प्रभूच्या स्नानसंस्काराचा सण
सोमवार दि.९ जानेवारी २०२३
"हा माझा पुत्र मला परमप्रिय आहे, ह्याच्याविषयी मी संतुष्ट आहे."
आपल्या सर्वांचा बाप्तिस्मा परमेश्वर ! पिता, प्रभू येशू ख्रिस्त व पवित्र आत्मा ह्यांच्या नावाने झालेला आहे. पवित्र त्रैक्याद्वारेच आपल्या सर्वांचे तारण केले आहे. आपल्या सर्वांना नवजीवनाचा पवित्र आत्मा मिळाला आहे. आपणसुद्धा देवपित्याची प्रिय मुले बनलो आहोत.
प्रभू येशूच्या बाप्तिस्म्याचा सोहळा आपल्या सर्वांना आपल्या बाप्तिस्म्याची आठवण करुन देत आहे.ख्रिस्तात मुळावलेले असे पवित्र व परोपकारी जीवन जगण्यास प्रेरणा लाभावी म्हणून आज अंतर्मूख बनून आपल्या जीवनावर चिंतन करुया.
पहिले वाचन यशया ४२:१-४,६-७
वाचक :यशयाच्या पुस्तकातून घेतलेले वाचन
“पाहा, हा माझा सेवक आहे. त्याच्याविषयी माझा आत्मा संतुष्ट आहे."
प्रभू म्हणतो, “पाहा हा माझा सेवक याला मी आधार आहे. पाहा, हा माझा निवडलेला, याच्याविषयी माझा जीव संतुष्ट आहे. याच्याठायी मी आपला आत्मा घातला आहे. तो राष्ट्रांना न्याय प्राप्त करून देईल. तो गवगवा करणार नाही. तो आपला स्वर उंच करणार नाही. तो रस्त्यातून पुकारा करणार नाही. चेपलेला बोरू तो मोडणार नाही. मिणमिणती वात तो विझवणार नाही. तो प्रामाणिकपणे न्याय प्रस्थापित करील. पृथ्वीवर न्याय स्थापीपर्यंत तो मंदावणार नाही व भंगणार नाही. द्वीपे त्याच्या धर्मशास्त्राची प्रतीक्षा करतात.
मी परमेश्वर आहे. मी न्यायानुसार तुला बोलावले आहे. तुझा हात धरला आहे. तुला राखले आहे. तू लोकांना मी करार व राष्ट्रांना प्रकाश देणारा असे मी तुला करीन. आंधळ्याचे डोळे उघडावे, बंदिशाळेतून बंदिवानांना व अंधारात बसलेल्यांना कारागृहातून बाहेर काढावे म्हणून मी असे करीन."
हा प्रभूचा शब्द आहे.
सर्व : देवाला धन्यवाद.
प्रतिसाद स्तोत्र २८:१-४, ९-१०
प्रतिसाद : परमेश्वर आपल्या लोकांना शांतीचे वरदान देईल.
१) अहो देवपुत्रांनो, परमेश्वराला श्रेय द्या.
परमेश्वराला गौरव व सामर्थ्य यांचे श्रेय द्या.
परमेश्वराला त्याच्या वैभवी नामाचे श्रेय द्या.
पावित्र्याने युक्त होऊन त्याची आराधना करा.
२) परमेश्वराचा ध्वनी जलामधून उठत आहे.
रमेश्वर जलाशयावर आहे. परमेश्वराचा ध्वनी प्रबल आहे.
परमेश्वराचा ध्वनी प्रतापमय आहे.
३ )वैभवशाली परमेश्वर गर्जना करतो.
त्याच्या मंदिरात महिमा ! असे ते म्हणतात.
परमेश्वर जलप्रलयावर आरूढ होतो.
परमेश्वर राजासनावर सर्वकाळ बसलेला आहे.
जयघोष
आलेलुया, आलेलुया !
मेघातून अशी वाणी झाली की, "हा माझा प्रिय पुत्र आहे, ह्याचे तुम्ही ऐका.”
आलेलुया!
शुभवर्तमान मत्तय ३:१३-१७
वाचक : मत्तयलिखित पवित्र शुभवर्तमानातून घेतलेले वाचन
"बाप्तिस्मा घेतल्यानंतर परमेश्वराचा आत्मा येशूवर उतरला. "
योहानाच्या हातून वाप्तिस्मा घेण्याकरिता येशू गालिलाहून यार्देनवर आला, परंतु योहान त्याला मना करीत म्हणाला, "आपल्या हातून मी बाप्तिस्मा घ्यावा, असे असता आपण माझ्याकडे येता हे कसे ?” येशूने त्याला उत्तर दिले, “असू दे, कारण ह्या प्रकारे सर्व धर्माचरण पूर्ण करणे हे आपणाला उचित आहे." तेव्हा त्याने तसे होऊ दिले. मग बाप्तिस्मा घेतल्यानंतर येशू लगेच पाण्यातून वर आला आणि पाहा, आकाश उघडले; तेव्हा त्याने परमेश्वराचा आत्मा कबुतरासारखा उतरताना व आपणावर येताना पाहिला आणि पाहा, आकाशातून अशी वाणी झाली की, "हा माझा पुत्र मला परमप्रिय आहे, ह्याच्याविषयी मी संतुष्ट आहे."
वाचक : प्रभूचे हे शुभवर्तमान .
सर्व : हे प्रभू येशू ख्रिस्ता, तुझी स्तुती असो.
चिंतन: 'तू माझा परमप्रिय पुत्र आहेस...' ह्या शब्दांत स्तोत्र २:५ चा प्रतिध्वनी ऐकू येतो. ते स्तोत्र राजाच्या राज्याभिषेक समयी म्हटले जायचे. ख्रिस्ती व्यक्तीच्या बाप्तिस्म्यासमयी तिच्या कपाळावर पवित्र क्रुसाची खूण काढली जाते, छातीला व टाळूला पवित्र तेल लावले जाते. तिला पावित्र्याची वस्त्रे नेसविली जातात. तिच्या वतीने श्रद्धेची ज्योत आईबाप वधर्मआईबाप ह्यांच्या हाती दिली जाते.
आत्मपरीक्षण : माझ्या बाप्तिस्म्यामुळे माझ्या जीवनात नक्की कोणता बदल घडून आलेला आहे? मी इतर धर्मीयांपेक्षा कोणकोणत्या बाबतीत वेगळा आहे ? माझ्या जीवनात पवित्र आत्म्याचे कार्य कुठे व कसे सुरू आहे ?
प्रार्थना : हे प्रभू येशू ख्रिस्ता, देवाची प्रिय मुले बनण्यास आम्हाला प्रेरणा व कृपा दे, आमेन.
सिनडसाठी प्रार्थना
हे पवित्र आत्म्या, तुझ्या नावाने एकत्र येऊन
आम्ही तुझ्यासमोर उभे राहतो.
तू आमचा एकमेव मार्गदर्शक आहेस,
आमच्या हृदयात तू वस्ती कर;
आम्ही पुढे कसे जावे याबद्दल आम्हांला मार्गदर्शन कर
आणि त्या मार्गाशी आम्हांला एकनिष्ठ ठेव.
आम्ही दुर्बळ आणि पापी आहोत;
अस्थिरतेपासून आम्हाला दूर ठेव;
अज्ञानाने आमचा मार्ग भ्रष्ट होऊ देऊ नकोस,
पक्षपाताचा आमच्या कृतीवर प्रभाव पडू देऊ नकोस.
हे पवित्र आत्म्या,
तुझ्यामध्ये आम्हाला आमचे ऐक्य पाहू देः
म्हणजे आम्ही शाश्वत जीवनाकडे एकत्र वाटचाल करू
पिता आणि पुत्र ह्यांच्या ऐक्यात
तू सर्वत्र आणि सर्वकाळ कार्य करतोस
त्या तुझ्याकडे हे सर्व आम्ही मागतो, आमेन !
✝️
0 टिप्पण्या