सामान्यकाळातील सातवा सप्ताह
मंगळवार दि.२१ फेब्रुवारी २०२३
"जो कोणी माझ्या नावाने अशा बालकांपैकी एकाला स्वीकारतो, तो मला स्वीकारतो आणि ........ "
✝️
- (१००७-१०७२)
✝️
फा. डेमियन ह्यांच्या श्रमाचे सार्थक व्हावे म्हणून पीटर ह्याने मन लावून अभ्यास केला. वयाच्या २५ व्या वर्षीच रेव्हेना आणि पार्मा ह्या इटालियन शहरांमध्ये एक हाडाचा शिक्षक म्हणून त्याचे नाव सर्वतोमुखी झाले होते.
त्याने सर्वात कडक शिस्तीच्या बेनेडिक्टाईन मठात प्रवेश घेतला. तिथे कठोर तपश्चर्या आणि प्रायश्चित्त घेतले. त्यामुळे तेथील भिक्षुकांना आणि आसपासच्या परिसरातील भिक्षुकांना आध्यात्मिक मार्गदर्शन करण्यासाठी त्यांची नेमणूक करण्यात आली.
(संत) पीटर डेमियन ह्यांचे पवित्र मरियेवर विशेष प्रेम होते. ज्या फॉन्टे अॅव्हेलेना मठात त्यांनी एक नवशिष्य म्हणून प्रवेश घेतलेला होता त्याच मठात त्यांची मठाधिकारी म्हणून वयाच्या अवघ्या ३६ व्या वर्षी निवड करण्यात आली. आपल्या मृत्यूपर्यंत २९ वर्षे ह्या मठाची धुरा त्यांनी वाहिली.
आपल्या वैशिष्ट्यपूर्ण कारकीर्दीत त्यांनी बेनेडिक्टाईन आचारसंहिता काहीशी शिथील बनविली आणि शिस्तीमध्ये सातत्य आणले. (संत) पीटर डेमियन ह्यांनी अनेक मठांची उभारणीसुद्धा केली. याशिवाय त्या काळात ख्रिस्तसभेत उदयास येत असलेल्या अनेक पाखंडवादी आणि धर्मविरोधी पंथ-उपपंथांशी त्यांनी धैर्यान मुकाबला केला. त्यासाठी लेखन व वक्तृत्व ही दोन्ही प्रभावी माध्यमे त्यांनी सर्रासपणे वापरली.
अंतर्गत शत्रूंवर देखील त्यानी कडक ताशेरे ओढले. चैनबाजी, ऐषाराम, निष्काळजीपणा, ब्रम्हचर्याची हेळसांड, ख्रिस्तसभेच्या पवित्र वस्तूंची खरेदी- विक्री, पोपमहाशयांच्या शिकवणुकीशी फितुरी अशा कितीतरी पापांच्या चिखलात दीक्षित धर्मगुरू लोळत होते. इतकेच नव्हे तर पैसे, सोने, चांदी देणाऱ्या व्यापाऱ्यांच्या व गर्भश्रीमंतांच्या मुलांना अल्पावधीत, कुठलीही परीक्षा न घेता कसेबसे धर्मगुरूपद दिले जात होते. ह्या भयंकर पातकाविरुद्ध पीटर डेमियन ह्यांनी आवाज उठविला व इ. स. १०५१ साली “लिबेर गोमोरियानुस” आणि “लिबेर ग्राटीसिमुस” नावाचे दोन ग्रंथ प्रसिद्ध केले. त्यामुळे ख्रिस्तसभेत खळबळ माजली व त्यानुसार ख्रिस्तसभेत एक विशिष्ट शिस्त आणण्यात आली.
रोमने त्यांच्या कार्याची दखल घेतली आणि इ. स. १०५० साली पोप स्टीफन दहावे ह्यांनी मठाधिकारी पीटर डेमियन ह्यांना कार्डीनलपदाची दीक्षा दिली व ऑस्ट्रीयासारख्या सरधर्मप्रांतावर त्यांची नियुक्ती करून टाकली.
त्याच काळात ते गुब्बियो नामक धर्मप्रांताचे प्रशासकदेखील होते. त्या व्यतिरिक्त पुढील सात पोपमहाशयांना नाजूक गोष्टींबाबत त्यांनी मोलाचा सल्ला देण्याचे काम केले. त्याचे समकालीन असलेल्या सर्व प्रतिष्ठीत लोकांबरोबर त्यांनी जिव्हाळ्याचे संबंध प्रस्थापित केले. पोप महाशयांनी त्यांना मिशनविभाग, महागुरूंचे व मठवासियांसाठी पोपचे प्रतिनिधी म्हणूनही नियुक्त केलेले होते.
• कार्डिनल पीटर डेमियन ह्यांनी सर्व जबाबदाऱ्या मोठ्या कर्तव्यदक्षतेने पार पाडल्या. मात्र त्यांना सतत डोकेदुखीचा त्रास होत असे. त्यामुळे डोकेदुखीवर इलाज म्हणून संत पीटर डेमियन ह्यांचा धावा केला जातो.
नम्रतेचे जीवन जगणे सोपे नाही त्यासाठी आपल्याठायी धैर्य व आत्मबलिदान करण्याची तयारी असावी लागते. जीवन जगण्यासाठी चिकाटी आणि एकाग्रता असावी लागते. आज आपण लहान बाळकांचे निरीक्षण करुन त्यांचे चांगले गुण आत्मसात करण्याचा प्रयत्न करु या.
✝️
पहिले वाचन बेन सिरा २:१-११
वाचक : बेन सिरा या पुस्तकातून घेतलेले वाचन
"मोहाला तोंड देण्यास तयार रहा. "
माझ्या पुत्रा, जर तुला परमेश्वराची सेवा करायची असेल तर मोहाला तोंड देण्यास तयार रहा.
आपले हृदय धैर्यवान बनव, बलवंत हो आणि संकटकाळी धैर्य खचू देऊ नकोस.
परमेश्वराला सोडू नकोस, त्याला चिकटून राहा; म्हणजे तुझ्या जीवनाच्या अंती तुझा सन्मान होईल. जे जे पुढे येईल त्याला सामोरे जा, तुझ्या नम्रतेची परीक्षा होणाऱ्या परिस्थितीत सहनशील रहा. कारण जशी सोन्याची परीक्षा अग्नीत होते तशी भल्या माणसांची परीक्षा नम्रतेच्या भट्टीत होत असते. परमेश्वरावर विश्वास ठेव म्हणजे तो तुला सहाय्य करील; सरळ मार्गाने चाल आणि परमेश्वरावर आशा ठेव.
तू परमेश्वरावर भय धर, त्याच्या दयेसाठी थांबून राहा; त्याच्यापासून दूर जाऊ नकोस, नाहीतर तू पापात पडशील. तू परमेश्वराचे भय बाळग आणि त्याच्यावर विश्वास ठेव, तुझे प्रतिफळ चुकणार नाही. तू परमेश्वराचे भय धरतोस म्हणून सार्वकालिक आनंद आणि दयेसाठी तुला चांगल्या गोष्टीची प्राप्ती होईल.
आपल्या पूर्वजांचा विचार कर आणि सांग की, ज्याने परमेश्वरावर विश्वास ठेवला तो कधी लज्जित झाला काय ? किंवा ज्याने परमेश्वराचे भय धरले त्याला देवाने कधी टाकले काय ? किंवा ज्याने परमेश्वराचा धावा केला त्याची विनंती देवाने कधी अव्हेरली काय ?
कारण परमेश्वर कृपाळू आणि दयाळू आहे; तो पापांची क्षमा करतो आणि संकटात रक्षण करतो.
हा प्रभूचा शब्द
सर्व : देवाला धन्यवाद.
प्रतिसाद स्तोत्र ३७ :३ -४,१८-१९, २७-२८, ३९-४०
प्रतिसाद : परमेश्वरावर भाव ठेव म्हणजे तो तुझे मनोरथ पूर्ण करील.
१) परमेश्वरावर भाव ठेव आणि सदाचाराने वाग;
देशात वस्ती करून राहा, इमानाने चाल.
म्हणजे परमेश्वराच्या ठायी तुला आनंद होईल,
तो तुझे मनोरथ पूर्ण करील.
२) सात्त्विकांच्या दिनचर्येकडे परमेश्वराचे लक्ष असते,
त्यांचे वतन सर्वकाळ टिकेल.
ते विपत्काळी लज्जित होणार नाहीत.
दुष्काळाच्या दिवसांत तृप्त राहतील.
३) वाईटापासून दूर राहा, बरे ते कर,
म्हणजे तुझी वस्ती कायम राहील;
कारण परमेश्वराला न्याय प्रिय आहे,
तो आपल्या भक्तांना सोडत नाही.
४) नीतिमानांचे तारण परमेश्वरापासून होते,
संकटसमयी तोच त्यांचा दुर्ग आहे.
परमेश्वर त्यांना सहाय्य करतो आणि त्यांना मुक्त करतो;
त्यांना दुर्जनांपासून मुक्त करतो आणि तारतो,
कारण त्यांनी त्याचा आश्रय घेतला आहे.
जयघोष
आलेलुया, आलेलुया !
तुम्ही आपली मने कठोर करू नका, तर परमेश्वराच्या वाणीकडे लक्ष द्या.
आलेलुया!
शुभवर्तमान मार्क ९:३०-३६
वाचक : मार्क लिखित पवित्र शुभवर्तमानातून घेतलेले वाचन
"मनुष्यांचा पुत्र माणसांच्या हाती दिला जाणार आहे. जर कोणी पहिला होऊ इच्छित असेल तर त्याने सर्वात शेवटला झाले पाहिजे."
येशू आणि त्याचे शिष्य गालिलमधून चालले होते आणि हे कोणाला कळू नये, अशी त्याची इच्छा होती. कारण तो आपल्या शिष्यांना शिकवत होता; “मनुष्याचा पुत्र माणसांच्या हाती दिला जाणार आहे, ते त्याला जिवे मारतील आणि मारला गेल्यानंतर तिसऱ्या दिवशी तो पुन्हा उठेल.” परंतु ह्या बोलण्याचा अर्थ त्यांना समजला नाही आणि त्याला विचारण्यास ते भ्याले.
पुढे ते कफर्णहूमला आले आणि तो घरी असता त्याने त्यांना विचारले, "तुम्ही वाटेत कसली चर्चा करीत होता ?” ते गप्प राहिले, कारण सर्वांत मोठा कोण ह्याविषयी त्यांची वाटेत चर्चा चालली होती. त्याने बसून त्या बारा जणांना बोलावून म्हटले, "जर कोण पहिला होऊ इच्छित असेल तर त्याने सर्वात शेवटला आणि सर्वांचा सेवक झाले पाहिजे.” मग त्याने एक बालक घेऊन त्यांच्यामध्ये ठेवले आणि त्याला कवटाळून तो त्यांना म्हणाला, "जो कोणी माझ्या नावाने अशा बालकांपैकी एकाला स्वीकारतो, तो मला स्वीकारतो आणि जो कोणी मला स्वीकारतो तो मला नाही तर ज्याने मला पाठवले त्याला स्वीकारतो.”
प्रभूचे हे शुभवर्तमान
सर्व : हे प्रभू येशू ख्रिस्ता तुझी स्तुती असो.
चिंतन:आजच्या शुभवर्तमानामध्ये येशू त्याच्या मृत्यू आणि पुनरुत्थानाबद्दल भाकित करतो. येणाऱ्या दुःखांबद्दल येशू त्यांच्याशी काय बोलत होता है। समजणे शिष्यांना कठीण गेले. दुसरीकडे त्यांना देवाच्या राज्यात सर्वांत मोठा कोण असेल याची चिंता होती. येशू शिष्यांना सांगतो की, जो स्वतः सेवक बनू पाहतो व जो स्वतःला लहान करू पाहतो तोच महान होईल. आजच्या पहिल्या वाचनात आपण सर्व दुःख सहन करण्याबाबत ऐकतो. आपण विविधप्रकारचे दुःख सहन करू शकतो, तेव्हाच आपण वाढू शकतो आणि महान होऊ शकतो. सोन्याची परीक्षा अग्नीत होते तशी प्रामाणिक माणसाची परीक्षा संकटात होते. जीवनातील कठीण प्रसंगामध्ये धीर आणि संयम बाळगल्यामुळे संकटे सहजपणे दूर होतात व मानवाला जीवनाचा खरा अर्थ कळतो. जीवनातील विविध संकटे सहन करण्यास सक्षम होण्यासाठी सर्वात महत्त्वाचा पैलू म्हणजे आपण देवावर ठेवलेला विश्वास. तोच विश्वास एखाद्या व्यक्तीला देवाच्या जवळ जाण्यासाठी सक्षम करील. येशूला सर्वप्रकारचे दुःख नम्रतेने व धीराने सहन करता आले. देवाच्या प्रेमात वाढ होण्यासाठी आपण संयम आणि सहनशीलतेच्या देणगीसाठी देवाकडे प्रार्थना करूया.
प्रार्थना : हे प्रभू येशू, तुझ्यासारखे नम्र हृदय मजला लाभावे म्हणून माझ्यातील अहंकार व गर्विष्ठपणा काढून टाक आणि माझे जीवन परिवर्तन कर, आमेन
सिनडसाठी प्रार्थना
हे पवित्र आत्म्या, तुझ्या नावाने एकत्र येऊन
आम्ही तुझ्यासमोर उभे राहतो.
तू आमचा एकमेव मार्गदर्शक आहेस,
आमच्या हृदयात तू वस्ती कर;
आम्ही पुढे कसे जावे याबद्दल आम्हांला मार्गदर्शन कर
आणि त्या मार्गाशी आम्हांला एकनिष्ठ ठेव.
आम्ही दुर्बळ आणि पापी आहोत;
अस्थिरतेपासून आम्हाला दूर ठेव;
अज्ञानाने आमचा मार्ग भ्रष्ट होऊ देऊ नकोस,
पक्षपाताचा आमच्या कृतीवर प्रभाव पडू देऊ नकोस.
हे पवित्र आत्म्या,
तुझ्यामध्ये आम्हाला आमचे ऐक्य पाहू देः
म्हणजे आम्ही शाश्वत जीवनाकडे एकत्र वाटचाल करू
आणि सत्याच्या व योग्यतेच्या मार्गापासूनआम्ही भरकटणार नाही.
पिता आणि पुत्र ह्यांच्या ऐक्यात
तू सर्वत्र आणि सर्वकाळ कार्य करतोस
त्या तुझ्याकडे हे सर्व आम्ही मागतो, आमेन !
✝️
0 टिप्पण्या