वाचक : योहान लिखित पवित्र शुभवर्तमानातून घेतलेले वाचन
“तो बहिऱ्यांना ऐकण्याची आणि मुक्यांना बोलण्याची शक्ती देतो."
गालीलातील काना येथे एक लग्न होते आणि येशूची आई तेथे होती. येशूला आणि त्याच्या शिष्यांनाही लग्नाचे आमंत्रण होते. मग द्राक्षारस संपला तेव्हा येशूची आई त्याला म्हणाली, “त्यांच्याजवळ द्राक्षारस नाही.” येशू तिला म्हणाला, “बाई, ह्याच्याशी तुझा माझा काय संबंध? माझी वेळ अजून आली नाही.” त्याची आई चाकरांना म्हणाली, “हा तुम्हाला जे काही सांगेल ते करा.” तेथे पाण्याचे सहा दगडी रांजण, यहूद्यांच्या शुद्धीकरणाच्या रीतीप्रमाणे ठेवलेले होते. त्यात दोन दोन, तीन तीन मण पाणी मावेल असे ते होते. येशू त्यांना म्हणाला, “रांजण पाण्याने भरा” आणि ते त्यांनी काठोकाठ भरले. मग त्याने त्यांना सांगितले, “आता त्यातले काढून भोजनकारभाऱ्याकडे न्या.” तेव्हा त्यांनी ते नेले. द्राक्षारस बनलेले पाणी भोजनकारभाऱ्याने चाखले, तेव्हा भोजनकारभारी वराला बोलावून म्हणाला, "प्रत्येक मनुष्य पहिल्याने चांगला द्राक्षारस वाढतो आणि लोक यथेच्छ प्याले की मग नीरस वाढतो, तू तर चांगला द्राक्षारस आतापर्यंत राखून ठेवला आहेस.” येशूने गालीलातील काना येथे आपल्या चिन्हांचा हा प्रारंभ करून आपला गौरव प्रकट केला आणि त्याच्या शिष्यांनी त्याच्यावर विश्वास ठेवला.
प्रभूचे हे शुभवर्तमान
सर्व : हे प्रभू येशू ख्रिस्ता तुझी स्तुती असो.
चिंतन: आज ख्रिस्तसभा लुडर्स मातेचा सण साजरा करीत आहे. यशया संदेष्टा पहिल्या वाचनात मरिया मातेच्या सांत्वनावर प्रकाश टाकतो. यशया संदेष्टा म्हणतो की, जशी आई आपल्या मुलांचे सात्वन करते, त्याचप्रकारे देव त्याच्या लोकांचे सांत्वन करील. अडचणी आणि परीक्षांच्या वेळी देव त्याच्या लोकांना सांत्वन देईल. सर्व शोक आनंदात बदलेल. देवाच्या सांत्वनाने आपली अंतःकरणे आनंदीत होतील आणि त्याचे लोक भरभराट पावतील. वाचनात आपण काना येथील लग्न समारंभाचा दाखला ऐकतो. द्राक्षरसाचा तुटवडा असल्याने कुटुंब व्यथीत झाले. यावेळी आपण मरिया मातेची संवेदनशीलता पाहतो. जी त्याचे दुःख आणि त्यांची गरज जाणण्यास सक्षम आहे. या संकटाच्या काळात येशूच त्यांना मदत करू शकतो हे पूर्णपणे जाणून ती येशूकडे मध्यस्थी करते. अशाचप्रकारे, आपल्या जीवनात जेव्हा आपल्याला विविध संकटांचा सामना करावा लागतो, तेव्हा आपली आई मरिया नेहमीच आपल्या समस्यांबद्दल आणि आपल्या गरजांबद्दल संवेदनशील असते. ती आपल्यासाठी मध्यस्थी करून आपल्याला सांत्वन देते की, आपल्या निराशेच्या काळात आपल्याला सांत्वन देण्यासाठी देव आपल्या जीवनात चमत्कार करू शकेल. आमची आई ही एक सांत्वन देणारी आई आहे आणि आमचा देव नेहमीच आमची काळजी आणि संरक्षण करतो.
प्रार्थना :हे पवित्र मरिये, तु महान आहेस. आमच्या सर्व गरजा तू भागवतेस गरजवंताच्या सहाय्याला धावून जाण्यास आम्हाला प्रेरणा दे, आमेन.
सिनडसाठी प्रार्थना
हे पवित्र आत्म्या, तुझ्या नावाने एकत्र येऊन
आम्ही तुझ्यासमोर उभे राहतो.
तू आमचा एकमेव मार्गदर्शक आहेस,
आमच्या हृदयात तू वस्ती कर;
आम्ही पुढे कसे जावे याबद्दल आम्हांला मार्गदर्शन कर
आणि त्या मार्गाशी आम्हांला एकनिष्ठ ठेव.
आम्ही दुर्बळ आणि पापी आहोत;
अस्थिरतेपासून आम्हाला दूर ठेव;
अज्ञानाने आमचा मार्ग भ्रष्ट होऊ देऊ नकोस,
पक्षपाताचा आमच्या कृतीवर प्रभाव पडू देऊ नकोस.
हे पवित्र आत्म्या,
तुझ्यामध्ये आम्हाला आमचे ऐक्य पाहू देः
म्हणजे आम्ही शाश्वत जीवनाकडे एकत्र वाटचाल करू
आणि सत्याच्या व योग्यतेच्या मार्गापासूनआम्ही भरकटणार नाही.
पिता आणि पुत्र ह्यांच्या ऐक्यात
तू सर्वत्र आणि सर्वकाळ कार्य करतोस
त्या तुझ्याकडे हे सर्व आम्ही मागतो, आमेन !
0 टिप्पण्या