Marathi Bible Reading | Thursday 5thJanuary 2023| Christmas weekday

हे नवीन वर्ष आपल्या सर्वाना प्रभूच्या  सहवासात 

सुखाचे व  भरभराटीचे जावो  . 

गुरुवार   दि. ५ जानेवारी  २०२३

नथनेल त्याला म्हाणाला, “गुरुजी, आपण देवाचे पुत्र आहा! आपण इस्राएलचे राजे आहा ! " 

✝️

 संत जॉन नेपोम्युसिन न्यूमन

महागुरू, वर्तनसाक्षी (१८११-१८६०)

चिंतन :  "मृत्यू माणसाला कधी आणि देवाच्या इच्छेनुसार कसा गाठील ह्याचा नेम नसल्याने माणसाने सदैव जागृत राहून मृत्यूला सामोरे जाण्यास तयार असले पाहिजे.” - संत जॉन न्यूमन

 ✝️

  

 

पहिले वाचन १ योहान ३:११-२१

वाचक : योहानचे पहिले पत्र यातून घेतलेले वाचन 

"आपण बंधूजनांवर प्रीती करतो ह्यावरून आपणांला कळून येते की, आपण मरणातून निघून जीवनात आलो आहोत."

जो संदेश तुम्ही प्रारंभापासून ऐकता तो हाच आहे की, आपण एकमेकांवर प्रीती करावी. काईन त्या दुष्टाचा होता व त्याने आपल्या बंधूचा वध केला. त्याच्यासारखे आपण नसावे. त्याने त्याचा वध कशासाठी केला? कारण काईनची कृत्ये दुष्ट आणि त्याच्या बंधूची नीतीची होती.

बंधुंनो, जग तुमचा द्वेष करते याचे आश्चर्य मानू नका. आपण बंधुजनांवर प्रीती करतो ह्यावरून आपणांला कळून येते की, आपण मरणातून निघून जीवनात आलो आहोत. जो प्रीती करत नाही तो मरणात राहतो. जो कोणी आपल्या बंधूंचा द्वेष करतो तो नरहिंसक आहे आणि कोणाही नरहिंसकाच्या ठायी सार्वकालिक जीवन राहात नाही, हे तुम्हांला माहीत आहे. ख्रिस्ताने आपल्याकरता स्वतः चा प्राण अर्पिला ह्यावरून आपल्याला प्रीतीचे ज्ञान झाले आहे. तेव्हा आपणही आपल्या बंधूंकरिता स्वतःचा प्राण अर्पिला पाहिजे. मग जवळ संसाराचे साधने असून व आपला बंधू गरजवंत आहे हे पाहून जो स्वतःला त्याचा कळवळा येऊ देत नाही त्याच्या ठायी देवाची प्रीती कशी राहणार ?

मुलांनो, आपल्या शब्दांनी किंवा जिभेने नव्हे, तर कृतीने व सत्याने आपण प्रीती करावी. आपण सत्याचे आहो हे ह्यावरून आपल्याला कळून येईल आणि ज्याविषयी आपले मन आपल्या स्वतःला दोषी ठरवते त्याविषयी आपण स्वतःच्या मनाला त्याच्यासमोर उमेद देऊ. कारण आपल्या मनापेक्षा देव थोर आहे. त्याला सर्व काही कळते. प्रियजनहो, आपले मन आपल्याला दोषी ठरवीत नसेल तर देवासमोर येण्यास आपल्याला धैर्य आहे.

प्रभूचा शब्द 

सर्व : देवाला धन्यवाद.

प्रतिसाद स्तोत्र १००:१-५

प्रतिसाद : पृथ्वीवरील सर्व लोकहो, प्रभूचा जयजयकार करा.

१) पृथ्वीवरील सर्व लोकहो, प्रभूचा जयजयकार करा. 

आनंदाने प्रभूची सेवा करा. आनंदगीते गात त्याच्यासमोर या.

२) प्रभू हाच देव आहे, याची जाणीव ठेवा. 

आमचा निर्माणकर्ता तोच. आम्ही त्याचेच, 

त्याचे लोक, त्याच्या कुरणातला जणू कळप आहोत..

३) आभारप्रदर्शन करीत त्याच्या दारात व त्याच्या 

मंदिराच्या चौकात प्रवेश करा. त्याला धन्यवाद द्या. 

त्याच्या नामाचा महिमा गा.

४) खरोखर प्रभू चांगला आहे. 

त्याचे वात्सल्य अनंतकाळ टिकते. 

त्याची सात्त्विकता पिढ्यान्पिढ्या टिकते.

जयघोष

आलेलुया, आलेलुया ! 

आमच्यावर पवित्र दिवस उजाडला आहे, 

राष्ट्रांनो या, प्रभूला नमन करा. कारण आज जगावर महातेज पसरले आहे.

 आलेलुया!

शुभवर्तमान योहान १:४३-५१

वाचक :  योहानलिखित पवित्र शुभवर्तमानातून घेतलेले वाचन 

"आपण देवाचे पुत्र आहा, आपण इस्राएलचे राजे आहा. "

येशूने गालिलात जाण्याचा बेत केला. तेव्हा फिलीप त्याला भेटला. येशूने त्याला म्हटले, “माझ्यामागे ये." फिलीप हा तर अंद्रिया व पेत्र ह्याचे नगर बेथसैदा येथला होता. फिलीप नथनेल सापडल्यावर तो त्याला म्हणाला, “ज्याच्याविषयी मोशेने नियमशास्त्रात लिहिले व संदेष्ट्यांनी लिहिले तो म्हणजेयोसेफचा मुलगा येशू नाझरेथकर आम्हाला सापडला आहे.” नथनेल त्याला म्हणाला “नाझरेथातून काहीतरी उत्तम निघू शकते काय ?" फिलीप त्याला म्हणाला, “येऊन पाहा." नथनेलला आपणाकडे येताना पाहून येशू त्याच्याविषयी म्हणाला, “पाहा, हा खराखुरा इस्राएली आहे, ह्याच्याठायी कपट नाही !” नथनेल त्याला म्हणाला, “आपणाला माझी ओळख कोठली ?” येशूने त्याला उत्तर दिले, “फिलीपने तुला बोलवण्यापूर्वी तू अंजिराच्या झाडाखाली होतास, तेव्हाच मी तुला पाहिले. " नथनेल त्याला म्हाणाला, “गुरुजी, आपण देवाचे पुत्र आहा! आपण इस्राएलचे राजे आहा ! " येशू त्याला म्हणाला "मी तुला अंजिराच्या झाडाखाली पाहिले असे तुला सांगितले म्हणून तू विश्वास धरतोस काय ? ह्यापेक्षा मोठ्या गोष्टी पाहशील.” आणखी तो त्याला म्हणाला, “मी तुम्हांला नक्की सांगतो, आकाश उघडलेले आणि देवदूतांना चढताना व मनुष्याच्या पुत्रावर उतरताना तुम्ही पाहाल.”

वाचक : प्रभूचे हे शुभवर्तमान . 

सर्व : हे प्रभू येशू ख्रिस्ता,  तुझी स्तुती असो. 

चिंतन :  'येशू नथनेलला सापडला व नथनेलने त्यावर विश्वास ठेवला नाही. प्रभू येशूच्या सहवासात आल्यावर नथनेलला येशूची ओळख झाली. प्रभू येशूचे प्रेम, करुणा व ममता त्याने अनुभवली. नथलने प्रभू येशूचा गौरव प्रगट करीत  म्हटले, 'गुरुजी आपण देवाचे पुत्र आहात.' परमेश्वर प्रेम स्वरुप आहे आणि  त्याच्या प्रेमाचे सामर्थ्य सर्वांनाच आकर्षून घेत असते. त्याच्या प्रीतित वाढत असलेले व त्याच्या प्रीतित मुळावलेले भक्तगण आपल्या शब्दाद्वारे व कृतीद्वारे  जगात प्रेम पसरवित असतात. संत योहान आज आपल्याला आव्हानात्मक रुपाने प्रभू येशूच्या प्रीतित वाढण्यास व कृतीद्वारे व्यक्त करण्यास प्रेरणा देतआहे. प्रीति म्हणजे केवळ शब्दांची सहानुभूती नव्हे तर प्रीतिला कृतीची जोड हवी. त्यामध्ये फक्त  दुसऱ्याचे हीत पाहता आले पाहिजे. 

निस्वार्थी प्रेमामध्ये वाढण्यास व त्यागमय जीवन जगून प्रभूची सुवार्ता पसरविण्यास आपणा प्रत्येकाला प्रेरणा लाभावी म्हणून प्रभूकडे शरणागत होऊन प्रार्थना करू या.

प्रार्थना : हे प्रभू येशू, माझ्या अंत:करणात तुझ्या प्रेमाचा अंकुर वाढिस लाव • आणि परस्पर प्रीतिचे माध्यम मला बनव, आमेन.

सिनडसाठी प्रार्थना

हे पवित्र आत्म्या, तुझ्या नावाने एकत्र येऊन  

आम्ही तुझ्यासमोर उभे राहतो.

तू आमचा एकमेव मार्गदर्शक आहेस, 

आमच्या हृदयात तू वस्ती कर; 

आम्ही पुढे कसे जावे याबद्दल आम्हांला मार्गदर्शन कर 

आणि त्या मार्गाशी आम्हांला एकनिष्ठ ठेव.

आम्ही दुर्बळ आणि पापी आहोत; 

अस्थिरतेपासून आम्हाला दूर ठेव; 

अज्ञानाने आमचा मार्ग भ्रष्ट होऊ देऊ नकोस, 

पक्षपाताचा आमच्या कृतीवर प्रभाव पडू देऊ नकोस.

हे पवित्र आत्म्या,

तुझ्यामध्ये आम्हाला आमचे ऐक्य पाहू देः 

म्हणजे आम्ही शाश्वत जीवनाकडे एकत्र वाटचाल करू 

आणि सत्याच्या व योग्यतेच्या मार्गापासूनआम्ही भरकटणार नाही.

पिता आणि पुत्र ह्यांच्या ऐक्यात 

तू सर्वत्र आणि सर्वकाळ कार्य करतोस 

त्या तुझ्याकडे हे सर्व आम्ही मागतो, आमेन !

✝️