !

शुभवर्तमान मार्क  ३:२२-३० 

वाचक :  मार्कलिखित पवित्र शुभवर्तमानातून घेतलेले वाचन

"हा सैतानाचा शेवट होय. "

येरुशलेमहून आलेले शास्त्री म्हणत होते, "येशूला बालजबूल लागला आहे आणि तो त्या भुतांच्या अधिकाऱ्याच्या साहाय्याने भुते काढतो.” तेव्हा येशू त्यांना आपणाजवळ बोलावून म्हणू लागला, “सैतान सैतानाला कसा काढील ? आपसांत फूट पडलेले राज्य टिकत नाही. आपसांत फूट पडलेले घरही टिकत नाही. सैतान स्वतःवरच उठला आणि त्याच्यात फूट पडली तर तोही टिकणार नाही, त्याचा शेवट होणार. बलवान माणसाला आधी बांधून टाकल्याशिवाय कोणालाही त्याच्या घरात शिरून त्याची मालमत्ता लुटता येणार नाही, त्याला बांधल्यावरच त्याचे घर लुटता येईल.

मी तुम्हांला नक्की सांगतो की, मानवपुत्रांना सर्व प्रकारच्या पापांची आणि त्यांनी केलेल्या दुर्भाषणांची क्षमा होईल, परंतु जो कोणी पवित्र आत्म्याची निंदा करील त्याला क्षमा नाहीच, तर तो सार्वकालिक पापाचा दोषी आहे. त्याला अशुद्ध आत्मा लागला आहे," असे ते म्हणत होते म्हणून तो हे बोलला..

वाचक : प्रभूचे हे शुभवर्तमान . 

सर्व : हे प्रभू येशू ख्रिस्ता,  तुझी स्तुती असो.   

चिंतन : सैतान सापळा रचतो. आपणांस गुलाम बनवितो. अविश्वासाची, अंधाराची अघोरी कृत्य करण्यासाठी तो आपणांस भुरळ पाडतो. शुद्ध, पवित्र, निर्मळ परमेश्वराची प्रतिमा आपल्याद्वारे कलंकित करण्याचा प्रयत्न करतो. एकदा अशुद्ध आत्म्यामध्ये अडकलो की आपण अविचारी बनतो. देवराज्यापासून आपण वंचित होतो. देवाज्ञा भंग करतो. देवाचा कोण ? आणि सैतानाचा कोण? यातील आपल्याला योग्य फारकत करता आली पाहिजे. येशूच्या शब्दात ईश्वरी ज्ञान आहे. येशूच्या शब्दात ईश्वरी न्याय आहे. येशूच्या कार्यात पवित्र आत्मा आहे. जो आपल्याला सातत्याने परमेश्वराकडे घेऊन जातो. सैतानाची एकजूट ही आपणांस विनाशाकडे घेऊन जाते. तर, येशूची पवित्र आत्म्याठायी एकजूट आपणांस सार्वकालीन जीवनाकडे घेऊन जाते. कारण येशूचा आत्मा आपणांस पापाच्या खाचेतून मुक्त  करतो. ख्रिस्ताच्या वचनात आणि पवित्र आत्म्याच्या सहवासात दृढ राहिल्याशिवाय आपणांस सैतानाला सामोरे जाता येणार नाही. देवरांज्याच्या कार्यासाठी प्रोत्साहीत होतो का? की माझे विचार शास्त्री व परुशी प्रमाणे पाडणारे आहे ?

प्रार्थना :हे प्रभू येशू, तुझी तारणदायी कृपा अनुभवून तुझ्याबरोबर आणि सर्वांबरोबर समेटाने व ऐक्याने जीवन जगण्यास शक्ती दे, आमेन.

सिनडसाठी प्रार्थना

हे पवित्र आत्म्या, तुझ्या नावाने एकत्र येऊन  

आम्ही तुझ्यासमोर उभे राहतो.

तू आमचा एकमेव मार्गदर्शक आहेस, 

आमच्या हृदयात तू वस्ती कर; 

आम्ही पुढे कसे जावे याबद्दल आम्हांला मार्गदर्शन कर 

आणि त्या मार्गाशी आम्हांला एकनिष्ठ ठेव.

आम्ही दुर्बळ आणि पापी आहोत; 

अस्थिरतेपासून आम्हाला दूर ठेव; 

अज्ञानाने आमचा मार्ग भ्रष्ट होऊ देऊ नकोस, 

पक्षपाताचा आमच्या कृतीवर प्रभाव पडू देऊ नकोस.

हे पवित्र आत्म्या,

तुझ्यामध्ये आम्हाला आमचे ऐक्य पाहू देः 

म्हणजे आम्ही शाश्वत जीवनाकडे एकत्र वाटचाल करू 

आणि सत्याच्या व योग्यतेच्या मार्गापासूनआम्ही भरकटणार नाही.

पिता आणि पुत्र ह्यांच्या ऐक्यात 

तू सर्वत्र आणि सर्वकाळ कार्य करतोस 

त्या तुझ्याकडे हे सर्व आम्ही मागतो, आमेन !

✝️