Marathi Bible Reading | Sunday | 24th January 2021

      सामान्य काळातील ३रा रविवार   

२४ जानेवारी २०२१

(देवशब्द रविवार )

आपल्या सर्वना प्रभू येशूने पाचारण करुन देवराज्यात प्रवेश करण्यासाठी  व त्याची सुवार्ता पसरविण्याचे आवाहन केले आहे, पीक खूप आहे, कामगार थोडे आहेत.' प्रभूच्या मळ्यात कार्य करण्यासाठी प्रभूला आपली गरज आहे. आपण  बुद्धिमान नसतो किंवा आपल्याला जास्त कलागुण नसतील तरी आपण प्रभूचे कार्य आपल्या लहानशा कृतीद्वारे करु शकतो. आपल्या शब्दाद्वारे, कृतीद्वारे व प्रार्थनेद्वारे आपण अनेकांचे जीवन परिवर्तन करु शकतो आणि देवाचे राज्य प्रस्थापित करण्यासाठी हातभर लावू शकतो.  

✝️

 "पश्चात्ताप करा आणि सुवार्ता वर विश्वास ठेवा." 

✝️

पहिले वाचन :योना  ३:१-५.१०

वाचक :  योना या पुस्तकातून घेतलेले वाचन ३:१-५.१०

    परमेश्वराचे वचन योनाला दुसऱ्यांदा प्राप्त झाले ते असे: "ऊठ, त्या मोठ्या निनवे शहरास जा आणि मी तुला सांगेन तो संदेश त्यास आरोळी करून सांग." तेव्हा योना उठून परमेश्वराच्या वचनाप्रमाणे निनवेस गेला. निनवे हे देवाच्या दृष्टीने मोठे शहर होते, ते सगळे फिरून येण्यास तीन दिवस लागत. योना त्यातून एक दिवसाची वाट चालत असता ओरडत गेला, "चाळीस दिवसांचा अवकाश आहे, मग निनवे धुळीस मिळेल!" तेव्हा निनवेतील लोकांनी देवावर श्रद्धा ठेवली; त्यांनी उपास नेमला आणि श्रेष्ठांपासून कनिष्ठांपर्यंत सर्व गोणपाट नेसले.

देवाने त्यांचे वर्तन पाहिले, अर्थात ते आपल्या कुमा्गापासून वळले आहेत हे जाणले. तेव्हा त्यांच्यावर अरिष्ट आणीन असे जे तो म्हणाला होता त्याविषयी त्याला अनुताप झाला आणि त्याने त्यांच्यावर ते अरिष्ट आणले नाही.

हा प्रभूचा शब्द आहे 

सर्व : देवाला धन्यवाद.

प्रतिसाद स्तोत्र :२४:४-५,६-७,८-९

प्रतिसाद : हे परमेश्वरा, तुझे मार्ग मला दाखव

१) हे परमेश्वरा, तुझ्या वाटा मला प्रगट कर. तू आपल्या सन्मार्गाने मला चालव, मला शिक्षण दे, कारण तूच माझा उद्धारक देव आहेस.

२) हे परमेश्वरा, तू पुरातन काळापासून दाखवलेली आपली करुणा आणि वात्सल्य आठव. हे परमेश्वरा, तू आपल्या वात्सल्यानुसार माझे स्मरण कर.

३) परमेश्वरा उत्तम आणि सरळ आहे. तो चुकलेल्यांस सन्मार्ग दाखवतो, तो नम्र जनांस न्यायपथाला लावतो, तो दीनांस आपला मार्ग शिकवतो.

दुसरे वाचन :पौल  ७:२९-३१

वाचक : पौलचे करिंथकरास पहिले पत्र यातून घेतलेले वाचन

बंधुजनहो, मी हेच म्हणतो की, "काळाचा संक्षेप करण्यात आला आहे; की, ज्याला पत्नी आहे त्याने ह्यापुढे ती नसल्यासारखे असावे. जे रडतात त्यांनी रडत नसल्यासारखे, जे आनंद करतात त्यांनी आनंद करीत नसल्यासारखे, जे विकत घेतात त्यांनी आपणाजवळ काही नसल्यासारखे आणि जे ह्या जगाचा उपयोग करतात त्यांनी त्याचा उपयोग पूर्णपणे करत नसल्यासारखे असावे. कारण ह्या जगाचे बाह्य स्वरूप लयास जात आहे.

जयघोष

आलेलूया, आलेलूया !

देवाचे राज्य जवळ आले आहे; सुवार्तेवर विश्वास ठेवा.

आलेलूया !

शुभवर्तमान 

 मार्क  १:१४-२० 

वाचक : मार्कलिखित शुभवर्तमानातून घेतलेले वाचन 

    योहानला अटक झाल्यानंतर येशू देवाच्या सुवार्तेची घोषणा करीत गालिलात आला आणि म्हणाला, "काळाची पूर्णता झाली आहे, देवाचे राज्य जवळ आले आहे; पश्चात्ताप करा आणि सुवार्तेवर विश्वास ठेवा."

नंतर गालील समुद्राजवळ जात असताना त्याला शिमोन आणि त्याचा भाऊ आंद्रेया हे समुद्रात जाळे टाकताना दिसले, कारण ते मासे धरणारे होते. येशु म्हणाला, "माझ्या मागे या म्हणजे तुम्ही माणसे धरणारे व्हाल असे मी करीन. " मग ते लागलेच जाळी सोडून त्याला अनुसरले. तेथून काहीसे पुढे गेल्यावर त्याला जब्दीचा मुलगा याकोब आणि त्याचा भाऊ योहान हे तारवात जाळी नीट करताना दिसले आणि त्याने त्यांना लागलेच बोलावले. मग ते आपला बाप जब्दी ह्याला चाकरांबरोबर तारवात सोडून त्याच्या मागे गेले.

प्रभूचे हे शुभवर्तमान...

सर्व :  हे ख्रिस्त तुझी स्तुती असो.  

चिंतन : सामान्यकाळातील तिसरा रविवार हा देवशब्द रविवार म्हणून साजरा केला जावा असे पोप फ्रान्सिस ह्यांनी जाहीर केले आहे. आजच्या उपासनेमधील तिन्ही वाचने आपल्याला देवशब्दाचे महत्त्व पटवून देणारी आहेत. १) देवशब्द आंतरिक बदल घडवून आणतो : योना संदेष्ट्याला जेव्हा पहिल्यांदा परमेश्वराचे वचन प्राप्त झाले तेव्हा तो परमेश्वरापासून पळून जाण्याचा प्रयत्न करीत होता. मात्र परमेश्वर सर्वत्र आहे, तो बोटीत, समुद्रात, जमिनीवर, पवित्र भूमीत, परप्रांतात सर्वत्र आहे. ह्याचा अनुभव योनाला आला. त्यानंतर योना आज्ञाधारकपणे देवाच्या वचनानुसार आपल्या संदेष्टीय कार्यावर निघून जातो. देवशब्दाचा स्पर्श झाल्यामुळे त्याचेही शब्द धारदार बनतात आणि निनवेच्या लोकांमध्ये बदल घडून येतो. 

२) देवशब्द नवीन दृष्टी देतो : करिंथचे लोक ह्या जगातील गोष्टींमध्ये रमून गेले होते. संत पॉल त्यांना सांगतो की, आता काळ बदलत आहे. ह्या जगाचे बाह्यरूप टिकणारे नाही. ते लयास जात आहे. त्यामुळे जगाचे वैभव असूनही, प्रियजन जवळ असूनही त्यांच्याविषयी मनात आसक्ती बाळगण्याचे कारण नाही. देवशब्द मनात असला की जगाकडे पाहण्यासाठी आपल्याला एक नवीन दृष्टी लाभत असते. मग मनुष्य केवळ भाकरीवर नव्हे तर, परमेश्वराच्या वचनावर जगू लागतो. 

३) देवशब्द नवीन जीवनशैली देतो : येशुने देवराज्याची सुवार्ता घोषविताना दोन महत्वाचे शब्द वापरलेः पश्चात्ताप व सुवार्ता. 

पश्चात्ताप करायचा म्हणजे भूतकाळापासून फारकत घ्याची. सुवार्तेवर विश्वास ठेवायचा म्हणजे आपल्या जीवनात काहीतरी चांगले होणार आहे हे खरे मानायचे. त्याचेच प्रतीक म्हणजे पेत्र व आंद्रिया, याकोब आणि योहान हे आपल्या जुन्या जीवनशैलीवर पाणी सोडतात. एक नवीन जीवनशैली अंगिकारतात. उदा. पेत्रासारखा मासेमारी करणारा कोळी येशूच्या कळपाचा मेंढपाळ बनतो. 

आत्मपरीक्षण : बायबल, ख्रिस्तसभेची शिकवण आणि ह्या जगातील घडामोडी यामधून मला देवशब्दाचे दर्शन घडते का ? माझ्या जीवनात व कुटुंबात देवशब्दाला कोणते स्थान आहे ? मी व्यक्तिशः देव शब्दाचे महत्त्व अनुभवलेले आहे का?

प्रार्थना : हे प्रभू येशू, तुझ्या सुवार्तेची साक्ष देण्यास मला प्रेरणा व धैर्य दे, आमेन..