प्रभू येशूचे प्रकटीकरण
रविवार दि.८ जानेवारी २०२३
ख्रिस्तसभा आज तीन मागी राजांना झालेले प्रभू येशू बाळाचे प्रकटीकरण "
सण साजरा करीत आहे. केवळ आकाशात दिसलेल्या अद्भूत ताऱ्याच्या दिशेने आलेले तीन मागी राजांनी यहुद्यांच्या राजाचा म्हणजेच येशू बाळाचा शोध घेतला. हजारो मैलाचा प्रवासउंटावर करुन त्यांनी बेथलेहेम गावाचा शोध करून हेरोद राजाकडे न जात त्यांनी बाळयेशू चे दर्शन घेतले. मौल्यवान द्रव्य, सोने, उद आणि गंधरस त्यांनी बाळयेशू राजाला समर्पण केले व शेवटी पाया पडून त्यांनी त्याला (येशूला) नमन केले. राजांच्या राजा समोर ते राजे नम्र होऊन नतमस्तक झाले.
बाळयेशूला भेटण्याची उत्सुकता त्या तीन ज्ञानी मागी माणसांमध्ये होती जी तळमळ होती व जो आदर होता तो आपल्यामध्ये यावा व आपण पवित्र मिस्सा बलिदानात प्रभू येशूची भेट घेण्यास उत्सुकता उत्पन्न व्हावी म्हणून प्रार्थना व चिंतन करू या.
तीन मार्गी ज्ञानी पुरुषांनी येशू बाळाचे दर्शन जवळून घेतले व ते धन्य झाले. प्रभू येशू तर पवित्र मिस्साबलिदानद्वारे प्रत्यक्ष हजार असून आपल्या अंत:करणात येत असतो. आपल्या जीवनाशी एकरुप होऊन त्याचे प्रेम, आनंद व शांतिचे वरदानाचू निरंतर वाहणारी नदी आपल्याला देत असतो. आपण तर त्या ज्ञानी पुरुषांपेक्षा सुध्दा भाग्यवान आहोत.
जगामध्ये अनेक माणसे आज देवाच्या शोधात आहेत. आपल्याला मिळालेला शांतिचा राजा व जीवनदाता प्रभू आपण आपल्या शब्दाद्वारे व कृतिद्वारे इतरांपर्यत पोहोचविण्यासाठी प्रयत्नशील बनू या.
शुभवर्तमान मत्तय २:१-१२
वाचक : मत्तयलिखित पवित्र शुभवर्तमानातून घेतलेले वाचन २:१-१२ .
"आम्ही त्याचा तारा पाहून त्याला नमन करायला आलो आहोत."
राजा हेरोदच्या अमदानीत, यहूदिया प्रांतातल्या बेथलेहेम येथे येशूचा जन्म झाला. त्याच्या जन्मानंतर काही मागी लोक पूर्वेकडून यरुशलेम येथे आले आणि विचारपूस करू लागले. “यहुद्यांचा राजा जन्माला आला आहे. तो कुठे आहे? आम्ही त्याचा तारा उगवलेला पाहिला म्हणून त्याला मुजरा करायला आम्ही आलोत.”हे ऐकताच राजा हेरोद आणि त्याबरोबर सारे यरुशलेम घाबरून गेले. त्याने यहुद्यांचे प्रमुख पुरोहित व शास्त्री जमवले आणि त्यांना विचारले, "ख्रिस्ताचा जन्म कुठे व्हायचा आहे ?” “यहुदियातल्या बेथलेहेम" येथे ते म्हणाले; कारण संदेष्ट्यांने लिहिले आहे. "यहुदा प्रांतातल्या बेथलेहेमा, यहुदाच्या सत्ताधीशापेक्षा तू मुळीच कनिष्ठ नाहीस; कारण तुझ्यातूनच एक नेता उदयाला येईल. आणि तो माझ्या इस्राएल लोकांचा प्रतिपालक होईल."
मग हेरोदाने त्या पूर्वेकडल्या मागी लोकांना गुपचूप बोलावून घेतले आणि तारा नक्की केव्हा दिसू लागला याची वेळ विचारून घेतली. नंतर त्यांना बेथलेहेमला जाण्यास सांगून तो म्हणाला, “तुम्ही जा आणि त्या बाळाचा बारकाईने शोध करा. त्याचा पत्ता लागला की मला खबर द्या, म्हणजे मीपण येऊन त्याला मुजरा करीन.”
राजाच्या सांगण्याप्रमाणे ते निघाले. जाता जाता त्यांना पूर्वी जो तारा पूर्वेस उगवलेला दिसला होता तो पुन्हा दिसू लागला. तो त्यांच्या पुढे पुढे जात होता. मग जेथे ते बाळ होते तेथे तो वर थांबला. तारा पाहून त्यांना खूपच आनंद झाला होता. ते घरात गेले तेव्हा ते बाळ आपली आई मरिया हिच्याजवळ असलेले त्यांना आढळले. बाळाच्या पायावर डोके ठेवून त्यांनी त्याला नमन केले. आपल्या थैल्या सोडून त्याला सोने, ऊद व गंधरस यांचे नजराणे दिले. मग ‘हेरोदाकडे परत जाऊ नका,' अशी स्वप्नात सूचना मिळाल्यामुळे ते दुसऱ्या वाटेने आपल्या देशाला निघून गेले.
✝️
0 टिप्पण्या