Marathi Bible Reading | 19th February 2023 | 7th Sunday in Ordinary Time |

सामान्यकाळातील सातवा  रविवार 

 दि.१९ फेब्रुवारी  २०२३

तुम्ही आपल्या वैऱ्यांवर प्रीती करा आणि जे तुमचा छळ करतात त्यांच्यासाठी प्रार्थना करा.

प्रभू येशू आज स्पष्टपणे सांगत आहे की, आपण संयम पाळून सहनशीलता दाखवावी. गरजवंतांस मदत करावी, म्हणून प्रभू म्हणतो, 'जो तुझ्याजवळ काही मागतो ! त्याला दे.' परस्पर प्रीतिबद्धल प्रभू येशू आव्हान पूर्वक सांगत आहे की, 'तुम्ही  आपल्या वैऱ्यावर प्रीति करा आणि जे तुमचा छळ करितात त्यांच्यासाठी  प्रार्थना करा.' पवित्रता, दया, क्षमा, समेट, परोपकार व प्रीतिचा आजचा संदेश आत्मासात करुन त्याप्रमाणे खरे ख्रिस्ती जीवन जगण्यासाठी आपण • चिंतनपूर्वक प्रयत्न करु या.

✝️

पहिले वाचन लेवीय  १९:१-२.१७-१८ 

 वाचक :    लेवीय या पुस्तकातून घेतलेले वाचन 

“तू आपल्या शेजाऱ्यावर स्वतः सारखी प्रीती कर."

परमेश्वर मोशेला म्हणाला, “इस्राएलच्या सर्व मंडळीस सांग की, तुम्ही पवित्र असावे, कारण मी परमेश्वर तुमचा देव पवित्र आहे.

आपल्या मनात आपल्या भावाचा द्वेष बाळगू नको; आपल्या शेजाऱ्यांची अवश्य कानउघडणी कर. नाही तर त्याच्यामुळे तुला पाप लागेल. सूड उगवू नको किंवा आपल्या भाऊबंदांपैकी कोणाचा दावा धरू नको, तर तू आपल्या शेजाऱ्यांवर स्वतः सारखी प्रीती कर; मी परमेश्वर आहे."

हा प्रभूचा शब्द 

सर्व : देवाला धन्यवाद.

प्रतिसाद स्तोत्र  १०३:१- ४,८,१०,१२-१३

प्रतिसाद :  परमेश्वर दयाळू आणि कृपाळू आहे.

१ हे माझ्या मना, परमेश्वराला धन्यवाद दे, 

हे माझ्या सर्व अंतर्यामा, त्याच्या पवित्र नावाला धन्यवाद दे. 

हे माझ्या मना, परमेश्वराला धन्यवाद दे, 

त्याचे सर्व उपकार विसरू नकोस.

२ तो तुझ्या सर्व दुष्कर्माची क्षमा करतो, 

तो तुझे सर्व रोग बरे करतो, 

तो तुला दया आणि करुणा ह्यांचा मुकूट घालतो.

तो तुझा जीव विनाशगर्तेतून उध्दारतो,

३ परमेश्वर दयाळू आणि कृपाळू आहे, 

तो मंदक्रोध आणि दयामय आहे. 

आमच्या अपराधांच्या मानाने त्याने 

आमच्या दुष्कृत्यांबद्दल आम्हांला प्रतिफळ दिले नाही.

४. पश्चिमेपासून पूर्व जितकी दूर आहे, 

तितके त्याने आमचे अपराध

दुसरे वाचन १ करिंथकरास  ३:१६-२३

वाचक : पौलचे करिंथकरास पहिले पत्र यातून घेतलेले वाचन 

"सर्व काही तुमचे आहे; तुम्ही ख्रिस्ताचे आहा आणि ख्रिस्त देवाचा आहे. "

तुम्ही देवाचे मंदिर आहा आणि तुम्हांमध्ये देवाचा आत्मा निवास करतो हे तुम्हास ठाऊक नाही काय ? जर कोणी देवाच्या मंदिराचा नाश करतो तर देव त्याचा नाश करील. कारण देवाचे मंदिर पवित्र आहे, तेच तुम्ही आहा.

कोणी स्वतःला फसवून घेऊ नये. ह्या युगाच्या दृष्टीने आपण ज्ञानी आहो असे जर तुमच्यापैकी कोणाला वाटत असेल तर त्याने ज्ञानी होण्याकरता मूर्ख व्हावे. कारण ह्या जगाचे ज्ञान देवाच्या दृष्टीने मूर्खपणा आहे. कारण “तो ज्ञान्यांस त्यांच्याच धूर्तपणात धरतो" असा शास्त्रलेख आहे आणि "ज्ञान्यांचे विचार व्यर्थ आहेत हे परमेश्वर ओळखतो,” असा दुसरा शास्त्रलेख आहे. म्हणून माणसांविषयी कोणी अभिमान बाळगू नये, कारण सर्वकाही तुमचे आहे; पौल असो, अपुल्लो असो, अथवा केफा असो, जग असो, जीवन असो, अथवा मरण असो, वर्तमानकाळच्या गोष्टी असोत अथवा भविष्यकाळच्या गोष्टी असोत, सर्वकाही तुमचे आहे आणि तुम्ही ख्रिस्ताचे आहा आणि ख्रिस्त देवाचा आहे.

हा प्रभूचा शब्द 

सर्व : देवाला धन्यवाद.

जयघोष 

आलेलुया, आलेलुया ! 

 प्रभूच्या नावाने येणारा राजा धन्यवादित असो! 

स्वर्गात शांती आणि उर्ध्वलोकी गौरव! 

 आलेलुया!

शुभवर्तमान मत्तय ५:३८-४८

वाचक :  मत्तयलिखित पवित्र शुभवर्तमानातून घेतलेले वाचन

"आपल्या वैऱ्यांवर प्रीती कर.' 

 येशूने आपल्या शिष्यांना म्हटले, " 'डोळ्याबद्दल डोळा आणि दाताबद्दल दात' असे सांगितले होते, हे तुम्ही ऐकले आहे. मी तर तुम्हांला सांगतो, दुष्टाला अडवू नका. जो कोणी तुझ्या उजव्या गालावर मारतो, त्याच्याकडे दुसरा गाल कर; जो तुझ्यावर फिर्याद करुन तुझी बंडी घेऊ पाहतो त्याला तुझा अंगरखाही घेऊ दे, आणि जो कोणी तुला वेठीस धरून एक कोस नेईल त्याच्याबरोबर दोन कोस जा. जो तुझ्याजवळ काही मागतो त्याला दे आणि जो तुझ्यापासून उसने घेऊ पाहतो त्याला पाठमोरा होऊ नको.

आपल्या शेजाऱ्यांवर प्रीती कर आणि आपल्या वैऱ्यांचा द्वेष कर, असे सांगितले होते, ते तुम्ही ऐकले आहे. मी तर तुम्हांला सांगतो, तुम्ही आपल्या वैऱ्यांवर प्रीती करा आणि जे तुमचा छळ करतात त्यांच्यासाठी प्रार्थना करा. अशासाठी की, तुम्ही आपल्या स्वर्गातील पित्याचे पुत्र व्हावे; कारण तो वाइटांवर आणि चांगल्यांवर आपला सूर्य उगवतो आणि नीतिमानांवर आणि अनीतिमानांवर पाऊस पाडतो. जे तुमच्यावर प्रीती करतात त्यांच्यावर तुम्ही प्रीती केली तर तुमचे प्रतिफळ काय ? जकातदारही तसेच करतात ना ? आणि तुम्ही आपल्या बंधुजनांना मात्र प्रणाम करीत असला तर त्यात विशेष ते काय करता ? परराष्ट्रीयही तसेच करतात ना? ह्यास्तव जसा तुमचा स्वर्गीय पिता पूर्ण आहे तसे तुम्ही पूर्ण व्हा."

प्रभूचे हे शुभवर्तमान

सर्व : हे प्रभू येशू ख्रिस्ता  तुझी स्तुती असो.

चिंतन:  परमेश्वराने मानवाला आपल्या प्रतिमेप्रमाणे निर्माण केलेले आहे. ह्या पृथ्वीतलावरील जीवन जगत असताना माणसाने आपली ही प्रतिमा जपण्यासाठी झटायचे असते. आजची तिन्ही वाचने त्या दृष्टीने आपल्याला मार्गदर्शन करतात. ह्या तीन वाचनांतील तीन वाक्यांवर आपण चिंतन करू या. 

अ. “मी, परमेश्वर तुमचा देव जसा पवित्र आहे तसे तुम्हीही पवित्र व्हा.” पावित्र्य हे परमेश्वराचे अंगभूत वैशिष्ट्ये आहे अशी इस्राएली लोकांची धारणा होती. पवित्र कार्यासाठी निवडलेली व्यक्ती परमेश्वर अभिषिक्त करीत असतो, अशा व्यक्तीने इतरांपेक्षा अधिक सात्विकतेने जीवन जगावे अशी इस्राएली लोकांची अपेक्षा होती. आजच्या पहिल्या वाचनात (लेवीय १९:१-२, १७-१८), परमेश्वराचे हे अंगभूत वैशिष्ट्य अंगिकारण्यास आपल्याला पाचारण करण्यात आलेले आहे.

 ब. देवाचे मंदिर पवित्र आहे आणि ते तुम्हीच आहात. आजच्या दुसऱ्या वाचनात संत पॉल (१ करिंथ ३:१६-२३) करिंथच्या लोकांना

त्याच्या जीवनातील प्रतिष्ठेची जाणीव करून देतो. तो त्यांना देवाच्या मंदिराची उपमा देतो. इतरत्र त्याने “तुमचे शरीर पवित्र आत्म्याचे मंदिर आहे. " (१ करिंथ ६:१९), असे म्हटलेले आहे. इथे पॉल आपल्याला एक नवा विचार देतो. कोणताही मनुष्य स्वपरिश्रमाने पवित्र बनू शकत नाही. त्याचे ज्ञानदेखील त्याला पवित्र करू शकत नाही. देवाच्या त्याच्याठायी असलेल्या दिव्य उपस्थितीमुळे तो पवित्र बनत असतो.

 क. “जसा तुमचा स्वर्गीय पिता परिपूर्ण आहे तसे तुम्ही परिपूर्ण व्हा.” आजच्या शुभवर्तमानात (मत्तय ५:३८-४८) परमेश्वराचे मानवावरील बिनशर्त प्रेम ही त्याच्या परिपूर्णतेची वा पावित्र्याची खूण आहे असे येशू शिकवितो. लूकच्या मते पावित्र्य हे दयाळूपणात दडलेले असते. येशू म्हणतो, “जसा तुमचा स्वर्गीय पिता दयाळू आहे, तसे तुम्हीही दयाळू व्हा.” (लूक ६:३६) 

आत्मपरीक्षण : पावित्र्याविषयी माझी संकल्पना कशी आहे? माझ्या जीवनातील कोणकोणत्या बाबतीत परमेश्वर मला पवित्र, दयाळू आणि परिपूर्ण होण्यास बोलावीत आहे ?

प्रार्थना :  हे प्रभू परमेश्वरा, पवित्र आचरण करण्यास तुझ्या आज्ञांचे पालन करता यावे म्हणून आम्हाला प्रेरणा व कृपा दे, आमेन.

सिनडसाठी प्रार्थना

हे पवित्र आत्म्या, तुझ्या नावाने एकत्र येऊन  

आम्ही तुझ्यासमोर उभे राहतो.

तू आमचा एकमेव मार्गदर्शक आहेस, 

आमच्या हृदयात तू वस्ती कर; 

आम्ही पुढे कसे जावे याबद्दल आम्हांला मार्गदर्शन कर 

आणि त्या मार्गाशी आम्हांला एकनिष्ठ ठेव.

आम्ही दुर्बळ आणि पापी आहोत; 

अस्थिरतेपासून आम्हाला दूर ठेव; 

अज्ञानाने आमचा मार्ग भ्रष्ट होऊ देऊ नकोस, 

पक्षपाताचा आमच्या कृतीवर प्रभाव पडू देऊ नकोस.

हे पवित्र आत्म्या,

तुझ्यामध्ये आम्हाला आमचे ऐक्य पाहू देः 

म्हणजे आम्ही शाश्वत जीवनाकडे एकत्र वाटचाल करू 

आणि सत्याच्या व योग्यतेच्या मार्गापासूनआम्ही भरकटणार नाही.

पिता आणि पुत्र ह्यांच्या ऐक्यात 

तू सर्वत्र आणि सर्वकाळ कार्य करतोस 

त्या तुझ्याकडे हे सर्व आम्ही मागतो, आमेन !

✝️